ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތުގެ ގްރޫޕް ޑީގައި މިއަދު ހަވީރު ރ. އަލިފުށި އަތުން 1-0 އިން މޮޅުވެ، ކ. މާފުށިން ދެ ވަނަ ބުރަށް ދަތުރުކޮށްފި އެވެ.
މި މެޗަށް ނުކުތްއިރު ވެސް، މި ގްރޫޕުން އަލިފުށްޓާއި ޅ. ނައިފަރު ވަނީ ދެ ވަނަ ބުރަށް ދަތުރުކޮށްފަ އެެވެ. މިއަދު ހަވީރު ކުޅުނު މެޗާ އެކު މި ގްރޫޕުން ދެ ވަނަ ބުރުގެ ތިން ޖާގަ ވެސް ވަނީ ޔަގީންވެފަ އެވެ. ގްރޫޕްގެ އެއް ވަނަ ހޯދި އަލިފުށްޓާއި ދެ ވަނައިގައި ނިންމި ނައިފަރަށް ވަނީ ތިން މެޗުން ހަ ޕޮއިންޓް ލިބިފަ އެވެ. މާފުށިން ތިން ވަނަ ހޯދީ މިއަދުގެ މޮޅާ އެކު، ހަތަރު ޕޮއިންޓް ހޯދި މާފުށްޓެވެ. އަދި ފުލުގައި ނިންމި ބ. ކެންދޫ އެއް ޕޮއިންޓާ އެކު ވަނީ މުބާރާތުން ކަޓައިފަ އެވެ.
ގަލޮޅު ދަނޑުގައި މިއަދު ކުޅުނު މެޗުގައި، އަލިފުށީގެ އިބްރާހިމް ފުރުގާން (ފުގޭ) އޭރިއާބޭރުން ޖެހި ބޯޅައެއް ވަނީ ގޯލުގެ ދަނޑިއަށް އަމާޒުވެފަ އެެވެ.
މެޗުގައި ފެނިގެންދިޔަ ހަމައެކަނި ކަނޑު ޖެހީ މެޗުގެ 46 ވަނަ މިނިޓްގައި، މާފުށި ޓީމުގެ އިސްމާއިލް ނަޒީހު އެވެ. މިއީ، އަލިފުށީގެ ކީޕަރު، މުހައްމަދު ފަސީހު އަތުން ހެދުނު ގޯހެއްގެ ފައިދާނަގައި، މާފުށީގެ އިބްރާހިމް އަތީގު (އިއްބެ) ދިން ބޯޅައަކުން ނަޒީހު ޖެހި ގޯލެކެވެ.
އޭގެ ފަހުން، އަތީގު އޭރިއާބޭރުން ޖެހި ބޯޅައެއް، ކީޕަރު ފަސީހު ވަނީ މަތަކޮށްފަ އެވެ.
އަލިފުށްޓަށް އެއްވަރުކޮށްދޭން އަހުމަދު ހުސާމް (ހުސާންކޮ) އޭރިއާތެރެއަށް ބޯޅަ ހިފައިގެން އައުމަށް ފަހު ޖެހި ބޯޅަ ދިޔައީ ހުރަސްދަނޑިމަތިން ބޭރަށެވެ. މާފުށީގެ އިސްމާއިލް މަފާޒް އޭރިއާތެތެރެއިން ޖެހި ބޯޅައެއް ވަނީ އަރިމަތީ ދާގަނޑަށް އަމާޒުވެފަ އެވެ.
ދެ ވަނަ ބުރުގެ 12 ޖާގައިގެ ތެރެއިން 10 ޖާގައެއް ވަނީ މިހާރު ކަށަވަރުވެފަ އެވެ. އެ ޖާގަތައް ހޯދީ، މާފުށީގެ އިތުރުން، ނައިފަރު، ކ. ގުރައިދޫ، ޅ. ކުރެންދޫ، އައްޑޫ ސިޓީ، ފުވައްމުލައް ސިޓީ، މާލެ ސިޓީ، ބ. އޭދަފުށި، ރ. އަލިފުށި އަދި ތިމަރަފުށިންނެވެ. ގޯލްޑް ކަޕްގެ ދެ ވަނަ ބުރު ކުރިއަށްދާނީ ފުރަތަމަ ބުުރުގެ 17 ޓީމުގެ ތެރެއިން އެންމެ ރަނގަޅު 12 ޓީމު، ހަތަރު ގްރޫޕަކަށް ބަހާލައިގެންނެވެ. ދެ ވަނަ ބުރުގެ ކޮންމެ ގްރޫޕެއްގައި ހިމެނޭނީ ތިން ޓީމެވެ.
