ހުޅުމާލެއިން މާލެ އަންނަން އޮންނަ ހައިވޭއަށް އަރާ މަގު ބަންދުކޮށް، މުޒާހަރާ ކުރި މައްސަލައިގައި ހައްޔަރުކުރި ތިން ޓެކްސީ ޑްރައިވަރުންގެ ތެރެއިން ދެ މީހުންގެ ބަންދަށް ފަސް ދުވަސް މިއަދު ޖަހައިފި އެވެ.
"އަދަދު" އަށް އެނގިފައި ވާގޮތުގައި ރޭގެ މުޒާހަރާއާ ގުޅިގެން ހައްޔަރު ކުރީ މުހައްމަދު ޝާމިން އާއި އަހުމަދު ޝަބީން އާއި ނޫމާން އަހުމަދު ކިޔާ ތިން ޑްރައިވަރުންނެވެ. އޭގެތެރެއިން ނޫމާން އަހުމަދު ދޫކޮށްލައި އަނެއް ދެމީހުން ފަސް ދުވަހަށް ބަންދުކުރަން އަމުރު ކުރީ ހުޅުމާލެ މެޖިސްޓްރޭޓް ކޯޓުންނެވެ.
ދެ ޑްރައިވަރުންނަށް ބަންދުގެ މުއްދަތު ކޯޓުން ޖެހީ މުޖުތަމައުގެ ސަލާމަތަށް ނުރައްކާ ވެދާނެ ކަމަށް ބުނެ އެވެ.
ސަރުކާރާމެދު ހިތްހަމަ ނުޖެހިފައި ތިބި ގިނަ އަދަދެއްގެ ޓެކްސީ ޑްރައިވަރުން، އާމްދަނީ ހޯދުން ވަގުތީ ގޮތުން ހުއްޓައިލުމަށް ފަހު، ހުޅުމާލެ ނިރޮޅުމަގު ކޮޅުގައި ކާރުތައް ޕާކުކޮށް އެ މަގު ބަންދު ކުރީ ރޭގެ 9:00 ހާއިރު އެވެ.
އޭގެ ކުޑަ ވަގުތުކޮޅެއް ފަހުން ފުލުހުން އެ ސަރަހައްދަށް ގޮސް މުޅި މަގު ކޮންޓްރޯލްގެ ދަށަށް ގެންދިޔަ އެވެ.
އެ ސަރަހައްދު ކޮންޓްރޯލް ކުރުމަށް ފުލުހުން މަސައްކަތް ކުރި ވަގުތު ޓެކްސީ ޑްރައިވަރުންނާއި ފުލުހުންނާ ދެމެދު ކޮންމެވެސް ވަރެއްގެ ހަމަނުޖެހުންތަކެއް ވެސް ހިނގި އެވެ.
އެއަށްފަހު ފުލުހުން ވަނީ މަގު ބަންދުކުރި ޓެކްސީތައް ހައިވޭއަށް އެެރިޔަ ނުދީ، ނިރޮޅުމަގު ކޮޅުން ހުޅަނގަށް ގެންގޮސް ވިލާ ޕެޓްރޯލް ޝެޑު ކައިރީގައި ޓެކްސީތައް ހިފަހައްޓައިފަ އެވެ.
އެ ސަރަހައްދުގައި ތިބި "އަދަދު" ގެ ނޫސްވެރިން ބުނީ ވިލާ ޕެޓްރޯލް ޝެޑު ކައިރީގައި ހިފެހެއްޓި ކާރުތައް ޓޯކޮށް ނިމުނީ ރޭ 11:40 ހާއިރު ކަމަށެވެ. 20 އަށްވުރެ ގިނަ ޓެކްސީ ފުލުހުން ޓޯކުރި ކަމަށް މި ނޫހުގެ ނޫސްވެރިން ބުންޏެވެ.
ބައެއް ޓެކްސީތައް ޓޯ ކުރަން ފުލުހުންގެ ފޯކްލިފްޓު ބޭނުން ކުރި ނަމަވެސް ގިނަ ޓެކްސީތައް ޓޯ ކުރީ ފުލުހުންގެ ބެލުމުގެ ދަށުން ދުއްވާފައި ގެންގޮހެވެ.
ނިރޮޅުމަގު ބަންދުކޮށް ޓެކްސީ ޑްރައިވަރުން މުޒާހަރާ ކުރީ ސަރުކާރުން ޓެކްސީ ލައިނެއް ތައާރަފުކޮށް ޓެކްސީގެ ހިދުމަތް ދޭން މަސައްކަތް ކުރަން ފެށުމުންނެވެ.
ސަރުކާރުން ޓެކްސީ ހިދުމަތް ދޭން ފަަށަން ނިންމާފައިވާކަން އެންމެ ފުރަތަމަ ސަރުކާރުން އިއުލާނު ކުރީ ޖުލައި 25، ގައި އޮތް ރަސްމިއްޔާތެއްގަ އެވެ. ނަމަވެސް އެކަމާ ދެކޮޅަށް ޓެކްސީ ޑްރައިވަރުން ނުކުމެ އިހުތިޖާޖު ކުރުމުން އޯގަސްތު 4، ގައި ސަރުކާރުގެ ނިންމުން ބަދަލުކުރި އެވެ.
އެއަށްފަހު ޓެކްސީގެ ހިދުމަތް ދޭން ފަށަން އަލުން ނިންމައި ޓްރާސްޕޯޓު މިނިސްޓަރު، މުހައްމަދު އަމީން އެކަން ހާމަ ކުރެއްވީ ރައްޔިތުންގެ މަޖިލީހުގެ އިގުތިސާދީ ކޮމިޓީގައި ވާހަކަދައްކަވަމުން މިދިޔަ އޮކްޓޫބަރު 29 ގަ އެވެ.
އަމީން އެ ދުވަހު ވިދާޅުވީ ސަރުކާރުގެ ވިސްނުން ހުރީ ޓެކްސީ ހިދުމަތް ސަރުކާރު ހިއްސާވާ ކުންފުންޏެއް މެދުވެރިކޮށް ކުރުވުމަށް ކަމަށެވެ.
