ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތުގެ ގްރޫޕް އޭގައި ރޭ ދ. މީދޫ އާއި ހއ. ދިއްދޫ ބައްދަލުކުރި މެޗު 2-2 އިން އެއްވަރުވެ ދެ ޓީމުން ދެ ވަނަ ބުރުގެ ޖާގަ ހޯދަން އިތުރު އިންތިޒާރެއް ކުރަން ޖެހިއްޖެ އެވެ.
ގޯލްޑް ކަޕްގައި މިހާރު ކުރިއަށްދަނީ ފަސް ޓީމު ހިމެނޭ ގްރޫޕް އޭގެ ބާކީ މެޗުތަކެވެ. އެ ގޮތުން، މި ގްރޫޕުން ދެ ވަނަ ބުރުގެ ތިން ޖާގައިގެ ތެެެރެއިން އެއް ޖާގަ ހޯދީ ހަތަރު މެޗުން ވެސް މޮޅުވެ، 12 ޕޮއިންޓް ހޯދައިގެން، ޏ. ފުވައްމުލަކު ސިޓީ އެވެ. ދެ ވަނައިގައި އޮތް ދިއްދޫ އާއި ތިން ވަނައިގައި އޮތް މީދޫ އަށް ވަނީ ހަތަރު ޕޮއިންޓް ލިބިފަ އެވެ. ހަތަރު ވަނައިގައި އޮތް، ދ. ކުޑަަހުވަދޫ އަށް ތިން ޕޮއިންޓް ލިބިފައިވާއިރު، ފުލުގައި އޮތް ގދ. ފަރެސްމާތޮޑާ ތިން މެޗުން ވެސް ބަލިވެ ވަނީ މުބާރާތުން ކަޓައިފަ އެވެ.
މި ގްރޫޕްގައި ބާކީ އޮތީ މީދޫ އާއި ކުޑަހުވަދޫ ކުޅޭ މެޗާއި ދިއްދޫ އާއި ފަރެސްމާތޮޑާ ކުޅޭ މެޗެވެ. މާދަމާ ކުޅޭ މި މެޗުތަކުގެ ނަތީޖާ އިން ދެ ވަނަ ބުރުގެ ފަހު ދެ ޖާގަ ލިބޭނީ، މީދޫ، ދިއްދޫ އަދި ކުޑަހުވަދޫ ތެރެއިން ދެ ޓީމަކަށެވެ.
ގަލޮޅު ދަނޑުގައި ރޭ ކުޅުނު މެޗުގެ 20 ވަނަ މިނިޓްގައި އޭރިއާތެރެއިން ލިބުނު ބޯޅަ ގޯލަށް ވައްދާލައިގެން، ދިއްދޫގެ ހުސެއިން ސިފާހު ވަނީ އެ ޓީމަށް ލީޑުނަގައިދީފަ އެވެ. އޭގެ ހަތަރު މިނިޓް ފަހުން، މީދޫ އަށް އެއްވަރުކޮށްދިނީ، ޒުވާން ގައުމީ ޓީމާއި ޓީސީ ސްޕޯޓްސް ކްލަބަށް ކުޅެފައިވާ އިބްރާހިމް އިމްރާން (އިންމި) އެވެ. ދިއްދޫގެ ހަތަރު ވަރަކަށް ކުޅުންތެރިން ކައިރިން ދެމިގަތުމަށް ފަހު، އިންމި ތިރިތިރިން ފޮނުވާލި ބޯޅަ އަމާޒުވީ ގޯލުގެ ކަނަށެވެ.
ދެ ވަނަ ހާފުގައި މީދޫން ވަނީ ލީޑުނަގައިފަ އެވެ. މި ލަނޑު ޖެހީ، މެޗުގެ 57 ވަނަ މިނިޓްގައި އޭރިއާތެރެއަށް ހުރަސްވި ބޯޅައަކުން އިންމި އެވެ. އިންމި ވަނީ ބޮލުން ގޯލުގެ މަތީ ދާގަނޑަށް ބޯޅަ ފޮނުވާލައިފަ އެވެ.
މެޗުގެ 78 ވަނަ މިނިޓްގައި، ދިއްދޫން އެއްވަރުކުރި ގޯލު ޖެހީ، އާދަމް ނަސީހު އެވެ. މިއީ، ދިއްދޫ ޓީމުގެ އަހުޒަމް ރަޝީދު ހިލޭ ޖެހުމެއްގައި ފޮނުވާލި ބޯޅައެއް ދިފާއުކުރަން މީދޫ ކުޅުންތެރިއަކު ޖައްސާލި ބޯޅަ، ގޯލު ރޮނގުމަތިން ކަހަލަ ގޮތަކަށް ބޮލުން ފޮނުވާލައިގެން ނަސީހު ކާމިޔާބުކުރި ގޯލެކެވެ.
ދެ ވަނަ ބުރުގެ 12 ޖާގައިގެ ތެރެއިން 10 ޖާގައެއް ވަނީ މިހާރު ކަށަވަރުވެފަ އެވެ. އެ ޖާގަތައް ހޯދީ، މާފުށީގެ އިތުރުން، ނައިފަރު، ކ. ގުރައިދޫ، ޅ. ކުރެންދޫ، އައްޑޫ ސިޓީ، ފުވައްމުލައް ސިޓީ، މާލެ ސިޓީ، ބ. އޭދަފުށި، ރ. އަލިފުށި އަދި ތިމަރަފުށިންނެވެ. ގޯލްޑް ކަޕްގެ ދެ ވަނަ ބުރު ކުރިއަށްދާނީ ފުރަތަމަ ބުުރުގެ 17 ޓީމުގެ ތެރެއިން އެންމެ ރަނގަޅު 12 ޓީމު، ހަތަރު ގްރޫޕަކަށް ބަހާލައިގެންނެވެ. ދެ ވަނަ ބުރުގެ ކޮންމެ ގްރޫޕެއްގައި ހިމެނޭނީ ތިން ޓީމެވެ.
