ބިންވެރިޔާ ސްކީމްގެ ދަށުން ގޯތި ނުލިބޭ މީހުންނަށް ގޯތި ލިބުނު ކަމަށް ވަގު ލިޔުންތަކެއް ތައްޔާރުކޮށް ވަގަށް ގޯތިތަކެއް ވިއްކި ކަމަށް ތުހުމަތުކުރެވޭ މައްސަލައިގެ ތަހުގީގުގައި ސުވާލު ކުރި ފަރާތަކުން ބުނީ ސުވާލު ކުރި ހުރިހާ ފަރާތަކުން ވެސް ތަހުގީގުގައި ބުނީ ޑޮކިއުމެންޓުތައް ދިނީ ކުރީ ސަރުކާރުން ކަމަށް އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް މިރޭ ވިދާޅުވެއްޖެ އެވެ.
ފުލުހުން ނޫސްވެރިންނަށް ދިން ބައްދަލުވުމުގައި އަބްދުﷲ ޝަރީފް ވިދާޅުވީ ތަހުގީގަށް ލިބިފައިވާ ހައުސިން މިނިސްޓްރީގެ ލިޔުންތަކާ ގުޅިގެން، ލިޔުން ލިބުނު ފަރާތްތަކާ ސުވާލު ކުރުމުން އެ ލިޔުންތަކަކީ ކުރީ ސަރުކާރުން ދީފައިވާ ލިޔުންތަކެއް ކަމަށް ބުނެފައިވާ ކަމަށެވެ.
ނަމަވެސް މިހާތަނަށް އެ ލިޔުންތަކަކީ ސައްހަ ލިޔުންތަކެއްކަން ކަށަވަރު ނުވާއިރު، އެ ލިޔުންތަކުގެ ސައްހަކަން ކަށަވަރު ކުރުމުގެ މަސައްކަތް ކުރަމުންދާ ކަމަށް އަބްދުﷲ ޝަރީފް ވިދާޅުވި އެވެ.
"މިހާ ހިސާބަށް ކުރި ތަހުގީގުން އަޅުގަނޑުމެންނަށް މި އެނގުނީ އަޅުގަނޑުމެން އަތަށް މިހާރު މި ލިބިފައި ހުރި ޑޮކިއުމަންޓްތަކާ ބެހޭ ގޮތުން ސުވާލު ކުރި މީހުން ބުނެފައިވާ ވާހަކަތަކަށް ބިނާކޮށްފައި. އަޅުގަނޑުމެން މި ހިސާބަށް ސުވާލުކުރި ހުރިހާ ފަރާތްތަކުން ވެސް ތަހުގީގުގައި ބުނެފައި ވަނީ މި ޑޮކިއުމަންޓްތަކަކީ މިދިޔަ ސަރުކާރުގައި އެ ބޭފުޅުންނަށް ހަވާލުކުރި ޑޮކިއުމަންޓްތަކެކޭ،" އަބްދުﷲ ޝަރީފް ވިދާޅުވި އެވެ.
"އަޅުގަނޑު ނުބުނަން މި ޑޮކިއުމަންޓްތަކަކީ ސައްހަ އެއްޗެކޭ ވެސް. އެކަން ކަށަވަރު ކުރުމަށްޓަކައި އަޅުގަނޑުމެން މި މަސައްކަތް ކުރަނީ. މިއީ އޭރުގެ މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗާ ނަމުގައި ހަދާފައި ހުރި ޑޮކިއުމަންޓްތަކެއް މި ޑޮކިއުމަންޓްތަކަކީ."
އަބްދުﷲ ޝަރީފް ވިދާޅުވީ މައްސަލައާ ގުޅިގެން އެޗްޑިސީގެ އެމްޑީ އިބްރާހިމް ފަޒުލް ރަޝީދުގެ ބޭބެ އިބްރާހިމް ފަޒީލް ރަޝީދުއާ ސުވާލު ކުރުމުން އޭނާއަށް ގޯތި ލިބުނު ކަމުގެ ލިޔުން ދިނީ ކުރީ ސަރުކާރުން ކަމަށް ބުނެފައިވާ ކަމަށެވެ.
އެގޮތުން ފަޒީލްއާ ސުވާލު ކުރުމުން އޭނާއަށް މިދިޔަ ސަރުކާރުގައި ގޯތި ނުލިބުމުން، އެކަމާ ގުޅިގެން ކުރީގެ ވެރިކަމުގައި އޭރުގެ ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީނާ ބައްދަލު ކުރި ކަމަށް ވެސް ބުނެފައިވާ ކަމަށް އަބްދުﷲ ޝަރީފް ވިދާޅުވި އެވެ.
ނަމަވެސް މައްސަލައާ ގުޅިގެން މިހާތަނަށް އެއްވެސް ފަރާތަކަށް ތުހުމަތުތަކެއް ކުރެވި، ގޯހެއް ހަދާފައިވާ ކަމަށް ވެސް ނުބެލެވޭ ކަމަށް އޭނާ ވިދާޅުވި އެވެ.
"އަޅުގަނޑުމެން އެއްވެސް ފަރާތެއް މީގައި ޝާމިލުވާ ކަމަކަށް ނުވަތަ ގޯހެއް ހާދަފައި އޮތް ކަމަކަށް އަޅުގަނޑުމެން ނުދަންނަވަން. އަޅުގަނޑުމެން މި ބަލަނީ މި ޑޮކިއުމަންޓްތަކަކީ ސައްހަ ޑޮކިއުމަންޓްތަކެއްތޯ،" އަބްދުﷲ ޝަރީފް ވިދާޅުވި އެވެ.
ވަގު ލިޔުންތަކެއް ތައްޔާރުކޮށް ވަގަށް ގޯތިތަކެއް ވިއްކި ކަމަށް ތުހުމަތުކުރެވޭ މައްސަލަ ފުލުހުންގެ އިތުރުން އެންޓީ ކޮރަޕްޝަން ކޮމިޝަން (އޭސީސީ) އިން ވެސް އަންނަނީ ތަހުގީގު ކުރަމުންނެވެ.
