"ގާނޫނު އަސާސީގެ ދިފާއުގައި ރައްޔިތުން" ގެ ނަމުގައި އިދިކޮޅު އެމްޑީޕީން މިރޭ ކާނިވަލް ސަރަހައްދުގައި ޖަލްސާއެއް ބޭއްވުމަށް ތައްޔާރުވަމުން ދަނިކޮށް ސިފައިންނާއި ފުލުހުންގެ އިސް ވެރިން ކުއްލި ބައްދަލުވުމެއް ދާދި ދެންމެ ބާއްވައިފި އެވެ.
ބަންޑާރަކޮށީގައި ހަވީރު ބޭއްވި ބައްދަލުވުމުގައި އެމްއެންޑީއެފް އަދި ފުލުހުންގެ އިސްވެރިންގެ އިތުރުން ހޯމްލޭންޑް ސެކިއުރިޓީ މިނިސްޓަރު އަލީ އިހުސާން އަދި ޑިފެންސް މިނިސްޓަރު ގައްސާން މައުމޫން ވެސް ބައިވެރިވެވަޑައިގެންނެވި އެވެ.
ބައްދަލުވުން ނިންމާލުމަށްފަހު އެ ބޭފުޅުން ސިފައިންގެ މައި މަރުކަޒުން ނުކުންނަ މަންޒަރު ފެންނަ ވީޑިއޯއެއްވެސް މި ނޫހަށް ވަނީ ލިބިފަ އެވެ.
މިނިސްޓަރު އިހުސާން ވިދާޅުވީ އެ ބައްދަލުވުމަކީ ވަކި ހާއްސަ ހާލަތެއް މެދުވެރިވެގެން ބޭއްވި ބައްދަލުވުމެއް ނޫން ކަމަށާއި މިރޭގެ ޖަލްސާއާ ބައްދަލުވުމާ ގުޅުމެއް ނެތް ކަމަށެވެ.
"ފުލުހުންނާއި ސިފައިން އަބަދުވެސް މައުލޫމާތު ބަދަލުކޮށް ބައްދަލުކުރޭ،" އޭނާ ވިދާޅުވި އެވެ.
އެމްޑީޕީ ޖަލްސާގެ ތައްޔާރީތައް ރޭ ފެށުމާއެކު ފުލުހުން އެ ސަރަހައްދަށް ގޮސްފައިވެ އެވެ. ރޭ ކުރިއަށް ގެންދިޔައީ މިރެއަށް ވީ ތައްޔާރީތަކެއް ކަމަށް އެ ސަރަހައްދަށް ދިޔަ ފުލުހުން ބުނެފައިވެ އެވެ.
މިރޭގެ ޖަލްސާގައި ބައިވެރިވުމަށް އަތޮޅުތަކުން އެމްޑީޕީގެ އާންމު މެންބަރުން މާލެ އަރާފައިވާއިރު އިދިކޮޅު އެހެން ސިޔާސީ ޕާޓީތަކުގެ މެންބަރުންވެސް ޖަލްސާގައި ބައިވެރިވާނެ ކަމަށް މައުލޫމާތު ލިބިފައިވެ އެވެ.
