ޓޫރިޒަމް ވިޔަފާރިތަކާއި 15 މިލިއަނަށްވުރެ މަތިން އާމްދަނީ ލިބޭ އެހެން ވިޔަފާރިތަކުން ރާއްޖޭގެ ބޭންކުތަކަށް ޑޮލަރު މާރުކުރަން މަޖުބޫރުވާނެހެން ސަރުކާރުން އެކުލަވާލާ ހުށަހެޅި ބިލުގެ ކޮމިޓީ މަސައްކަތް މިއަދުން މިއަދަށް ނިންމާ، އެ މަސައްކަތްކުރާ ބައްދަލުވުން ސިއްރުކޮށްފި އެވެ.
މިހާރު ކުރިއަށްދާ މަޖިލީހުގެ މާލިއްޔަތު ކޮމިޓީގެ ބައްދަލުވުމުގައި ބިލުގެ މަސައްކަތް މިއަދު 6:00 ގެ ކުރިން ނިންމަން ހުށަހެޅުއްވީ ބާރަށު ދާއިރާގެ މެންބަރު އިބްރާހިމް ޝުޖާއު އެވެ. މެންބަރުންގެ އަގުލަބިއްޔަތުން ފާސްވި މި ހުށަހެޅުމަށް ތާއީދުކުރެއްވީ ފުވައްމުލަކު އުތުރު ދާއިރާގެ މެންބަރު ހަމަދު އަބްދުﷲ އެވެ.
ބޭރުފައިސާއާ ބެހޭ ބިލުގެ މަސައްކަތުގެ ތެރެއިން މިއަދުގެ އެޖެންޑާގައި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ހާޒިރުކުރުން ވެސް އެބައޮތެވެ. ބައްދަލުވުން ފެށުމުގެ ކުރިން ރިޔާސަތުގައި އިންނެވި އޭދަފުށީ ދާއިރާގެ މެންބަރު އަހުމަދު ސަލީމް ވަނީ ބައްދަލުވުން ސިއްރުކުރަން މަޓީން އެދިފައިވާ ކަމަށް ވިދާޅުވެފަ އެވެ.
މިއާއެކު ބައްދަލުވުން ސިއްރުކުރަން ހުށަހެޅުއްވީ ވެސް ޝުޖާއު އެވެ. މި ހުށަހެޅުން ވެސް ފާސްވި ކޮމިޓީ މެންބަރުންގެ އިއްތިފާގުންނެވެ.
މި ބިލު މަޖިލީހަށް ހުށަހެޅީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާންމުކުރި ބޭރުފައިސާއާ ބެހޭ ގަވާއިދު އަދި އާންމުންގެ ހިޔާލަށް ހުޅުވާލި މި ބިލުގެ ޑްރާފްޓަށް ވެސް ބަދަލުތަކެއް ގެނައުމަށް ފަހެވެ.
އެގޮތުން، މަޖިލީހަށް ހުށަހަޅާފައިވާ ބިލުގައި ވަނީ "ކެޓެގަރީ އޭ" ގެ ޓޫރިޒަމް އެސްޓެބްލިޝްމަންޓުތަކުގެ ތެރޭގައި ހިމެނޭ ރިސޯޓުތަކަށް ޑޮލަރު މާރުކުރަން ދެ ގޮތުގެ ތެރެއިން އެއް ގޮތެއް އިހުތިޔާރުކުރަން ހިމަނާފަ އެވެ. އެއީ އަންނަ ކޮންމެ ޓޫރިސްޓަކަށް 500 ޑޮލަރު މާރުކުރުން ނުވަތަ މަހެއްގެ މައްޗަށް ލިބޭ އާމްދަނީގެ 20 ޕަސެންޓު މާރުކުރުމެވެ. ކުރިން އޮތް ގޮތުންނަމަ އޭ ކެޓަގަރީގެ ތަންތަނުން 500 ޑޮލަރު މާރުކުރުން ނޫން ގޮތެއް ނެތެވެ.
ރިސޯޓުތަކުގެ އިތުރުން "ކެޓެގަރީ ބީ" ގައި ހިމެނޭ ޓޫރިޒަމް އެސްޓެބްލިޝްމަންޓުތަކަށް، އެއީ ޓޫރިސްޓު އުޅަނދުތަކާއި ގެސްޓުހައުސްތަކާއި ހޮޓާތަކަށް، ވެސް އާމްދަނީގެ 20 ޕަސެންޓު މާރުކުރުމުގެ އިހުތިޔާރު ލިބެ އެވެ. ޑްރާފްޓު ކުރި ބިލުގައި އަދި މިހާރު އަމަލުކުރަމުން އަންނަ ބޭރު ފައިސާގެ ގަވާއިދުގައި އޮތީ އެއިން ތަނަކަށް އަންނަ ކޮންމެ ޓޫރިސްޓަކަށް 25 ޑޮލަރު މާރުކުރަން ޖެހޭ ގޮތަށެވެ.
ބޭރު ފައިސާއާ ބެހޭ ބިލުގައި ފާހަގަކޮށްލެވޭ އިތުރު ބަދަލެއްގެ ގޮތުގައި ޓޫރިސްޓު ވިޔަފާރިތައް ނޫން ވިޔަފާރިތަކުގެ ތެރެއިން ބޭރު ފައިސާއިން އާމްދަނީ ލިބޭ ވިޔަފާރިތަކުން މާރުކުރަން ޝަރުތުހަމަވާ ވިޔަފާރިތަކަށް ގެނައި ބަދަލެވެ.
އާންމުންނާއި މަސްލަހަތުވެރިންގެ ހިޔާލަށް ހުޅުވާލި ބޭރު ފައިސާއާ ބެހޭ ބިލުގެ ޑްރާފްޓުގައި އޮތީ 20 މިލިއަން ޑޮލަރުން މަތިން އާމްދަނީ ލިބޭ ވިިޔަފާރިތަކަށް މަހެއްގެ މައްޗަށް ލިބޭ އާމްދަނީގެ 25 ޕަސެންޓު މާރުކުރަން ހުށަހަޅާފަ އެވެ. ނަމަވެސް މަޖިލީހަށް ހުށަހަޅާފައި އޮތް ބިލުގައި އޮތީ 15 މިލިއަން ޑޮލަރުން މަތިން އާމްދަނީ ލިބޭ ހުރިހާ ވިޔަފާރިތަކުން އާމްދަނީގެ 20 ޕަސެންޓު މާރުކުރަން ޖެހޭ ގޮތަށެވެ.
