މާލޭގެ ގެއެއްގެ ތެރޭގައި މަރުވެފައި އޮތް މީހަކު ފެނިއްޖެ އެވެ.
ފުލުހުން މިއަދު ބުނީ ގަލޮޅު ގެއެއް ތެރެއިން ހަބަރު ހުސްވެފައި އޮތް މީހަކު އޮތް ކަމުގެ މައުލޫމާތު ރޭ ދަންވަރު 01:27 ހާއިރު ރިޕޯޓު ކޮށްފައިވާ ކަމަށެވެ.
އެއީ ގ. ބިއުޓީ ވިލާ، ދާއޫދު ޖިމްރީޒް، 45 އެވެ.
އެ މީހާ އައިޖީއެމްއެޗް ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް ހޮސްޕިޓަލާ ހަވާލާދީ ފުލުހުން ބުންޏެވެ.
އިއްޔެ ހަވީރު ވެސް ގަލޮޅު ގެއެއް ތެރޭގައި ހަބަރު ހުސްވެފައި އޮތް މީހަކު ފެނިގެން، ހަވީރު 5:02 ހާއިރު ފުލުހުންނަށް ރިޕޯޓު ކޮށްފައިވެ އެވެ. އެ މީހާ ވެސް އައިޖީއެމްއެޗް ހޮސްޕިޓަލަށް ގެންދިޔައިރު އޮތީ މަރުވެފައި ކަމަށް ހޮސްޕިޓަލާ ހަވާލާދީ ފުލުހުން ބުންޏެވެ.
އިއްޔެ ހަވީރު މަރުވެފައި އޮއްވާ ފެނުނީ ގ. ފްރެސް ލައިޓް، އަލީ ރަޝީދު 35 އެވެ.
ފުލުހުން ބުނީ އެ ދެ މައްސަލަ ވެސް ތަހުގީގު ކުރަމުންދާ ކަމަށެވެ. ނަމަވެސް މި މަރުތަކުގެ ސަބަބެއް ފުލުުހުން ހާމައެއް ނުކުރެ އެވެ.
