ދޯހާ، ގަތަރު (ޑިސެމްބަރު 19) - މެކްސިކޯގެ ޕަޗޫކާ އަތުން 3-0 އިން މޮޅުވެ، ރެއާލް މެޑްރިޑުން ފީފާ އިންޓަކޮންޓިނެންޓަލް ކަޕް ކާމިޔާބުކޮށްފި އެވެ.
ފީފާ އިން މީގެ ކުރިން އަހަރަކު އެއް ފަހަރު ބާއްވަމުން އަންނަ ކްލަބް ވޯލްޑް ކަޕް މި ފަހަރު ވަނީ އިންޓަކޮންޓިނެންޓަލް ކަޕަށް ބަދަލުކޮށްފަ އެވެ. އެއީ، އަންނަ އަހަރު ފީފާ ކްލަބް ވޯލްޑް ކަޕް 32 ޓީމާ އެކު، ފަށަން ނިންމާފައި އޮތުމުންނެވެ.
ގަތަރުގެ ލުސައިލް ސްޓޭޑިއަމްގައި މިރޭ ކުޅުނު ފައިނަލަށް ރެއާލުން ނުކުތްއިރު ހިތްހަަމަޖެހުމަކީ، ކީލިއަން އެމްބާޕޭ ފިޓްވުމުގެ އިތުރުން، ރޭ ފީފާ ބެސްޓް އެވޯޑްސް އިން އެންމެ މޮޅު ކުޅުންތެރިއަކަށް ހޮވުނު ވިނީޝިއުސް ޖޫނިއާ ރަނގަޅު ފޯމެއްގައި ހުރުމުންނެވެ.
ފުރަތަމަ ހާފުގައި ރެއާލުން ލީޑުނެގީ އެމްބާޕޭ ޖެހި ގޯލުންނެވެ. ރެއާލާ ގުޅުނު ފަހުން އެމްބާޕޭ ކުޅުނު ދެ ފައިނަލުގައި ވެސް ލަނޑު ޖެހި އެވެ. އެ ގޮތުން، ކުރިން ވަނީ ޔުއެފާ ސުޕަ ކަޕްގައި އެޓަލަންޓާ ކޮޅަށް ވެސް ލަނޑު ޖަހައިފަ އެވެ.
ދެ ވަނަ ހާފު ފަށައިގެން، އަށް މިނިޓް ތެރޭ ރޮޑްރީގޯ ވަނީ ރެއާލަށް ލީޑުފުޅާކޮށްދީފަ އެވެ. މިއީ، އޭރިއާ ރޮނގުކައިރީ ހުރެފައި ގޯލުގެ ކަނަށް ބޯޅަ ފޮނުވާލައިގެން ރޮޑްރީގޯ ޖެހި ގޯލެކެވެ.
މެޗުގެ 84 ވަނަ މިނިޓްގައި ވިނީޝިއުސް ވަނީ ޕެނަލްޓީ އަކުން ރެއާލްގެ ތިން ވަނަ ގޯލު ޖަހައިފަ އެވެ. މިއީ ރެއާލްގެ ލޫކަސް ވަޒްކޭޒަށް ޕަޗޫކާގެ އޭރިއާތެެރެއިން ކުރި ފައުލަކަށް ރެފްރީ ދިން ޕެނަލްޓީއެކެވެ.
ފީފާ އިން ނިންމާފައިވަނީ، އިންޓަކޮންޓިނެންޓަލް ކަޕް ކޮންމެ އަހަރެއްގައި ބާއްވާއިރު، ފަސް ބައްރުގެ ޗެމްޕިއަނުން ކުޅޭ ފޯމެޓަށް މި މުބާރާތް ގެންދިއުމަށެެވެ. އެހެންކަމުން، މި ތަށި އެންމެ ފުރަތަަމަ މި ހޯދީ ދުނިޔޭގެ އެންމެ ކާމިޔާބު ފުޓްބޯޅަ ކްލަބް ރެއާލުންނެވެ.
