ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތުގައި މިރޭ މާލެ ސިޓީ އަތުން 2-0 އިން މޮޅުވެ، ބ. އޭދަފުށިން ގްރޫޕް ބީގެ އެއް ވަނަ ޓީމުގެ ގޮތުގައި ދެ ވަނަ ބުރަށް ދަތުރުކޮށްފި އެވެ.
މި މެޗަށް ނުކުތްއިރު ވެސް މި ދެ ޓީމަށް ވަނީ ދެ ވަނަ ބުރުގެ ޖާގައެއް ޔަގީންވެފަ އެވެ. އޭދަފުށިން ގްރޫޕްގެ އެއް ވަނަ ހޯދީ ތިން މެޗުން މޮޅުވެ، ނުވަ ޕޮއިންޓާ އެކު އެވެ. ދެ ވަނަ ލިބުނު މާލެ ސިޓީ އަށް ތިން މެޗުން ނުވަ ޕޮއިންޓް ލިބިފައިވާއިރު، ދެން މި ގްރޫޕްގައި އޮތް ތ. ތިމަރަފުށްޓާއި ބ. ތުޅާދޫ އަށް އަދި ޕޮއިންޓެއް ނުލިބެ އެވެ. މި ދެ ޓީމު މާދަމާ ހަވީރު ކުޅޭ މެޗުން މޮޅުވާ ޓީމަކަށް މި ގްރޫޕުން އަނެއް ބުރުގެ ފަހު ޖާގަ ލިބޭނެ އެވެ.
ގަލޮޅު ދަނޑުގައި މިރޭ ކުޅުނު މެޗުގެ ފުރަތަމަ ހާފުގައި އޭދަފުށްޓަށް ލީޑުނަގައިދިނީ ފުރަތަމަ ހާފުގައި އަހުމަދު އައިހަމް (އައިހު) ޖެހި ހިލޭ ޖެހުމުންނެވެ. ޓީސީ ސްޕޯޓްސް ކްލަބާއި ސުޕަ ޔުނައިޓެޑް ސްޕޯޓްސް (ސަސް) އަށް ފުރަތަމަ ޑިވިޝަނުގައި ކުޅެފައިވާ އައިހު ފޮނުވާލި ބޯޅަ ވަނީ ގޯލުގެ ކަނަށެވެ. މާލެ ސިޓީގެ ކީޕަރު، އާތިފް އަހުމަދަށް މަތަކުރެވޭ ގޮތެއްނުވި އެވެ.
މާލެ ސިޓީން ލަނޑު ޖެހޭތޯ ކުރި އެޓޭކެއްގައި އިސްމާއިލް ވަޖީހު (ވައްޖެ) ފޮނުވާލި ބާރު ބޯޅަ އޭދަފުށީ ކީޕަރު އަލީ އަޖުފާން އަމްޖަދު ވަނީ މަތަކޮށްފަ އެވެ.
އޭދަފުށްޓަށް ދެ ވަނަ ހާފުގައި ގޯލު ޖަހައިދިނީ، މި މުބާރާތުގައި މޮޅު ކުޅުމެއް ދައްކަމުން އަންނަ މުހައްމަދު ފާސިރު (ފާއްޓޭ) އެވެ. މާލެ ސިޓީ ޑިފެންސް ފަހަތުން އައި ބޯޅައެއް ހޯދައި، ކުރިން އޯލް ޔޫތު ލިންކް އޭޖް (އޭވައިއެލް) އަށް ފުރަތަމަ ޑިވިޝަނުގައި ކުޅެދިން ފާއްޓޭ ވަނީ ތިރިތިރިން ގޯލުގެ ދުރު ކަނަށް ބޯޅަ ފޮނުވާލައިފަ އެވެ.
މެޗުގެ އިތުރު ވަގުތުގައި މާލެ ސިޓީގެ ކީޕަރު އާތިފް އަށް އަނިޔާވެ އަށިގަނޑުގައި ބަދަލުކުރަން ޖެހުނުއިރު، ބަދަލު ކީޕަރަކަށް އެ ޓީމުގައި ހިމެނޭ ހަސަން ތޮލާލް (ޓޮޕްލަކް) އަށް ބެންޗުގައި ހުރި ނަމަވެސް، ކީޕަރު ޖޯޒީގައި އެ މަގާމަށް ކުޅެން އެރީ ޓީމުގެ ކެޕްޓަން، ރިލްވާން ވަހީދު (ރިލޭ) އެވެ. ރިލޭ، ކީޕަރަކަށް ކުޅެން ނުކުތް ފަހުން ފާއްޓޭ ޖެހި ބޯޅައެއް މަތަކުރި އެވެ. އޭދަފުށީގެ އުނައިސް ޒުބައިރު ޖެހި ޝޮޓެއް ވަނީ ހުރަސް ދަނޑިއަށް އަމާޒުވެފަ އެވެ.
