ނައިންޓީ ޕްލަސް ގޯލްޑް ކަޕްގެ ކުއާޓާ ފައިނަލުގައި ޕެނަލްޓީ ޖަހައިގެން 6-5 އިން ފުވައްމުލަކު ސިޓީ ކަޓުވާލުމަށް ފަހު ރ. އަލިފުށިން މުބާރާތުގެ ސެމީ ފައިނަލްގެ ޖާގައެއް ހޯދައިފި އެވެ.
މެޗުގެ ފުރިހަމަ ވަގުތު ހަމަވިއިރު، ދެ ޓީމު ވެސް ވަނީ 2-2 އިން އެއްވަރުވެފަ އެވެ. ޕެނަލްޓީގައި، ފުވައްމުލަކުގެ ފަސް ޕެނަލްޓީ ތެރެއިން ދެ ޕެނަލްޓީ ނާކާމިޔާބުވި އެވެ. އަލިފުށިން ވަނީ ފަސް ޕެނަލްޓީގެ ތެރެއިން ހަތަރު ޕެނަލްޓީ ކާމިޔާބުކޮށްފަ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގައި އަލިފުށިން ލީޑުނެގީ ހުސެއިން ނިހާން (ނިހާޓް) އޭރިއާތެރެއިން ޖެހި ގޯލުންނެވެ. އެކަމަކު، ލަސްތަކެއް ނުވެ، ފުވައްމުލަކުން ނަތީޖާ އަނބުރާލި އެވެ. އެ ގޮތުން، ފުވައްމުލަކުން އެއްވަރުކުރީ، އެ ޓީމުގެ ހުސެއިން ޝަރީފް އަރިމަތިން ނަގައިދިން ބޯޅައެއް ގޯލަށް ވައްދާލައިގެން ކާމިޔާބުކުރި ގޯލުންނެވެ. ފުވައްމުލަކުން ލީޑުނެގީ އެ ޓީމުގެ ބިދޭސީ މިޑްފީލްޑަރު، އަހުމަދު މަހުމޫދު ފައްތާހު ހިލޭޖެހުމަކުން ނެގި ބޯޅައެއް ނިހާޓް ބޮލުގައި ޖެހިފައި ގޯލަށް ވަން ބޯޅައިންނެވެ.
ދެ ވަނަ ހާފުގައި އަލިފުށްޓަށް އެއްވަރުކޮށްދިން ލަނޑު ޖެހީ އޭރިއާތެރެއިން ލިބުނު ފުރުސަތަކުން އަހުމަދު ސަމީޒް ވަނީ ގޯލުގެ މަތީ ދާގަނޑަށް ބޯޅަ ފޮނުވާލައިފަ އެވެ.
ޕެނަލްޓީ އަށް ދިޔައިރު، ފުވައްމުލަކުގެ ފުރަތަމަ ޕެނަލްޓީ ސާދު ނިޒާރު ފޮނުވާލުމުން އަލިފުށީގެ ކީޕަރު އަބްދުއްސައްދާދު އާދަމް (ދާދު) ވަނީ މަތަކޮށްފަ އެވެ. އަލިފުށީގެ ފުރަތަމަ ޕެނަލްޓީ އަހުމަދު ވިޖުދާން (ވިޖުއްކޮ) ފޮނުވާލިއިރު، ފުވައްމުލަކުގެ ކީޕަރު، އަޝްރަފު އަބްދުﷲ ވަނީ މަަތަކޮށްފަ އެވެ.
އޭގެ ފަހުން، އަލިފުށިން ޕެނަލްޓީ ފޮނުވާލި، އިބްރާހިމް ސަލާމް، މުހައްމަދު ރަޝީދު (ހޮކޭ)، ނިހާޓް އަދި އަހުމަދު ހުސާމް (ހުސާްންކޮ) ޕެނަލްޓީ ކާމިޔާބުކުރި އެވެ. ފުވައްމުލަކުގެ މުހައްމަދު ހަފީޒް (މޯޑު) ފޮނުވާލި ޕެނަލްޓީ ކާމިޔާބުކޮށްފައިވަނިކޮށް، އެ ޓީމުގެ ތިން ވަނަ ޕެނަލްޓީ ފައްތާހު ފޮނުވާލި ވަގުތު ކީޕަރު ދާދު މަތަކުރި އެވެ. ފުވައްމުލަކުން ފަހުން ފޮނުވާލި ދެ ޕެނަލްޓީ، އަބްދުﷲ ރަޝީދު (ޕެލޭ) އާއި އަލީ ޝަމާލް އަބްދުﷲ (ޝަންމު) ކާމިޔާބުކުރި ނަމަވެސް އެ ޓީމު ބަލިވީ އެވެ.
ސެމީ ފައިނަލުގައި އަލިފުށިން ކުޅޭނީ ކުއާޓާ ފައިނަލް ފަހު މެޗުގައި، ކ. މާފުށްޓާއި އައްޑޫ ސިޓީ ކުޅެގެން މޮޅުވާ ޓީމަކާ އެވެ.
