ބުރާސްފަތި ދުވަހު ރޯވި އަލިފާނުގައި މާލޭގެ މެޕިންގެ މުހިންމު ބައެއް އިމޭޖުތައް ގެއްލިފައިވާތީ ޑްރޯން ބޭނުން ކޮށްގެން މާލެ ސަރަހައްދު އަލުން މެޕް ކުރުމުގެ މަސައްކަތް ހައުސިން މިނިސްޓްރީން މިއަދު ފަށައިފި އެވެ.
ހައުސިން މިނިސްޓްރީގެ ރަސްމީ އެކްސް އެކައުންޓުގައި ކުރި ޕޯސްޓެއްގައި ބުނީ ބުރާސްފަތި ދުވަހު ރޯވި އަލިފާނުގައި ގެއްލިގެންދިޔަ ޑޭޓާތައް އަލުން އެއްކޮށް އިތުރަށް ފުރިހަމަ ކުރުމުގެ މަސައްކަތް ކުރަމުންދާ ކަމަށެވެ.
މާލޭގެ މެޕިންގެ މަސައްކަތް ކުރަމުން ދަނީ އެ މަސައްކަތުގެ ތެރެއިން ކަމަށް ހައުސިން މިނިސްޓްރީން ބުންޏެވެ. އެ މަސައްކަތް ކުރަމުންދާ މަންޒަރު ފެންނަ ފޮޓޯތައް ވެސް ހައުސިން މިނިސްޓްރީން ހިއްސާކުރި އެވެ.
ބުރާސްފަތި ދުވަހު ރޯވި އަލިފާނުގައި ހައުސިން މިނިސްޓްރީގެ އިތުރުން އިންފްރާސްޓްރަކްޗާ މިނިސްޓްރީ އަދި އެންވަރަމެންޓް މިނިސްޓްރީ ހުރި އިމާރާތްތައް އަނދައި މިނިސްޓްރީތަކުގެ މަސައްކަތް ހުއްޓުމަކަށް އައެވެ. އޭގެއިތުުރުން އެންވަރަމެންޓް ޕްރޮޓެކްޝަން އެޖެންސީ އާއި މާލޭ ރަށްވެހިންގެ ރެޖިސްޓްރީ އާއި ބާތު ސެޓްފިކެޓް ފަދަ ލިޔުންތައް ބަލަހައްޓާ ސިޓީ ކައުންސިލްގެ އިމާރާތަކަށް ވެސް ބޮޑެތި ގެއްލުންތަކެއްވި އެވެ.
މި ތަންތަނުގައި ހުރި ލިޔެކިޔުންތަކާއި މުހިންމު ބައެއް މައުލޫމާތުތައް އެއްކޮށް ނެތިގޮސްފައިވާއިރު، ޑިޖިޓަލްކޮށް ހުރި މައުލޫމާތުގެ ތެރެއިން ބެކަޕެއް ނެތް ހުރިހާ މައުލޫމާތެއް ވެސް ވަނީ ނެތިގެން ގޮސްފަ އެވެ.
އެ ގޮތުން ހައުސިން މިނިސްޓްރީއަށް ލިބުނު ގެއްލުންތަކުގެ ތަފުސީލު ދެއްވަމުން މިދިޔަ ހުކުރު ދުވަހު މިނިސްޓަރު، ޑރ. އަލީ ހައިދަރު ވިދާޅުވީ އަލިފާނުގައި އެ މިނިސްޓްރީގައި ހުރި ހުރިހާ ލިޔެކިޔުމަކާއި ޑޭޓާއެއް އަނދައިގެން ގޮސްފައިވާ ކަމަށެވެ. އަދި އަނދައިގެންދިޔަ ސާވާގައި ހުރި މައުލޫމާތު ސަލާމަތް ކުރެވޭނެ ކަމަށް އަންދާޒާ ނުކުރެވޭ ކަމަށް ވެސް އޭނާ ވިދާޅުވި އެވެ.
"ހަމަ ގާތްގަނޑަކަށް ވުޒާރާގައި ހުރި ހުރިހާ ލިޔެކިޔުމަކާއި ޑޭޓާއަކާ އެއްކޮށް އެ ދިޔައީ، ހާއްސަކޮށް އަޅުގަނޑުމެންގެ ސާވާ، ސަލާމަތް ނުކުރެވޭނެ ކަމަށް މިހާރު އަންދާޒާ ކުރެވެނީ، އެހެންވެއްޖެ ކަމަށް ވެއްޖެއްޔާ އެއީ ވަރަށް ބޮޑު ގެއްލުމެއް، އެއީ އަޅުގަނޑުމެންގެ އަތުގައި ހުރި ހުރިހާ މައުލޫމާތެއް ގެއްލިގެން އެދިޔައީ،" ހައިދަރު ވިދާޅުވި އެވެ.
އޭނާ ވިދާޅުވީ ހައުސިން މިނިސްޓްްރީގެ ހުރިހާ މުވައްޒަފުންގެ މައުލޫމާތާއި އެ މިނިސްޓްރީން ހިންގަމުންދިޔަ ހުރިހާ މަޝްރޫއުތަކެއް މައުލޫމާތު ވެސް ހުންނާނީ އެ ސާވާގައި ކަމަށެވެ. އެ ސާވާއަށް އެކްސެސް ނުލިބިއްޖެ ނަމަ ދެން އެ މައުލޫމާތުތައް ލިބޭނެ ގޮތެއް ނޯންނާނެ ކަމަށް ހައިދަރު ވިދާޅުވި އެވެ.
"ހުރިހާ މުވައްޒަފުންގެ މައުލޫމާތާއި އަދި އަޅުގަނޑުމެން ކުރަމުން ގެންދިޔަ ހުރިހާ މަޝްރޫއުތަކެއްގެ މައުލޫމާތު ވެސް ހަމަ ރައްކާ ކުރެވިފައި ހުންނާނީ ސާވާގައި، އެ ސާވާއަށް އެކްސެސް ނުލިބޭ ކަމަށްވަންޏާ އަޅުގަނޑުމެންނަކަށް އެ މައުލޫމާތެއް އަލުން ހޯދޭނެ ގޮތެއް ނޯންނާނެ، ދެން ހުރިހާ ލިޔެކިޔުމެއް ވެސް އަނދައި ދިޔައީ،" ހައިދަރު ވިދާޅުވި އެވެ.
ހައިދަރު އެހެން ވިދާޅުވި ފަހުން ބޭއްވި ނޫސްވެރިންގެ ބައްދަލުވުމެއްގައި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތޮލިބު ވިދާޅުވީ ބައެއް ޑޭޓާތައް އެބަހުރި ކަމަށެވެ. ހާއްސަކޮށް ރައްޔިތުންގެ ބޯހިޔާވަހިކަމާ ގުޅުންހުރި މުހިންމު މައުލޫމާތުތައް ރައްކާތެރިކުރެވިފައިވާ ކަމަށް އޭނާ ވިދާޅުވި އެވެ.
