މާލޭގެ ގެއެއްގައި އަލިފާން ރޯވެ އަނދައިފި އެވެ
އެމްއެންޑީއެފްއިން ބުނި ގޮތުގައި އަލިފާން ރޯވީ ނިކަގަސް ހިނގުމުގައި ހުންނަ މއ. ސިޓީވިލާގަ އެވެ.
"[އެގޭގައި] އަލިފާން ރޯވެގެން އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ހަރަކާތްތެރިވާން ފަށައިފި. މި ހާދިސާގެ ރިޕޯޓް ލިބިފައިވަނީ ދަންވަރު 03:06 ހާއިރު،" އެމްއެންޑީއެފްއިން އެކްސްގައި ކުރި ޕޯސްޓެއްގައިވެ އެވެ.
ރޯވި އަލިފަންގަނޑު ގިނަ އިރުތަކެއް ނުވެ ކޮންޓްރޯލްކުރި އެވެ. ނަމަވެސް ދުން އެރުން ހުއްޓުމާއެކު ސިފައިން އޮޕަރޭޝަން ނިންމައިލީ ގާތްގަނޑަކަށް މެންދަމު 4:30 ހާއިރު އެވެ.
އެއް ބުރިއަށް ހަދާފައިވާ މއ. ސިޓީ ވިލާގައި އަލިފާން ރޯވި ސަބަބެއް އިދާރާތަކުން އަދި ހާމައެއް ނުކުރެ އެވެ.
އަލިފާނުގެ ހާދިސާގައި މި ގެ ވަނީ ދިރިނޫޅެވޭ ވަރަށް އަނދައިފަ އެވެ.
މަންޒަރު ދުށް ބައެއް މީހުން ބުނި ގޮތުގައި އަލިފާން ރޯވެފައި ހުރީ ގޭގެ އެތެރެގެ ކޮޓަރިއެއްގަ އެވެ.
އެ މަންޒަރު މީހުންނަށް ފެނިގެން ގޭގައި އެވަގުތު ތިބި މީހުން ސަލާމަތް ކުރި ކަމަށާއި، ނަމަވެސް ދުމުގެ އަސަރުކޮށްގެން ފިރިހެނަކު ހޮސްޕިޓަލްއަށް ގެންދިޔަ ކަމަށް އެ ސަރަހައްދުން އަދަދު ނޫހާ ވާހަކަ ދެއްކި މީހުން ބުންޏެވެ.
އަލިފާނުގެ ހާދިސާއާ ގުޅިގެން އެ ސަރަހައްދުގެ ގެތަކުން މީހުން ވެސް ހުސްކުރި އެވެ. މީހުން ގެތަކަށް ވެއްދީ މެންދަމު 4:30 ހާއިރު އެވެ.
