ނައިންޓީ ޕްލަސް ގޯލްޑް ކަޕްގެ ކުއާޓާ ފައިނަލްގައި މިރޭ ކ. މާފުށި އަތުން 3-0 އިން ކުރިހޯދައި އައްޑޫ ސިޓީން މުބާރާތުގެ ސެމީ ފައިނަލުގެ ފަހު ޖާގަ ހޯދައިފި އެވެ.
ހޮނިހިރު ދުވަހުގެރޭ ކުޅޭ ސެމީ ފައިނަލް ދެ ވަނަ މެޗުގައި އައްޑޫން ނުކުންނާނީ ރ. އަލިފުށްޓާ ދެކޮޅަށެވެ. އަލިފުށިން ސެމީ އަށް ދިޔައީ ކުއާޓާގައި ޕެނަލްޓީ ޖަހައިގެން، ފުވައްމުލަކު ސިޓީ ބަލިކުރުމަށް ފަހު އެވެ. ސެމީގެ ފުރަތަމަ މެޗުގައި މާލެ ސިޓީން ބައްދަލުކުރާނީ ބ. އޭދަފުށްޓާ ދެކޮޅަށެވެ.
ގަލޮޅު ދަނޑުގައި މިރޭ ކުޅުނު މެޗުގައި އައްޑޫން ތިން ގޯލު ޖެހީ ވެސް ދެ ވަނަ ހާފުގަ އެވެ. އެ ޓީމުގެ ފުރަތަމަ ލަނޑު ޖެހީ މިއަދު އުފަން ދުވަސް ފާހަގަކުރި އިސްމާއިލް އީސާ (މެސީ) އެވެ. އޭރިއާ ކައިރިން ލިބުނު ހިލޭ ޖެހުމަކުން އީސަ ފޮނުވާލި ހިލޭ ޖެހުން އަމާޒުވީ ގޯލުގެ މަތީ ކަނަށެވެ.
ލީޑުނެގުމުގެ އިރުކޮޅެއް ކުރިން އޭރިއާތެރެއިން ހުސްކޮށް އަރައި، ޝަމްވީލް ގާސިމް (ބޮންޑާ) ބޮލުން ޖެހި ބޯޅައެއް ދިޔައީ ގޯލާ ސީދާނުވެ އެވެ. އައްޑޫގެ ދެ ވަނަ ލަނޑު ޖެހީ ކޯނަރެއްގައި ދަނޑީގައި ޖެހިފައި ނުކުތް ބޯޅައެއް ގޯލަށް ވައްދާލައިގެން، މުހައްމަދު ހާޒިމް ރިއްފަތު އެވެ.
މެޗުގެ އިތުރު ވަގުތުގައި އައްޑޫގެ ފަހު ގޯލު ޖެހީ އިބްރާހިމް ވަހީދު ހަސަން (އިއްބެ) އެވެ. މިއީ، އީސަ ދިން ބޯޅައެއް ކޮންޓްރޯލް ކުރުމަށް ފަހު، އިބްރާހިމް މަހުދީ ހުސެއިން (ފޭދޫ އިއްބެ) ހުސްކޮށްލާފައި ދިން ބޯޅައަކުން އިއްބެ ހަމަޖެހިލައިފައި ޖެހި ގޯލެކެވެ.
މާފުށިން ވެސް އެޓޭކްތަކެއްކޮށް ގޯލެއް ޖެހޭތޯ ބެލި މި މެޗުގައި އައްޑޫގެ ކީޕަރު، ވިޝާން އަބްދުލް މަޖީދު ވަނީ ގޯލު ހިފެހެއްޓުމުގައި ރަނގަޅު ކުޅުމެއް ދައްކައިފަ އެވެ. މަާފުށީގެ އިބްރާހިމް އަތީގް ހަސަން (އިއްބެ) އާއި އިސްމާއިލް މަފާޒް ވަނީ އެޓޭކުގައި ރަނގަޅު ފުރުސަތުތަކެއް ހޯދޭތޯ މަސައްކަތްތަކެއް ކޮށްފަ އެވެ.
