ސްރީލަންކާގައި ހުންނަ ދިވެހި އެމްބަސީގެ ފަސްޓް ސެކްރެޓަރީގެ މަގާމުން ވަކި ކުރި ކަމަށް ބުނާ ވާހަކަތައް ދޮގުކޮށް އަލީ ސީޒަން ބުނީ އެ މަގާމުން އޭނާ އިސްތިއުފާ ދީފައިވާ ކަމަށެވެ.
"އަދަދު" އާ ވާހަކަ ދައްކަމުން ސީޒަން ބުނީ ފަސްޓް ސެކްރެޓަރީގެ މަގާމުގައި ހުންނަން ބޭނުން ނުވާ ކަމަށް ބުނެ ހައި ކޮމިޝަނަށް ޑިސެމްބަރު 13، ގައި އިސްތިއުފާ ދީ މެއިލް ކުރިއިރު، އެ މެއިލްއަށް ހައިކޮމިޝަނުން ޑިސެމްބަރު 17، ގައި ޖަވާބުދީ އިސްތިއުފާ ގަބޫލު ކޮށްފައިވާ ކަމަށެވެ.
"ޑިސެމްބަރު 13، ވަނަ ދުވަހު އޮންނާނީ ހައި ކޮމިޝަނަށާއި ފޮރިން މިނިސްޓްރީއަށާއި މެއިލް ކޮށްފައި އިތުރަށް ލަންކާގެ ހައި ކޮމިޝަންގައި މަސައްކަތް ކުރަން ބޭނުން ނުވާ ކަމަށް. ހަމަ އެ ދުވަހު އެނުއަލް ލީވްއަށް ރިކުއެސްޓް ކުރީ،" އޭނާ ބުންޏެވެ.
އިސްތިއުފާގެ ސިޓީ ގަބޫލު ކުރީ ޗުއްޓީގައި ހުއްޓާކަން ފާހަގަކޮށް ސީޒަން ބުނީ ހުރިހާ ކަމެއް ހިނގައި ދިޔައީ ޗުއްޓީގައި ހުއްޓާ ކަމަށެވެ.
އިސްތިއުފާ ދިނުމުގެ ސަބަބުން ސޯޝަލް މީޑިއާގައި ދައުރުވަމުންދާ ވާހަކަތަކާ ގުޅިގެން ސީޒަން ބުނީ މަގާމުން އިސްތިއުފާ ދިނުމުން ސަރުކާރަށް ތާއީދު ކުރާ ފަރާތްތަކުން އެހާ ބޮޑަށް އޭނާގެ އަގުވައްޓާލަން މަސައްކަތް ކުރާތީ ހައިރާން ވެފައި ހުރި ކަމަށެވެ.
"ސަރުކާރުގައި މަސައްކަތް ކުރަމުންދާ މީހެއް އިތުރަށް އެ މީހަކު އެ މަގާމުގައި މަސައްކަތް ކުރަން ބޭނުން ނުވުމަކީ އެއީ ފާފައެއް ކަމަށް ފީލްވާ ހިސާބަށް ކަންތައްތައް ގޮސްފައި މިއޮތީ. ސަރުކާރަށް ތާއީދު ކޮށްފައި ލިޔާ ނޫސްތަކާއި ސަރުކާރަށް ތާއީދު ކޮށްފައި ޓުވީޓު ކުރާ މީހުން އެހާ ވާހަކަތައް ހަދައިގެން، ޑޮކިއުމަންޓުގައި ސޮއިކުރީއޭ، މީހަކާ ޒުވާބު ކުރީއޭ، އައުގުރާނަ ގޮވީއޭ ކިޔައިގެން އަގުވައްޓާލައި އަބުރު ދުއްވާލުމުގެ ނިޔަތުގައި ސަރުކާރަށް ތާއީދު ކުރާ މީހުންތަކެއް މާ ބޮޑަށް ސޯޝަލް މީޑިއާގައި ދައްކަން ފެށީމަ އައި އެމް ލައިކް ސަޕްރައިޒްޑް،" ސީޒަން ބުންޏެވެ.
ސީޒަން ބުނީ މަގާމުގައި ހުންނަން ބޭނުން ނުވެ އިސްތިއުފާ ދޭން ބޭނުންވީ މަގާމުގައި ހުރެގެން ބޭނުންވާ ގޮތަށް ކަންކަން ކުރިއަށް ގެންދެވޭނެ ފުރުސަތު އޮތް ކަމަށް ގަބޫލު ނުކުރެވިގެން ކަމަށެވެ.
"މީހަކު ވަޒީފާއެއްގައި ހުރެފައި އެ ވަޒީފާގައި އިތުރަށް ހުންނަން ބޭނުން ނުވާނީ ދެން އެތަނުގައި ޖެނެރަލީ ބުނަންޏާ ހިތްހަމަ ނުޖެހުން ނޫނީ އިތުރަށް އެތަނުގައި މަސައްކަތް ކުރެވޭނެ މާހައުލެއް ނެތިގެންތާ،" އޭނާ ބުންޏެވެ.
ސްރީލަންކާގައި ހުންނަ ދިވެހި އެމްބަސީގެ ފަސްޓް ސެކްރެޓަރީގެ މަގާމަށް ސީޒަން އައްޔަނު ކުރީ މިދިޔަ އަހަރުގެ ޖެނުއަރީ މަހުގެ ތެރޭގަ އެވެ.
