ޖަޕާން ސަރުކާރުން އެމްއެންޑީއެފް ކޯސްޓްގާޑަށް ކަނޑުމަތީގެ ސާޗް އެންޑް ރެސްކިއު އޮޕަރޭޝަންތަކުގައި ބޭނުން ކުރަން 800 މިލިއަން ޔެންގެ ޒަމާނީ ވަސީލަތްތައް އިއްޔެ ހަދިޔާކޮށްފި އެވެ.
ބަންޑާރަކޮށީގައި ބޭއްވި ރަސްމިއްޔާތެއްގައި އެ ވަސީލަތްތައް އެމްއެންޑީއެފްއާ ހަވާލުކޮށްދެއްވީ ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ތަކެއުޗީ މިދޯރީ އެވެ. އެ ވަސީލަތްތަކާ އެމްއެންޑީއެފްގެ ފަރާތުން ހަވާލުވެލެއްވީ ޑިފެންސް މިނިސްޓަރު ޣައްސާން މައުމޫން އެވެ.
ރަސްމިއްޔާތުގައި ޣައްސާން ވިދާޅުވީ އެމްއެންޑީއެފް ކޯސްޓްގާޑުގެ އުޅަނދުފަހަރާއި، އޮޕަރޭޝަނަލް އާލާތްތަކާއި، އެމްއެންޑީއެފް ކޯސްޓްގާޑުން ފޯރުކޮށްދޭ ހިދުމަތްތައް ކުރިއަށް އޮތް ދުވަސްވަރުގައި ދެގުނަ ކުރުމަށް މަސައްކަތް ކުރަމުންދާ ކަމަށެވެ.
އެގޮތުން ޖަޕާނު ސަރުކާރުން ހަދިޔާކުރި ވަސީލަތްތަކުގެ ސަބަބުން އެމްއެންޑީއެފް ކޯސްޓްގާޑުން ކަނޑުމަތީގެ ކުއްލި ނުރައްކަލުގެ ހާލަތްތަކުގައި އަވަހަށް އަދި ހަރުދަނާކަމާ އެކު ހަރަކާތްތެރިވުމުގައި އެމްއެންޑީއެފް ކޯސްޓްގާޑުގެ ގާބިލުކަން އިތުރުވާނެ ކަމަށް ވެސް ޣައްސާން ވިދާޅުވި އެވެ.
މީގެއިތުރުން ޣައްސާން ވަނީ ޖަޕާނު ސަރުކާރުން ރާއްޖެއަށް ވެދެއްވާ އެހީތެރިކަން ފާހަގަކުރައްވައި އެމްއެންޑީއެފަށް ހަދިޔާ ކުރެއްވި ވަސީލަތްތަކާ ގުޅިގެން ޝުކުރު އަދާކޮށްފަ އެވެ.
