ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތުގެ ގްރޫޕް ޑީގައި މިރޭ ފަހަތުން އަރައި ބ. ކެންދޫ އަތުން 2-1 އިން މޮޅުވެ، ޅ. ނައިފަރުން މުބާރާތުގެ ދެ ވަނަ ބުރުގެ ޖާގައެއް ހޯދައިފި އެވެ.
ގްރޫޕް ޑީން ފުރަތަމަ ކުޅުނު ދެ މެޗުން މޮޅުވެ، ރ. އަލިފުށިން ވަނީ ދެ ވަނަ ބުރުގެ ޖާގައެއް ޔަގީންކޮށްފަ އެވެ. އެ ގްރޫޕުން ދެ ވަނަ ބުރުގެ ބާކީ ދެ ޖާގައިގެ ތެރެއިން އަނެއް ޖާގަ މި ހޯދީ ނައިފަރުންނެވެ. އަނެއް ޖާގަ އަށް ކެންދޫ އާއި ކ. މާފުށިން ވަނީ އިންތިޒާރުކުރަން ޖެހިފަ އެވެ. މި ގްރޫޕްގެ ފަހު މެޗުގައި މާދަމާ ހަވީރު މާފުށިން އަލިފުށްޓާ ކުޅޭނެ އެވެ.
އަލިފުށި އެއް ވަަނައިގައި އޮތީ ދެ މެޗުން ހަ ޕޮއިންޓާ އެކު އެވެ. ދެ ވަނައިގައި އޮތް ނައިފަރުން ތިން މެޗު ކުޅެގެން ހަ ޕޮއިންޓް ހޯދިއިރު، ތިން ވަނައިގައި އޮތް ކެންދޫ އާއި ހަތަރެއްގައި އޮތް މާފުށްޓަށް ވަނީ ޕޮއިންޓެއް ލިބިފަ އެވެ.
ގަލޮޅު ދަނޑުގައި މިރޭ ކުޅުނު މެޗަށް މޮޅުވުން މަޖުބޫރު މެޗެއްގެ ގޮތުގައި ދެކިގެން ނުކުތް، ކެންދޫން ވަނީ ލީޑުނަގައިފަ އެވެ. މެޗު ފަށައިގެން ދެ ވަނަ މިނިޓްގައި ނައިފަރުގެ ކެޕްޓަން، ހުސެއިން ފައިސަލް (ފައިޓޯ) އަތުން ބޯޅަ ހޯދުމަށް ފަހު އޭރިއާބޭރުން ކެންދޫގެ މަލްސޫން ޔާމީން އޭރިއާބޭރުން ފޮނުވާލި ބޯޅަ ހިފަން ނައިފަރު ކީޕަރު އަބްދުﷲ މުހައްމަދު މަަސައްކަތްކުރި ވަގުތު އޭނާ އަތްދަށުން ބޯޅަ ވަނީ ގޯލަށެވެ.
ނައިފަރަށް މެޗުގެ 19 ވަނަ މިނިޓްގައި އެއްވަރުކޮށްދިނީ އިމްރާން މުހައްމަދު އެވެ. އޭރިއާބޭރުން އިމްރާން ޖެހި ބޯޅަ އަމާޒުވީ ގޯލުގެ މަތީ ކަނަށެވެ. ނައިފަރު މޮޅުކޮށްދިން ގޯލު ޖެހީ ވެސް މެޗުގެ މޮޅު ކުޅުންތެރިޔާ އިމްރާން އެެވެ. މެޗުގެ ދެ ވަނަ ހާފުގައި އޭރިއާތެރެއިން ލިބުނު ބޯޅައެއް އޭނާ ވަނީ ގޯލުގެ ދުރު ކަނަށް ފޮނުވާލައިފަ އެވެ.
މެޗުގައި ނައިފަރުން ދެ ވަނަ ލަނޑު ޖެހުމުގެ ކުރިން، ކެންދޫ އަށް އަލުން ލީޑުނަގައިދޭން އޭރިއާތެރެއިން ރައްޝާފް މުހައްމަދަށް ލިބުނު ބޯޅަ ރަނގަޅަށް ފޮނުވާލެވޭ ގޮތެއްނުވި އެވެ.
ދެ ވަނަ ބުރުގެ 12 ޖާގައިގެ ތެރެއިން ނުވަ ޖާގައެއް ވަނީ މިހާރު ކަށަވަރުވެފަ އެވެ. އެ ޖާގަތައް ހޯދީ، ނައިފަރު، ކ. ގުރައިދޫ، ޅ. ކުރެންދޫ، އައްޑޫ ސިޓީ، ފުވައްމުލައް ސިޓީ، މާލެ ސިޓީ، ބ. އޭދަފުށި، ރ. އަލިފުށި އަދި ތިމަރަފުށިންނެވެ.
ގޯލްޑް ކަޕްގެ ދެ ވަނަ ބުރު ކުރިއަށްދާނީ ފުރަތަމަ ބުުރުގެ 17 ޓީމުގެ ތެރެއިން އެންމެ ރަނގަޅު 12 ޓީމު، ހަތަރު ގްރޫޕަކަށް ބަހާލައިގެންނެވެ. ދެ ވަނަ ބުރުގެ ކޮންމެ ގްރޫޕެއްގައި ހިމެނޭނީ ތިން ޓީމެވެ.
