ދައުލަތުގެ ހަރަދު ކުޑަކުރަން ނިންމާފައިވާ ކަމަށް ރައީސް އިއުލާނުކުރައްވާފައި ވަނިކޮށް، ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެންބަރު މުހައްމަދު ނިހާދު ޓޫރިޒަމް މިނިސްޓްރީގެ ސްޓޭޓް މިނިސްޓަރުގެ މަގާމަށް އައްޔަންކޮށްފި އެވެ.
"އަދަދު" އަށް ކަށަވަރުވެފައިވާ ގޮތުގައި ނިހާދު ސްޓޭޓް މިނިސްޓަރުގެ މަގާމަށް އައްޔަންކޮށްފައިވަނީ މިދިޔަ ހޮނިހިރު ދުވަހު އެވެ. އޭނާއަކީ އެމްޑީޕީގެ ވެރިކަން ނިމުމާއެކު، އެ ޕާޓީ ދޫކޮށް ޕީއެންސީއާ ގުޅުނު މަޖިލީހުގެ 13 މެންބަރުންގެ ތެރެއިން އެއް މެންބަރެވެ.
ސްޓޭޓް މިނިސްޓަރަކަށް މުސާރައާއި އިނާޔަތްތަކުގެ ގޮތުގައި މަހަކު 43,500ރ. ދައުލަތުގެ ބަޖެޓުން ހަރަދުކުރެ އެވެ. އެއީ އަހަރަކަށް 522،000ރ. އެވެ.
ސިޔާސީ އިސް މަގާމުތަކަށް މީހުން އައްޔަންކުރުން މަޑުޖައްސާލާނެ ކަމަށް މި އަހަރުގެ ރިޔާސީ ބަޔާނުގައި، ފަސް މަސް ކުރިންވެސް ރައީސް މުއިއްޒު ވައުދުވެވަޑައިގެންނެވި އެވެ. ނަމަވެސް އޭގެފަހުން އެތައް ސިޔާސީ މުވައްޒަފުންނެއް ވަނީ އައްޔަންކުރައްވާފަ އެވެ.
އެއަށްފަހު ދައުލަތުގެ މާލީ ހާލަތު ގޯސްވެ، ގިނަ ފިޔަވަޅުތަކެއް އަޅުއްވާނެކަން އެމަނިކުފާނު އިއުލާނުކުރެއްވީ ޖޫން 27، ގަ އެވެ. އެގޮތުން ފިޔަވަޅުތަކުގެ ތެރެއިން ސަރުކާރުގެ ސިޔާސީ މުވައްޒަފުންގެ އަދަދު މަދުކޮށް، ހާއްސަ މުނާސަބަތުތައް ފާހަގަކުރަން ކުރާ ހޭދަ މަދުކުރަން ނިންމާފައިވާ ކަމަށްވެސް ރައީސް އެ ދުވަހު ވިދާޅުވި އެވެ.
ސޯޝަލް މީޑިއާ ޕްލެޓްފޯމް އެކްސްގައި އެ ދުވަހު ކުރެއްވި ޕޯސްޓުގައި ރައީސް ވަނީ ސިޔާސީ މަގާމުތަކުގެ އަދަދު މަދު ކުރަނީ ސަރުކާރުގެ ރިކަރަންޓު ހަރަދު ދަށްކުރުމުގެ ގޮތުން ކަމަށްވެސް ވިދާޅުވެފައިވެ އެވެ.
މި ސަރުކާރުން ވެރިކަމަށް އައީ ސިޔާސީ މުވައްޒަފުންގެ އަދަދު 700 އަށްވުރެ ގިނަ ނުކުރާނެ ކަމުގެ ވައުދާއެކުގަ އެވެ. ނަމަވެސް, "އަދަދު" ނޫހުން އެކި މަސްދަރުތަކުން ހޯދި ހޯދުންތަކުން އަންދާޒާ ކުރެވެނީ މި ސަރުކާރުގެ ސިޔާސީ މުވައްޒަފުންގެ އަދަދު 2,000 އާ ގާތްކުރާ ކަމަށެވެ.
ނަމަވެސް ސިޔާސީ މުވައްޒަފުންގެ ރަސްމީ ޖުމްލަ އަދަދެއް މިހާތަނަށް ސަރުކާރުން ހާމަކޮށްފައެއް ނުވެ އެވެ.
