އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ސޯޝަލް މީޑިއާ އެކްޓިވިސްޓު ހުސެއިން ޝާފިއު (ތުއްތު) ފުލުހަށް ހާޒިރު ކުރަން ޗިޓު ފޮނުވުމާ ގުޅިގެން ގިނަ ބަޔަކު އެކަމާ ދެކޮޅަށް ސޯޝަލް މީޑިއާގައި ނުރުހުން ފާޅުކުރަން ފަށައިފި އެވެ.
ފުލުހުން ފޮނުވި ޗިޓުގައި ބުނީ އެ މުއައްސަސާއިން ބަލަމުންދަނީ ނޮވެމްބަރު 8، ގައި ހަޑިހުތުރު ބަސް ބޭނުންކޮށްގެން ބިރުވެރިކަން އުފެދޭ ގޮތަށް ސޯޝަލް މީޑިއާ ޕްލެޓް ފޯމެއް ކަމަށްވާ "އެކްސް" ގައި ޝާފިއު ކުރި ޕޯސްޓެއްގެ މައްސަލަ ކަމަށެވެ.
އެކަމާ ގުޅިގެން ސޯޝަލް މީޑިއާގައި ގިނަ ބަޔަކު ބުނަމުންދަނީ މުޖުތަމައުގެ އަމާންކަން ނުގެއްލޭ ގޮތަށް އެކްސްގައި ޕޯސްޓުތައްކޮށް ހިޔާލުފަޅު ކުރުމަކީ މައްސަލައެއް ނޫން ކަމަށެވެ.
އެ ގޮތުން ކުރާ ޕޯސްޓެއްގެ މައްސަލައިގައި ފުލުހަށް ހާޒިރު ކުރުމަކީ ބިރުދެއްކުންކަން ސިފަކޮށް ބައެއް މީހުން ބުނެފައި ވަނީ ކުރިން ޓުވީޓުކޮށްގެން ފުލުހަށް ހާޒިރުކޮށް ޖަލަށްލީ ދުވަސްތައް އިޔާދަވާން ފަށާފައިވާ ކަމަށެވެ.
މިކަން ކުށްވެރިކޮށް އެމްޑީޕީގެ ޗެއާޕާސަން ފައްޔާޒު އިސްމާއިލް ވަނީ އެކްސްގައި ޕޯސްޓެއް ކުރައްވާފަ އެވެ. އެ ޕޯސްޓުގައި ފައްޔާޒު ލިޔުއްވާފައިވަނީ ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް މިއަދު ވެއްޖެ ކަމަށެވެ.
"ރައްޔިތުންގެ އަޑު ކަނޑުވާލައި، ހިޔާލު ފާޅުކުރުމަށް ހުދުމުހުތާރު ވެރިން އަބަދުވެސް ހުރަސް އަޅާނެ. ހިޔާލާއި ފިކުރުގައި ތަޅެއް ނޭޅުވޭނެ. މިހެން ޗިޓު ފޮނުވިޔަސް ފާޅުގައި ބަސް ބުނުމުގެ ހިތްވަރު ދިވެހިންގެ އަދި ހާއްސަކޮށް އެމްޑީޕީގެ މެމްބަރުންގެ ހުންނާނެ،" ފައްޔާޒު ލިޔުއްވާފައިވެ އެވެ.
އެމްޑީޕީގެ ރައީސް އަބްދުﷲ ޝާހިދު ވިދާޅުވީ ބިރުދައްކަން ތަހުގީގަށް ގެންދިޔުމުގެ ސަގާފަތް އަލުން ފެށިއްޖެ ކަމަށެވެ. އޭނާ ވިދާޅުވީ ދިވެހި ރައްޔިތުންގެ އަނގަމަތީ ގައި މަލަންއަޅައި ބަންދެއްނުކުރެވޭނެ ކަމަށެވެ.
"ރައްޔިތުންގެ ޙައްޤުގައި ވަކާލާތު ކުރުމުގައި އެމްޑީޕީ ފަހަތަކަށް ނުޖެހޭނެ،" ޝާހިދު ވިދާޅުވި އެވެ.
އޭގެއިތުރުން ފުލުހުން ބަލަމުންދާ ޝާފިއު އެކްސްގައި ކުރި ޕޯސްޓު، ގިނަ ބަޔަކު ދަނީ އަލުން ރިޕޯސްޓުކޮށް ޝާފިއު ލިޔުނު ގޮތަށް ލިޔަމުންނެވެ. އަދި ގިނަ ބަޔަކު ދަނީ ހިޔާލުފާޅުކުރުން ނުހުއްޓުވޭނެ ކަމަށް ގޮވާލަމުންނެވެ.
ހޯމް މިނިސްޓަރު އަލީ އިހުސާން އެކްސްގައި ކުރެއްވި ޕޯސްޓެއްގައި ވިދާޅުވީ ޝާފިއު ކުރި ޕޯސްޓުގައި މީހަކަށް ނިސްބަތްކޮށް އެމީހަކު މަގުމަތިން ފެނުމުން ގެއްލުމެއް ދީފާނެ ކަމަށް ދޭހަވާ ގޮތަށް ލިޔެފައި އޮތުމުން، އެކަމުގެ ތަފްސީލު ހޯދާ ސާފުކުރުމަކީ އިދާރާތަކުން ކުރަން ޖެހޭ ކަމެއް ކަމަށެވެ.
ޝާފިއު ކުރި ޕޯސްޓުގައި "ކައްޒާބު" އޭ ލިޔެފައިވާއިރު، އެ ނަން ނިސްބަތް ކުރަނީ ސީދާ ކާކަށް ކަން އެނގޭކަށް ނެތެވެ.
"ޔަގީނުން ވެސް މި ސަރުކާރުގަ އެއްވެސް ބޭފުޅެއް އިސްތިސްނާ ނުކޮށް އެމީހެއްގެ ހަށިގަނޑާއި ފުރާނަ ރައްކާތެރިކުރެވޭނެ ހުރިހާ ފިޔަވަޅެއް އަޅާނެ. ހަމައެއާއެކު ރާއްޖޭގެ ގާނޫނުތަކާއި ގަވާއިދުތަކުގެ އިމުގެތެރޭގައި ހިޔާލުފާޅުކުރެވޭނެ އެންމެ ފުޅާމިނަށް އެކަން ކުރެވޭނެ މަގު އޮންނާނީ އަބަދުވެސް ހުޅުވިފައި،" އިހުސާން ވިދާޅުވި އެވެ.
