ސަރުކާރުން ޓެކްސީގެ ހިދުމަތް ދިނުމަށް ތައްޔާރުވަމުންދާތީ އެކަމާ ދެކޮޅަށް މުޒާހަރާކުރި ޓެކްސީ ޑްރައިވަރުން ތެރެއިން ތިން މީހަކު ހައްޔަރުކޮށް، 21 ޓެކްސީއެއް ފުލުހުންގެ ބެލުމުގެ ދަށަށް ގެންދިޔުމުން އެންމެ ބޮޑު އިދިކޮޅު ޕާޓީ، އެމްޑީޕީން އެކަން ކުށްވެރިކޮށްފި އެވެ.
އިއްޔެގެ މުޒާހަރާއިން ހައްޔަރުކުރި 3 މީހުންގެ ތެރެއިން އެކަކު މިއަދު ދޫކޮށްލައި އަނެއް ދެ މީހުންގެ ބަންދަށް ހުޅުމާލޭ ކޯޓުން ވަނީ ފަސް ދުވަސް ޖަހައިފަ އެވެ.
މި ޑްރައިވަރުންނަކީ ރޭވިގެން މުޒާހަރާކޮށްފައިވާ ބަޔަކަށްވާތީ، އެމީހުންނަކީ މުޖުތަމައުގެ ސަލާމަތަށް ނުރައްކާތެރި ބައެއް ކަމަށް ކޯޓުގައި ފުލުހުން ބުނެފައިވެ އެވެ.
"އެއްވެ އުޅުމާއި ސުލްހަވެރި އިޖުތިޖާޖުކުރުމާއި، ހަޅުތާލުކުރުމުގެ ގޮތުން މަސައްކަތް ހުއްޓާލައިގެން ތިބުމަކީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ ދަށުން ކަށަވަރުކޮށްދީފައިވާ އަސާސީ ހައްގެކެވެ. ސަރުކާރުން އަމިއްލަ ވިޔަފާރިއެއްގެ ތެރެއަށް ވަދެ، ޓެކްސީގެ ހިދުމަތްދޭ ފަރާތްތަކުގެ ވިޔަފާރި ހުއްޓިގެންދާނޭ ގޮތަށް ރާވާފައިވާ ރޭވުން ތަންފީޒުވެއްޖެނަމަ ޓެކްސީ ޑްރައިވަރުންނަށް ލިބޭ އާމްދަނީ ހުއްޓިގެން ހިނގައިދާނޭތީ ޓެކްސީ ޑްރައިވަރުން ގެންދިޔައީ އެކަން ހުއްޓާލުމަށް ސަރުކާރަށް ގޮވާލުމަށް ސުލްހަވެރި އެއްވުމެއް ބާއްވައި އިހުތިޖާޖުކުރަމުންނެވެ،" އެމްޑީޕީން ބުންޏެވެ.
ރޭ ޓޯކުރި ޓެކްސީތައް ހިފަހައްޓާފައިވަނީ 30 ދުވަހަށް ކަމަށް އެމްޑީޕީން ބުނެ އެވެ.
ޓެކްސީ ޑްރައިވަރުންނަކީ ދުވަހުން ދުވަހަށް ލިބޭ އާމްދަނީއަށް ބަރޯސާވެގެން ދިރިއުޅޭ ބައެއް ކަމަށްވާއިރު، 21 ޓެކްސީއެއް 30 ދުވަހުގެ މުއްދަތަށް ހިފެހެއްޓުމަކީ 21 އާއިލާގެ އާމްދަނީ ހުއްޓުވައިލުން ކަމަށާއި އެއްގަމު ދަތުރުފަތުރުގެ ގާނޫނުގެ 63 ވަނަ މާއްދާގައި ބުނާ ގޮތުން ނުރައްކާތެރިކޮށް އެއްގަމު އުޅަނދު ދުއްވައިގެން 30 ދުވަހަށް އުޅަނދު ހިފެހެއްޓުމަކީ އެމާއްދާގައި ބުނެފައިވާ އަދަބު ތަކުގެ އިތުރުން ފުލުހުންނަށް އޮންނަ އިހުތިޔާރީ ކަމެއް ކަމަށް އެމްޑީޕީން ބުނެ އެވެ.
އެހެންވެ، އެ މާއްދާގައި ބަޔާންކޮށްފައި ވާގޮތުން ފުރަތަމަ ފަހަރު ނަމަ 2000 ރުފިޔާއިން ޖޫރިމަނާ ވެސް ކުރެވޭނެ ކަމަށް އެމްޑީޕީން ބުނެ އެވެ.
"ލުއި އަދަބެއް ކަނޑައެޅިފައި އޮއްވައި، އެންމެ ހަރުކަށި އަދަބު އިހުތިޔާރުކޮށްފައިވަނީ ޓެކްސީ ޑްރައިވަރުން ކުރަމުންދާ ސުލްހަވެރި އިހުތިޖާޖު ހުއްޓުވާލައި، އެ އާއިލާތަކަށް ގެއްލުން ދިނުމުގެ ނިޔަތުގައިކަމަށް ދެކެމެވެ،" އެމްޑީޕީގެ ބަޔާނުގައިވެ އެވެ.
އިހުތިޔާރުކުރާ ވަޒީފާއެއް އަދާކުރުމާއި، މަސައްކަތްކޮށްގެން އާމްދަނީ ހޯދުމަކީ ގާނޫނުއަސާސީން ކަށަވަރުކޮށްދީފައިވާ ހައްގެއް ކަމަށާއި އާމްދަނީ ހޯދުމަށްޓަކައި ބޭނުންކުރާ ވަސީލަތްތައް ހިފެހެއްޓުމަކީ، މި މާއްދާގެ ދަށުން ލިބިދޭ އަސާސީ ހައްގަކަށް ހުރަސް އެޅުމުގެ އަމަލެއް ކަމަށް ވެސް އެމްޑީޕީން ދެކެ އެވެ.
ހައްޔަރު ކުރި ޓެކްސީ ޑްރައިވަރުންނަށް އެމްޑީޕީގެ ފަރާތުން ގާނޫނީ ވަކީލުންގެ އެހީތެރިކަން ފޯރުކޮށްދެމުންދާ ކަމާއި، ޓެކްސީ ޑްރައިވަރުންގެ އުޅަނދުތައް އަނބުރާ ހޯދުމަށް ކުރަންޖެހޭ ގާނޫނީ މަސައްކަތް ވެސް އެ ޕާޓީގެ ގާނޫނީ ވަކީލުންގެ ޓީމުން ކުރަމުންގެންދާ ކަމަށް ވެސް ބުނެފައިވެ އެވެ.
