ހަނގުރާމައާ ގުޅިގެން މެދުއިރުމަތީގައި ތާށިވެފައި ތިބި ޖަޕާނުގެ ރައްޔިތުންގެ ސަލާމަތް ކުރުމުގެ މިޝަންއެއްގައި ޖަޕާނުގެ އަސްކަރީ ބޯޓެއް ރާއްޖެއަށް ދަތުރު ފަށައިފި އެވެ.
ޖަޕާނުން ރާއްޖެއަށް ފޮނުވީ ކޭސީ-767 މަރުކާގެ އަސްކަރީ މަތިންދާބޯޓެކެވެ. އެއީ އެއްވެސް ހަތިޔާރެއް ހަރުކޮށްފައި ނުވާ، މީހުންނާއި މުދާ އުފުލުމަށާއި ޖައްވުގައި ރިފިއުލް ކުރަން ހާއްސަކޮށް ހަދާފައިވާ ބޮއިންގެ ބޯޓެކެވެ.
ޖަޕާނުގެ ނޫސްތަކުން ބުނެފައި ވަނީ ރާއްޖެއަށް ފޮނުވި މަތިންދާބޯޓު އޮންނާނީ އެމަޖެންސީ ހާލަތެއްގައި ހަރަކާތްތެރިވާން ތައްޔާރަށް ކަމަށެވެ. އެ ބޯޓުގެ ބޭނުމަކީ ޖަޕާނުގެ ސަރުކާރުން މެދުއިރުމައްޗަށް ހަމަޖައްސާ ޗާޓާޑް ފްލައިޓުތައް ކެންސަލްވެއްޖެ ހާލަތެއްގައި އެހީތެރިކަން ފޯރުކޮށްދިނުމެވެ.
ޖަޕާނުގެ އަސްކަރީ ބޯޓު މިއަދުގެ ވަގުތެއްގައި އޭއެސްޑީއެފް ކޮމާކީ އެއާބޭސް އިން ވަނީ ރާއްޖެއަށް ފުރައިފަ އެވެ. އެ ބޯޓުގައި ޖަޕާނު ސިފައިންގެ 30 މީހުން ވެސް ފުރި އެވެ. އެ ބޯޓުގައި 200 މީހުންނަށް ދަތުރު ކުރެވޭނެ އެވެ.
ޖަޕާނުގެ ސަރުކާރުން ދަނީ އޮމާން، ސައުދީ އަރަބިއްޔާ ފަދަ ގައުމުތަކަށް ޗާޓާޑް ފްލައިޓުތައް ހަމަޖައްސަމުންނެވެ. މެދުއިރުމަތީގައި ތާށިވެފައިވާ ޖަޕާނުގެ ރައްޔިތުން ސަލާމަތް ކުރަން އެ ގައުމުން ވަނީ ސެލްފް ޑިފެންސްގެ ގާނޫނުގެ ދަށުން ގިނަ ފިޔަވަޅުތަކެއް އަޅައިފަ އެވެ.
މިދިޔަ ބުދަ ދުވަހު ރާއްޖެއަށް އައި އިޓަލީ ކްރޫޒް ޝިޕަކުން އެނބުރި ފުރީ ރާއްޖޭގައި ތާށިވެފައި ތިބި އިޓަލީގެ 28 ފަތުރުވެރިއަކު ގޮވައިގެންނެވެ. އެ މީހުން ކަނޑުމަގުން ފުރުމުގެ އިންތިޒާމްތައް ވެސް އޮތީ ހަމަޖައްސާފައި ކަމަށް އިޓަލީގެ ނޫސްތަކުން ބުނެ އެވެ.
ކޮސްޓާ ޑެލީޒިއޯސާ ރާއްޖެއަށް އައީ 1855 ފަތުރުވެރިންނާއި 881 ކްރޫ މެންބަރުން ގޮވައިގެންނެވެ. އެ ބޯޓު ރާއްޖެ އައީ ސްރީ ލަންކާގެ ވެރި ރަށް ކޮލަމްބޯގެ ޕޯޓަށް މަޑުކުރުމަށްފަހު އެވެ.
ރާއްޖެއިން ފުރައިގެން ދިޔަ ކޮސްޓާ ޑެލީޒިއޯސާ ދެން މަޑު ކުރާނީ މޮރިޝަސްއަށެވެ. އެ ބޯޓުގެ ފަހު މަންޒިލަކީ ސައުތު އެފްރިކާގެ ކޭޕްޓައުން އެވެ. ކޭޕްޓައުންއަށް ބޯޓު ވަންނާނީ މި ހިނގާ މާޗް 18، ކަމަށް އެނގިފައިވެ އެވެ.
ހަނގުރާމައަށް ހަފުތާއެއް ފުރުނުއިރު، ރާއްޖެ ދަތުރު ކުރަން ހަމަޖެހިފައި އޮތް 154 ފްލައިޓު ވަނީ ކެންސަލްވެފަ އެވެ. އެކަމަކު، ސަރުކާރުން މައުލޫމާތު ނުދޭތީ، ރާއްޖޭގައި ތާށިވެފައި ތިބި ފަތުރުވެރިންގެ އަދަދެއް އަދި ނޭނގެ އެވެ.
