މިދިޔަ ބުރާސްފަތި ދުވަހު ތިން މިނިސްޓްރީއެއް އަނދާ އަޅިއަށްވި އަލިފާނުގެ ހާދިސާއާ ގުޅޭ ތަހުގީގުތަކެއް ހިންގުމަށް ފުލުހުންނާއި އިންޓެގްރިޓީ ކޮމިޝަނުގައި އެމްޑީޕީން ހުށަހަަޅަން ނިންމައިފި އެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ލީގަލް ޑައިރެކްޓަރު މަހްފޫޒް ސައީދު ވިދާޅުވީ އަލިފާނުގެ ހާދިސާއާ ގުޅިގެން ޖިނާއީ މައްސަލައެއް ގޮތުގައި އެ މައްސަލަ ތަހުގީގުކޮށް އެކަން ހިނގި ގޮތް ދެނެ ގަންނަން ސިފައިންގެ އެހީތެރިކަން ހޯދުމަށް ފުލުހުންގެ އިދާރާގައި އެދި ސިޓީއެއް ފޮނުވާނެ ކަމަށެވެ.
"ފުރަތަމަ ކަމަކަށް މި ހާދިސާގައި މިނިވަން ތަހުގީގެއް ހިންގުމަކީ މުހިންމު ކަމެއް ކަމަށް ފެނޭ. އެކަމަށް އެދި އަޅުގަނޑުމެން ފުލުހުންނަށް ރިކުއެސްޓެއް އެބަ ކުރަން ޖިނާއީ މައްސަލައެއް ގޮތުގައި މައްސަލަ ތަހުގީގު ކޮށްދިނުމަށް ހާދިސާ ހިނގާފައި ވަނީ ކިހިނެއްތޯ ހޯދުމާ އެކީގައި. އަދި އޭގައި ސިފައިންގެ އެހީތެރިކަމަށް އެދުމާއި ސިފައިން ބައިވެރި ކުރުން އެއީ ވެސް އަޅުގަނޑުމެން އެދޭ ކަމެއް،" މަހުފޫޒް ވިދާޅުވި އެވެ.
އަލިފާނުގެ ހާދިސާގައި އިހުމާލުގެ އަމަލުތައް ފާހަަގަ ކުރެވޭތީ އެކަން ބަލައި ދިނުމަށް އިންޓަގްރިޓީ ކޮމިޝަންގައި އެދޭނެ ކަމަށް ވެސް މަހްފޫޒް ވިދާޅުވި އެވެ.
މަހްފޫޒް ވިދާޅުވީ އަލިފާނުގެ ހާދިސާގައި މިނިސްޓްރީތަކުން ގެއްލުނު ލިޔުންތަކަކީ އަރުޝީފުގެ ގާނޫނުގެ ދަށުން އަރުޝީފު ކުރެވިފައި ހުރި ތަކެތިތޯ ބެލުމަށް އަރުޝީފުގެ ޑިރެކްޓަރުގެ އަރިހުން ވެސް އެދޭނެ ކަމަށެވެ.
"މިނިސްޓަރު ފާހަގަ ކުރެއްވީ މިނިސްޓްރީން މިހާރު ފައްޓަވާފައި ހުރި މަޝްރޫއުތަކާ ގުޅޭ ހުރިހާ ލިޔެކިޔުންތަކެއް ގެއްލިގެން ގޮސްފައިވާ ކަމަށް. އެ ލިޔުންތަކަކީ އެއީ މި މާއްދާ ބަޔާންކުރާ ގޮތުން އަރުޝީފު ކުރެވެން ޖެހޭ އެއްޗެއް. އެހެންވީމަ އަރުޝީފު ކުރެވެން ޖެހޭ އެއްޗެއް އަރުޝީފު ނުކޮށް ހުރީތޯ ނޫނީ، އަރުޝީފު ކުރެވިފައި ހުއްޓާ އޭގެ ނަކަލުތައް ގެއްލިގެން ދިޔައީތޯ މިކަންކަން ބަލައި ތަހުގީގު ކުރުމަށް އަޅުގަނޑުމެން އަރުޝީފުގެ ޑިރެކްޓަރުގެ އަރިހުން އެދޭނަން،" މަހްފޫޒް ވިދާޅުވި އެވެ.
އޭގެއިތުރުން މަހްފޫޒް ވިދާޅުވީ މައްސަލަ ތަހުގީގު ކުރުމަށް ބޭރުގެ ތަޖުރިބާކާރުންގެ އެހީ ހޯއްދެވުމަށް ސަރުކާރުން ނިންމިއިރު، ހާދިސާ ހިނގި ސީން ރޫޅާލައި އެތަން ސާފު ކުރުމުން ސުވާލު އުފެދޭ ކަމަށެވެ.
އެގޮތުން އަލިފާނުގެ ހާދިސާއަކީ ބަޔަކު ގަސްތުގައި ކުރި ކަމަކަށްވާނަމަ، އެތަން ސާފު ކުރުމަކީ ހެކި ނައްތާލުމުގެ އަމަލެއް ކަމަށާއި އެކަމާ ގުޅިގެން ކަންބޮޑުވާ ކަމަށް މަހްފޫޒް ފާހަގަ ކުރެއްވި އެވެ.
ބުރާސްފަތި ދުވަހު ހިނގި އަލިފާނުގެ ހާދިސާގައި އަނދައި އަޅިއަށްވީ ހައުސިން މިނިސްޓްރީ، ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީ އެވެ. އެ ތިން ތަނުގެ ހިދުމަތްތައް ދަރުބާރުގޭގައި އަލުން ވަނީ ފަށާފަ އެވެ.
