ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް އެ ސްކީމުން ގޯތި ލިބުނު ކަމަށް ވަގު ލިޔުންތަކެއް ތައްޔާރުކޮށް ވަގަށް ގޯތިތަކެއް ވިއްކި ކަމަށް ތުހުމަތުކުރެވޭ މައްސަލައިގައި ހައުސިން މިނިސްޓްރީ 10 ސިޔާސީ މުވައްޒަފެއް މަގާމުގެ މަސްއޫލިއްޔަތު ތަކުން އެކަހެރިކޮށްފި އެވެ.
އެކަން ސަރުކާރުން އަދި ހާމައެއް ނުކުރެ އެވެ.
ނަމަވެސް، އިތުބާރު ކުރެވޭ ސަރުކާރުގެ އޮފިޝަލަކު ވިދާޅުވީ ސަސްޕެންޑުކޮށްފައި ވަނީ ޑެޕިއުޓީ މިނިސްޓަރުންނާއި ޕޮލިޓިކަލް ޑައިރެކްޓަރުންތަކެއް ކަމަށެވެ.
މި މައްސަލައިގެ ތަހުގީގު ފުލުހުންނާއި އޭސީސީން ފަށާފައި ވާއިރު، ޕާސްޕޯޓު ހިފަހައްޓާފައިވާ 20 މީހުންގެ ތެރޭގައި ހައުސިން މިނިސްޓްރީގެ ސިޔާސީ މުވައްޒަފުންތަކެއް ވެސް ހިމެނެ އެވެ.
ހައުސިން މިނިސްޓްރީގެ ޑެޕިއުޓީ މިނިސްޓަރު އަޒުހަރު އަބްދުﷲ ސައީދު (އަޒުހާޓު) އެޗްޑީސީ ބޮޑުގައި ވެސް ހިމެނެ އެވެ. އޭނާގެ ޕާސްޕޯޓު ވަނީ ހިފަހައްޓައިފަ އެވެ.
ވަގަށް ގޯތިތަކެއް ވިއްކި ކަމަށް ތުހުމަތުކުރެވޭ މައްސަލައިގައި އެޗްޑީސީގެ ޗެއާމަން އަހުމަދު ނާސިފު ފިޔަވައި އެ ކުންފުނީގެ ބޯޑުގައި ހިމެނޭ މެންބަރުންނާއި ކުންފުނީގެ ފަސް މުވައްޒަފަކު އަދި އެމްޑަބްލިޔޫއެސްސީގެ ޑެޕިއުޓީ މެނޭޖިން ޑިރެކްޓަރަކަށް ހުންނެވި މުހައްމަދު ފަޒީލް ރަޝީދު ވަނީ މަގާމުން ސަސްޕެންޑުކޮށްފަ އެވެ.
އިތުބާރު ހުރި މަސްދަރަކުން "އަދަދު" ނޫހަށް މައުލޫމާތު ދިން ގޮތުގައި މިހާރު ހިންގަމުންދާ ތަހުގީގާ ގުޅިގެން އެޗްޑީސީގެ އައިޓީ ހެޑް އަބްދުالله ޝުހޫދު, ޑެޕިއުޓީ އައިޓީ ހެޑް މުހައްމަދު ސަލީމް, ޗިފް ބިޒްނަސް އޮފިސާ އަހުމަދު ޔާމީންގެ އިތުރުން ޗީފް ފައިނޭންޝަލް އޮފިސާ އަބްދުالله ފާއިދު އަދި އެސްޓޭޓުގެ ޑެޕިއުޓީ ޑިރެކްޓަރު އަހުމަދު އައިމަން ވެސް ވަނީ މަގާމުގެ މަސްއޫލިއްޔަތުތަކުން އެކަހެރިކޮށްފަ އެވެ.
އެޗްޑީސީގެ ސީއެފްއޯއަކަށް ހުންނެވި ފާއިދު ވަކިކުރަން ވެސް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވަނީ އެޗްޑީސީއަށް އަންގާފަ އެވެ. އެއީ އެ މަގާމަށް އޭނާގެ ޝަރުތު ހަމަނުވާތީ އެވެ.
ގޯތިތަކުގެ މައްސަލަ ފުރަތަމަ ފެންމަތިވީ ޖުލައި މަހު އެވެ. ދެ މީހަކަށް އެއް ބިމެއް ދީފައި އޮތްކަން އެނގިގެން އެކަމުގައި އެޗްޑީސީ އާއި ހައުސިން މިނިސްޓްރީއާ ދެމެދު މުއާމަލާތް ކުރި އެވެ. ނަމަވެސް އެ މައްސަލަ ތަހުގީގީ އިދާރާއަކަށް ހުށަހައެއް ނާޅަ އެވެ.
މި މައްސަލަ ސޯޝަލް މީޑިއާގައި މި ހަފުތާގައި ތިލަވުމާއެކު ފުލުހުންނާއި އޭސީސީން ތަހުގީގު ތަހުގީގު ފެށި އެވެ. ނަމަވެސް އެއްވެސް މީހެއްގެ މައްޗަށް ޖިނާއި ތުހުމަތެއް އަދި ނުކުރެ އެވެ.
