"ޓޫރިޒަމް ފުނޑާލަން" އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ޓެރެރިސްޓް ހަމަލާއެއް ދޭން އުޅޭ ކަމަށް ޓޫރިޒަމް މިނިސްޓްރީގެ ސްޓޭޓް މިނިސްޓަރު އަދި ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެންބަރު މުހައްމަދު ނިހާދު ރޭ ވިދާޅުވެއްޖެ އެވެ.
ޕީއެންސީން ބޭއްވި ހަރުގެ ޖަލްސާގައި ނިހާދު ވިދާޅުވީ އެމްޑީޕީން ޓެރަރިސްޓް ހަމަލާއެއް ދޭން އުޅެނީ ރާއްޖެއަށް އަންނަ ބުރާސްފަތި ދުވަހުގެ ނިޔަލަށް ދެ މިލިއަން ފަތުރުވެރިން ޒިޔާރަތް ކުރާތީ، އެކަމަށް ސަރުކާރުން ކުރަމުންދާ މަސައްކަތް ހުއްޓުވުމަށް ކަމަށެވެ.
"މިއަދު އަޅުގަނޑު މި ދަންނަވަނީ ދެ މިލިއަން ފަތުރުވެރިން ދިވެހިރާއްޖެއަށް އައުމަށްޓަކައި ތައްޔާރުވެފައިވާ ހިނދު، މާދަމާ ނުން އަނެއް ދުވަހު، އަންނަ ބުރާސްފަތި ދުވަހު އިރާދަކުރެއްވިއްޔާ ދެ މިލިއަން ފަތުރުވެރިން ރާއްޖޭގައި ތިބޭނެ. އެކަމާ އަދުގެ ސަރުކާރުން ކުރަމުންދާ މަސައްކަތް ހުއްޓުވައި، މި ދިވެހި ދައުލަތަށް ތިޔަ ރައްޔިތުންނަށް ކުރަން ހުރި މަސައްކަތްތަކަށް ހުރަސް އެޅުމަށް ބޭރުން އަޅުގަނޑުމެންނަށް ލިބިދާނެ މަންފާއެއް، ފައިސާގެ އެހީއެއް ނޫނީ ހުރި ބޮޑެތި އިންވެސްޓްމަންޓްތައް ހުއްޓުވުމަށްޓަކައި ރާވާފައިވާ ބޮޑު ޓެރެރިޒަމްގެ ހަމަލާއެއް،" ނިހާދު ވިދާޅުވި އެވެ.
"އިއްޒަތްތެރި ރައްޔިތުން. މިކަމަކީ ޓީމު ނުވަތަ އަށް ރުފިޔާއަށް ޕެނަޑޯލް ގުޅައެއް ވިއްކައިގެން ދައުލަތުގެ މާލިއްޔާއިން ވައްކަން ކުރަމުންދިޔަ މީހަކު އިސްވެ ހިންގާ ހަރަކާތެއް. މިކަމުގައި ބައިވެރިވަނީ ހަމަ ސީދާ ކަނޑައެޅިގެން މި ދިވެހިރާއްޖޭގެ އިގްތިސާދު ފުނޑާލުމަށްޓަކައި މީގެ ކުރީގައި ވެސް މަސައްކަތް ކޮށްފައިވާ އެމްޑީޕީ. އެ ލީޑާޝިޕްގެ ބްރޯ."
އެ ޓެރަރިސްޓް ހަމަލާ އެމްޑީޕީން ދޭންއުޅެނީ ރާއްޖޭގެ ތިން ރިސޯޓަކަށް މިއަދު ހަވީރު އަރައިގެން ކަމަށް ތުހުމަތު ކުރައްވާ ނިހާދު ވިދާޅުވީ އެ ރިސޯޓަށް ބައްދަލުވުމަކަށް ދާން އެދުމުން ރިސޯޓުން އެކަމަށް ހުއްދަ ނުދިނުމުން ވެސް ގަދަ ބާރުން ރަށަށް އަރަން ތައްޔާރުވެފައިވާ ކަމަށެވެ.
