ސަރުކާރުގެ އިދާރާތަކުން އަލަށް ރިޓަޔާ ކުރާ މީހުންނަށް މަހުން މަހަށް ދޭ އެލަވަންސް ޖެނުއަރީން ފެށިގެން ކަނޑާލަން ފިނޭންސް މިނިސްޓަރު މޫސާ ޒަމީރު ހުރިހާ އިދާރާއަކަށް އަންގަވައި ސިޓީއެއް ފޮނުއްވައިފި އެވެ.
ނެޝަނަލް ޕޭ ކޮމިޝަންގެ ވެސް ރައީސް ޒަމީރު އިދާރާތަކަށް ފޮނުއްވި ސިޓީގައި ވިދާޅުވީ މިއީ ސަރުކާރުގެ ހަރަދު ކުޑަކުރުމުގެ ސިޔާސަތުގެ ދަށުން އަޅައި ފިޔަވަޅެއް ކަމަށެވެ.
މިކަމާ ގުޅޭ މައުލޫމާތު ފިނޭންސް މިނިސްޓްރީން ކަށަވަރު ނުކޮށް ދިން ނަމަވެސް ސަރުކާރުގެ ގިނަ މުވައްޒަފުންގެ ކަންކަން ބަލަހައްޓާ ސިވިލް ސާވިސް ކޮމިޝަނު (ސީއެސްސީ) އިން ވަނީ މިކަން ކަށަވަރުކޮށްދީފަ އެވެ.
އެ ކޮމިޝަނުގެ ރައީސް މުހައްމަދު ނާސިހު "އަދަދު" އަށް ވިދާޅުވީ އެ ކޮމިޝަނަށް ފޮނުއްވި ސިޓީގައި އަލަށް ރިޓަޔާ ކުރާ މީހުންނަށް އަންނަ އަހަރުން ފެށިގެން މަހުން މަހަށް ދޭ އެލަވަންސް ނުލިބުނު ނަމަވެސް، މިހާތަނަށް ރިޓަޔާވެފައި ތިބި މީހުންނަށް އެ އެލަވެންސް ކުރިއެކޭ އެއްގޮތަށް ލިބިގެންދާނެ ކަމަށް ބުނެފައިވާ ކަމަށެވެ.
"ޖެނުއަރީ އެކަކުން ފެށިގެން ސަރުކާރުގެ ހަރަދު ކުޑަކުރުމުގެ ސިޔާސާތުގެ ދަށުން އެބައި އުނިކުރަން ބޭނުންވާ ވާހަކަ އެބައޮތް ލިޔުއްވާފައި. ދެން އޭގެ މާނައަކީ ޖެނުއަރީ އެކަކުން ފެށިގެން ރިޓަޔާ ކުރާ މީހުންނަށް ކުރިއަށް އޮތްތަނުގައި ނުލިބޭނެއޭ. އެކަމަކު މިހާތަނަށް ރިޓަޔާ ވެފައި ތިބި މީހުންނަށް ލިބެމުންދާނެ،" ނާސިހު ވިދާޅުވި އެވެ.
އޭގެ އިތުރުން ކުރިއެކޭ އެއްގޮތަށް އަލަށް ރިޓަޔާ ކުރާ މީހުންނަށް ގަނޑުކޮށް ފައިސާ ލިބޭނެކަން ފާހަގަކުރައްވާ ނާސިހު ވިދާޅުވީ ހަމައެކަނި އުނިކުރީ މަހުން މަހަށް ދޭ އެލަވަންސް ކަމަށެވެ.
ރާއްޖޭގައި 2009 ގައި ތައާރަފްކުރި ރިޓަޔަމަންޓް ޕެންޝަން ސްކީމްގައި ސަރުކާރުގެ 13 އިދާރާއަކުން ހިންގާއިރު، އަންނަ އަހަރު އެ ސްކީމަށް ހަރަދުވާނެ ކަމަށް ލަފާ ކުރީ 272 މިލިއަން ރުފިޔާއެވެ. އަދި މި އަހަރު އެ ސްކީމަށް ޖުމްލަ 266 މިލިއަން ރުފިޔާ ހަރަދުވާނެ ކަމަށް އޮތީ ލަފާކޮށްފަ އެވެ.
ދައުލަތުން ޕެންޝަނަށް ކުރާ ހަރަދު އަހަރަކަށްވުރެ އަހަރެއް ދަނީ ބޮޑުވަމުންނެވެ. އެގޮތުން ސަރުކާރުގެ ހަރަދު ކުޑަކުރުމުގެ ސިޔާސަތުގެ ދަށުން އަންނަ އަހަރުން ފެށިގެން 65 އަހަރުން މަތީގެ މީހުންނަށް ދޭ 5،000ރ. ތަނަވަސް މީހުންނަށް ނުދޭން ވަނީ ނިންމާފަ އެވެ.
