މާލެއިން އައްޑޫއަށް ވައިގެ މަގުން މަސްތުވާތަކެތި ގެންދަން ފުރަން ގޮސް ހުއްޓާ އޮގަސްޓު މަހު އަތުލައިގަތް މީހަކު 12 އަހަރަށް ޖަލަށް ލުމަށް ކްރިމިނަލް ކޯޓުން ހުކުމް ކޮށްފި އެވެ.
މި މައްސަލާގައި އޮގަސްޓު 7، ގެ ރޭ ވެލާނާ އިންޓަނޭޝަނަލް އެއާޕޯޓުން ހައްޔަރުކުރީ ގދ. މަޑަވެލި، އުދަރެސް، ސަހާ ވަހީދު، 30، އެވެ. އޭނާ ފުރަންގޮސް ހުރީ މޫނުބުރުގާ އަޅައިގެންނެވެ.
ފުލުހުންނާ ހަވާލާދީ ކޯޓު ހުކުމުގައި ބުނެފައިވާ ގޮތު ގޮތުގައި ފުރަން ގޮސް ހުއްޓާ ސަހާ ހުއްޓުވާ ބަލާފާސްކުރުމުން އޭނާ ލައިގެން ހުރި ޖިންސާއި އުނަގަނޑާ ދޭތެރެއިން 202 ގުރާމުގެ ޑައިމޯފިން އަޅާފައިހުރި ރަބަރު ޕެކެޓުތަކެއް ފެނުނު ކަމަށެވެ.
ހައްޔަރާއެކު ކޯޓުން ބަންދުގެ މުއްދަތު އިތުރުކުރަމުންގޮސް ހުކުމް ކުރުމާ ހަމައަށްވެސް އޭނާ ހުރީ ބަންދުގަ އެވެ. ކްރިމިނަލް ކޯޓުން މިދިޔަ ބުދަ ދުވަހު ކުރި ހުކުމުގައިވާ ގޮތުން މި މައްސަލާގައި އޭނާ ކުރިއަށްދިޔައީ ވަކީލެއްގެ އެހީތެރިކަމަކާ ނުލަ އެވެ.
އަދި، މަސްތުވާތަކެތި ޓްރެފިކް ކުރިކަމަށް އެއްބަސްވެ ސަހާ ވަނީ ގާނޫނުގައި ބުނާ 25 އަހަރުގެ ޖަލު ހުކުމް ލުއިވާނެހެން ދައުލަތާއެކު އިއުތިރާފުގެ އެއްބަސްވުމެއް ހަދާފަ އެވެ.
މި އެއްބަސްވުމުގެ ދަށުން ކްރިމިނަލް ކޯޓުން ސަހާގެ މައްޗަށް ކުށް ސާބިތުވާކަމަށް ކަނޑައަޅާ އިއްވާފައިވަނީ 12 އަހަރާއި ހަ މަސްދުވަހުގެ ޖަލު ހުކުމެކެވެ. އަދި އަހަރެއްތެރޭ ދައްކަން ޝަރުތުކޮށް އޭނާގެ ވަނީ 50،000ރ. އިން ޖޫރިމަނާ ވެސް ކޮށްފަ އެވެ.
ހައްޔަރަށްފަހު ބަންދުގައި ހުރި މުއްދަތު މި ޖަލު ހުކުމުން އުނިކުރުމަށްވެސް ގާޒީ ވަނީ ހުކުމްކޮށްފަ އެވެ. އެހެންކަމުން ޝަރީއަތް ނިމެން ނެގި ހަތަރު މަހާއި ތިން ދުވަސް ޖަލު ހުކުމުން ވަނީ އުނިވެފަ އެވެ.
