ސިޔާސީ މަސްރަހާ ބެހޭ ގޮތުން މައުލޫމާތު ދިނުމަށް އެމްޑީޕީގެ ޗެއާޕާސަން ފައްޔާޒް އިސްމާއިލް އިންޑިއާ އަދި ޖަރުމަނަށް ކުރައްވާ ދަތުރުފުޅެއްގައި ފުރާވަޑައިގެންފި އެވެ.
އެމްޑީޕީން ބުނީ ފައްޔާޒް އިންޑިއާ އަދި ޖަރުމަނަށް ކުރައްވާ ދަތުރުފުޅުގައި ރާއްޖޭގެ ސިޔާސީ މަސްރަހާ ބެހޭ ގޮތުން އެ ގައުމުތަކުގެ އެންޖީއޯތަކަށް ވެސް މައުލޫމާތު ދޭނެ ކަމަށެވެ.
މީގެ ކުރިން ވެސް ފައްޔާޒް ވަނީ އެމްޑީޕީ ތަމްސީލު ކުރުމަށް ބޭރަށް ފުރާވަޑައިގެން، ބޭރުގެ އެކި ފަރާތްތަކަށް ރާއްޖޭގެ ސިޔާސީ މަސްރަހާ ބެހޭ ގޮތުން މައުލޫމާތު ދީ، ކަންބޮޑުވުންތައް ހިއްސާ ކޮށްފަ އެވެ.
މިދިޔަ ޖޫން މަހުއިންޓަނޭޝަނަލް ޑިމޮކްރެޓިކް ޔޫނިއަން (އައިޑީޔޫ) ގެ ސިސްޓާ ޕާޓީ، ލިބަރަލް ޕާޓީގެ އަހަރީ ކޮންފަރެންސްގައި ބައިވެރިވުމަށް، އެ ކޮންވެންޝަންގެ ދައުވަތަކަށް އޮސްޓްރޭލިއާއަށް އެމްޑީޕީގެ ފަރާތުން ފައްޔާޒް ބައިވެރިވެވަޑައިގެންނެވި އެވެ.
އެމްޑީޕީގެ ލީޑާޝިޕްގައި ހިމެނޭ އެކި ފަރާތްތަކުން ރާއްޖެއިން ބޭރަށް ގޮސް ރާއްޖޭގައި ހުރި ކަންބޮޑުވުންތަކުގެ ވާހަކަ ބޭރުގެ އެކި ފަރާތްތަކާ ދަނީ ހިއްސާ ކުރަމުންނެވެ.
