މި އަހަރަށް ސަރުކާރުން ކަނޑައެޅި ދެ މިލިއަން ފަތުރުވެރިންގެ ޓާގެޓަށް ވާސިލްވުމަށް ބާކީ 80،000 އާ ހަމައަށް ގޮސްފި އެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން އިއްޔެއާ ހަމައަށް ރާއްޖެ އައިސްފައިވަނީ 1.92 މިލިއަން ފަތުރުވެރިންނެވެ. މިއީ މިދިޔަ އަހަރުގެ މި މުއްދަތާ އަޅާ ބަލާނަމަ 8.9 އިންސައްތައިގެ އިތުރުވުކެވެ.
ޑިސެމްބަރު މަހުގެ ކުރީކޮޅު ފަތުރުވެރިން އަންނަ މިންވަރު މަދުވެ، މި މަހުގެ ފުރަތަމަ ނުވަ ދުވަހު އައި ފަތުރުވެރިންގެ އަދަދު މިދިޔަ އަހަރަށްވުރެ މަދުވި ނަމަވެސް މިހާރު އެ ނަމްބަރުތައް ވަނީ އިތުރުވެފަ އެވެ. މި މަހު މިހާތަނަށް އައި ފަތުރުވެރިންގެ އަދަދު، މިދިޔަ އަހަރުގެ ޑިސެމްބަރު މަހުގެ މި މުއްދަތާ އަޅާބަލާއިރު އުޅެނީ 3.3 އިންސައްތަ ކުރީގަ އެވެ.
ތަފާސްހިސާބުތައް ދައްކާގޮތުން، މި މަހުގެ ބާކީ އޮތް 16 ދުވަހުގެ ތެރޭގައި ޓޫރިސްޓު އެރައިވަލް ޓާގެޓު ހާސިލުކުރުމަށް އަންނަން ޖެހެނީ 80،000 އެއްހާ ފަތުރުވެރިންނެވެ. އެއީ ދުވާލެއްގެ މައްޗަށް އެވްރެޖުކޮށް 5،000 ފަތުރުވެރިންނެވެ.
މި މަހު ދުވާލަކަށް އެވްރެޖުކޮށް 5،690 ފަތުރުވެރިން އަންނަމުންދާއިރު މަހުގެ ފަހުކޮޅު އަންނަ ފެސްޓިވް ސީޒަނާއެކު ފަހު ހަފުތާގެ ތެރޭގައި ދެ މިލިއަން ޓޫރިސްޓުން ހަމަވާނެ ކަމަށް ބެލެވެ އެވެ.
ވަކިވަކި ގައުމުތަކަށް ބަލާއިރު މި އަހަރު އެންމެ ގިނައިން ފަތުރުވެރިން އައީ ޗައިނާއިންނެވެ. އެ ގައުމުން މިހާތަނަށް 257،794 ފަތުރުވެރިން އައިސްފައިވާއިރު މިއީ 77،270 މީހުންގެ އިތުރުވުމެކެވެ.
އެންމެބޮޑު ވެއްޓުމެއް ފެނިގެންގޮސްފައިވަނީ އިންޑިއާ މާކެޓުންނެވެ. އެއީ 72،203 މީހުންގެ މަދުވުމެކެވެ. މި ވެއްޓުމުން އަރައިގަތުމަށް ސަރުކާރާއި ޓޫރިޒަމް މިނިސްޓްރީން ވަރަށް ގިނަ މަސައްކަތް ކޮށްފައިވެ އެވެ. އެ މަސައްކަތްތަކާއެކު އަހަރުގެ ފަހުކޮޅު އެ ގައުމުން އަންނަ ފަތުރުވެރިންގެ އަދަދު ވަނީ އިތުރުވެފަ އެވެ.