"އަޅުގަނޑު ދަންނަވަން މި އުޅެނީ އިންޓަނޭޝަނަލް ރިސޯޓުތަކަށް އަމާޒުކޮށްގެން ހިންގަން ރާވާފައިވާ ހަރަކާތެއްގެ ވާހަކަ. މި ދަންނަވާ ޖަމިއްޔާ، ލޭބާ ޔޫނިއަންއޭ ކިޔައިގެން އިތުރު ޔޫނިއަންތަކެއް އުފައްދައިގެން މި މީހުންނާ ބައިވެރިވާ ކުދި ބަޔަކު ތިއްބޭ ކިޔާފައި، މި މާލެ ކައިރީގައި އޮތް އެއް ފަޅެއްގެ ތެރޭގައި އޮތް ތިން ރިސޯޓު ހިންގާ ރިސޯޓަކަށް އެރުމަށް ރާވާފައި ވަނީ މާދަމާ ހަވީރު 4:00 ޖަހާއިރު. އެ ރަށުން، މި ވަގުތު އެ ރިސޯޓު ފުލްކޮށް އޮތީމާ އެފަދަ ބައްދަލުވުމެއް ބާއްވަން ޖާގަ ދެވެން ނެތް ވާހަކަ ރީތިކޮށް ވަނީ އަންގާފައި. އެހެންނަމަވެސް ލިޔުމުން އިންޒާރު ދީފައި ވަނީ ތިމަންނާމެން އެ ބައްދަލުވުން ބޭއްވުމަށްޓަކައި ތިރަށަށް އަރާނަމޭ،" އޭނާ ވިދާޅުވި އެވެ.
މީގެ އިތުރުން ނިހާދު ވަނީ އެމްޑީޕީން ހިންގާ ޓޫރިޒަމަށް ގެއްލުންދޭ ހަރަކާތުގައި އެ ދާއިރާގައި މަސައްކަތް ކުރާ އެއްވެސް މީހަކު ބައިވެރިވެ، އެއްބާރުލުން ނުދޭން ގޮވާލައިފަ އެވެ.
އެމްޑީޕީ ސަރުކާރުގައި އެ ޕާޓީގެ މަޖިލިސް މެންބަރަކަށް ހުރެ ކުރިން ނިހާދު ވަނީ އޭރު އިދިކޮޅުގައި އޮތް ޕީޕީއެމް/ޕީއެންސީއަށް ވަރަށް ބޮޑަށް ފާޑު ކިޔާފަ އެވެ. ނަމަވެސް އެމްޑީޕީއަށް ދެވަނަ ދައުރެއް ހޯދައި ދިނުމަށް ދެ ބުރުގައި ވެސް މަސައްކަތް ކުރެއްވި ނީހާދު ޕީއެންސީއަށް ބަދަލުވީ އެ ޕާޓީއަށް ވެރިކަން ލިބުނު ފަހުންނެވެ.
އެގޮތުން މަޖިލީހުގެ ފަހު ދުވަސްތަކުގައި ޕީއެންސީގައި ހުރެ، އޭނާ ވަނީ އެމްޑީޕީއަށް ވަރަށް ބޮޑަށް ފާޑު ކިޔައި އެކި ތުހުމަތުތައް ކުރައްވާފަ އެވެ. އެއާ އެކު، ގިނަ ބައެއްގެ ފާޑު ކިޔުން ނިހާދުއަށް އަމާޒުވި އެވެ.
ޕީއެންސީއަށް ނިހާދު ބަދަލުވީ ފައިސާގެ އިތުރުން ސަރުކާރުގެ ސްޓޭޓް މިނިސްޓަރުގެ ވަޒީފާއެއް ދިނުމުން ކަމަށް އޭރު އަޑުތައް ފެތުރުނެވެ. އަދި އެގޮތަށް އަޑު ފެތުރުނު ފަހުން އޭނާއަށް ޓޫރިޒަމްގެ ސްޓޭޓް މިނިސްޓަރުކަން ދިނެވެ.
