ވިޔަފާރިތަކަށް ހާއްސަ ކޮށްގެން ހުޅުމާލޭގައި ތަރައްގީކުރަން ޗައިނާގެ ކުންފުންޏަކާ ހަވާލުކޮށްފައިވާ "ކޮމާޝަލް ސްޕައިން" މަޝްރޫއުގެ އެއްބަސްވުމުގައި ސޮއިކުރިތާ އަހަރަކަށް ވުރެ ގިނަ ދުވަސްވީއިރު ވެސް އެ މަސައްކަތް ނުފަށާ ކަން "އަދަދު" އަށް އެނގިފައިވާ ކަމަށް އިއްޔެ ރިޕޯޓުކުރި އެވެ.
ގާތްގަނޑަކަށް 50 މިލިއަން ޑޮލަރު (771 މިލިއަން ރުފިޔާ) ހަރަދުކޮށްގެން ހިންގާ މި މަޝްރޫއުގެ ކޮންޓްރެކްޓަރަކީ ޗައިނާގެ "ހުނާން ނަމްބާ ސިކްސް އިންޖިނިއަރިން ކޯޕަރޭޝަން ލިމިޓެޑް" އާ އެވެ.
ޗައިނާ ކުންފުންޏާ އެކީ މި މަސައްކަތް ކުރުމުގެ ފަހުމުނާމާގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ސޮއިކުރީ ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ރަސްމީ ދަތުރުގެ ތެރެއިން ބޭއްވި އިންވެސްޓާ ފޯރަމްގައި، މި އަހަރުގެ ޖެނުއަރީ 9، ގަ އެވެ.
އިތުބާރު ހުރި މަސްދަރުތަކުން މި ނޫހަށް މައުލޫމާތު ދިން ގޮތުގައި، ޗައިނާ ކުންފުންޏާއެކީ އެއްބަސްވުމައިގެން ކުރިއަށް ދާން އެޗްޑީސީގެ ބޯޑުން ނިންމީ އޭގެ ދެ ދުވަސް ކުރިން، ޖެނުއަރީ 7، ގަ އެވެ.
