މެޑްރިޑް (ނޮވެމްބަރު 29) - ރެއާލް މެޑްރިޑުން މި ފަހަރުގެ ބެލޮންޑިއޯ އެވޯޑް ހަފްލާ ބޮއިކޮޓް ކުރަން ނިންމި ނިންމުމަށް އިހުތިރާމް ނުކުރެވޭނެ ކަމަށް އެ އެވޯޑް މިި ފަހަރު ހޯދި މެންޗެސްޓާ ސިޓީގެ ސްޕެއިން މިޑްފީލްޑަރު، ރޮޑްރީގޯ (ރޮޑްރީ) ބުނެފި އެވެ.
ރެއާލް މެޑްރިޑުން މި ހަފްލާ ބޮއިކޮޓްކުރީ، އެ ޓީމަށް ކުޅޭ ބްރެޒިލްގެ ތަރި، ވިނީޝިއުސް ޖޫނިއާ އަށް ބެލޮންޑިއޯ ނުދޭން ނިންމުމުން ކަމަށް ސްޕެއިނާއި ދެކުނު އެމެރިކާގެ މީޑިއާ ރިޕޯޓްތައް ބުނެ އެވެ. އަދި ވިނީޝިއުސް އަށް މި އެވޯޑް ނުދެނީ، ރޭންކިން އިން އެއް ވަނަ ލިބުނު ނަމަވެސް، ފުޓްބޯޅައިގެ ބޭރުގެ ބައެއް ކަންކަމަށް ބަލައިފައި ކަމަށެވެ. ރޮޑްރީ މި އެވޯޑް ހޯދީ ވިނީޝިއުސްގެ އިތުރުން ރެއާލްގެ ދެ ކުޅުންތެރިންނާ ވާދަކޮށެވެ. އެއީ، ސްޕެއިނުގެ ޑިފެންޑަރު ޑެނީ ކާވަހާލް އާއި އިނގިރޭސި މިޑްފީލްޑަރު، ޖޫޑް ބެލިންހަމް އެވެ.
ޕޮޑްކާސްޓް ޝޯއެއްގައި ވާހަކަ ދައްކަމުން ރޮޑްރީ ބުނީ، ބެލޮންޑިއޯ އެވޯޑް ލިބުމުން އެ ކުރެވުނު އުފާވެރި އިހުސާސް ބުނެދެން ނޭނގޭ ކަމަށެވެ. އަދި މިހާރު މި އޮތް ފުޓްބޯޅައިގެ ޖީލަށް ގިނައިން ފެނިފައިވަނީ ކްރިސްޓިއާނޯ ރޮނާލްޑޯ އާއި ލިއޮނަލް މެސީ އަށް ގިނަ ފަހަރު ބެލޮންޑިއޯ އެވޯޑް ލިބުނުތަން ކަމަށާއި އެެހެންކަމުން އެ އެވޯޑް ލިބޭ ކޮންމެ ކުޅުންތެރިއަކު ވެސް ހާއްސަވާނެ ކަމަށެެވެ.
"ދެން، އަހަންނަށް އެ މީހުން (ރެއާލްގެ) އެ ނިންމުމަކަށް އިހުތިރާމެއް ނުކުރެވޭނެ. ދިރިއުޅުމުގައި ވެސް ވަރަށް މުހިންމު ކަމެއް މޮޅުވުމާއި ބަލިވުމުގެ ތަޖުރިބާ އިން ދަސްކުރުމަކީ، އެއީ އަހަރެން މޮޅުވި ވަގުތު، ދެން، އަހަރެން ބަލިވި ނަމަވެސް އަހަރެން އެ ތަޖުރިބާއިން ވެސް ދަސްކުރާނަން،" ރޮޑްރީ ބުންޏެވެ.
ބެލޮންޑިއޯ ފައިނަލް ވޯޓިން އަށް ބަލާއިރު، ރޮޑްރީ އަށް 1170 ޕޮއިންޓް ލިބުނެވެ. ދެ ވަނަ ހޯދި ވިނީޝިއުސް އަށް ލިބުނީ، 1129 ޕޮއިންޓެވެ.
ކަކުލުގެ އަނިޔާއެއްގެ ސަބަބުން މި ސީޒަނުގައި ކުޅުމާ ދުރުގައި ހުންނަން ޖެހިފައިވާ ރޮޑްރީ ބުނީ، ބެލޮންޑިއޯގެ ކާމިޔާބީން ކެރިއަރުގައި އިތުރު ކަންކަން ހާސިލްކުރަން ހިތްވަރު ލިބިފައިވާ ކަމަށެވެ.
