ނިއު ޔޯކް، ޔުނައިޓެޑް ސްޓޭޓްސް (އޮގަސްޓް 29) - މިދިޔަ ސީޒަނަށް ބަލާއިރު، ފްރާންސް ފުޓްބޯލް އިން ހޮވާ އެންމެ މޮޅު ފުޓްބޯޅަ ކުޅުންތެރިޔާ އަށް ދޭ ބެލޮންޑިއޯ އެވޯޑް ލިބެން ޖެހޭނީ ޕީއެސްޖީގެ ފްރާންސް ފޯވާޑް، އޮސްމާން ޑެމްބެލޭ އަށް ކަމަށް ސްޕެއިނުގެ ތަޖުރިބާކާރު މިޑްފީލްޑަރު، ސާޖިއޯ ބުސްކެޓްސް ވަނީ ބުނެފި އެވެ.
މިދިޔަ ސީޒަނުގައި ޑެމްބެލޭ ވަނީ ފްރާންސްގެ ތިން މުބާރާތް ކާމިޔާބުކުރުމުގެ އިތުރުން، ޔުއެފާ ޗެމްޕިއަންސް ލީގުގެ ޗެމްޕިއަންކަން ވެސް ޕީއެސްޖީއާ އެކު ހޯދައިފަ އެވެ. އަދި، ޖޫން/ޖުލައި ގައި އެމެރިކާގައި ބޭއްވި ކްލަބް ވޯލްޑް ކަޕްގެ ފައިނަލަށް ދަތުކުރި ޕީއެސްޖީން ވަނީ މި ފަހަރުގެ ޔުއެފާ ސުޕަ ކަޕް ވެސް ކާމިޔާބުކޮށްފަ އެވެ.
ބެލޮންޑިއޯގެ އެއް ފޭވަރިޓެއްގެ ގޮތުގައި ހުރި ޑެމްބެލޭ އަށް އެ އެވޯޑް ހައްގުވާ ކަމަށް ބުސްކެޓްސް ބުނެފައިވަނީ، މިދިޔަ ސީޒަނުގައި އެއް ލެވަލެއްގައި ގިނަ މެޗުތަކެއް އޭނާ ކުޅެފައިވާތީ އެވެ.
"އެހެން ހުރިހާ ކުޅުންތެރިންނަށް ވުރެން ރަނގަޅު ކުޅުމެއް ޑެމްބެލޭ ދެއްކި، އެ ކުޅުން ގިނަ މެޗުތަކެއްގައި ދެއްކި، މުޅި ސީޒަނަށް ބަލާއިރު އެއް ލެވަލެއްގައި ހިފެހެއްޓި، އަހަރެމެންނަށް އެނގޭ އެއީ ކޮން ލެވަލެއްގެ ކުޅުންތެރިއެއްކަން، އޭނާ އަށް ކިހާ ތަފާތެއް ދެއްކޭކަން،" ބުސްކެޓްސް ބުންޏެވެ.
"ދެން ހައްގު ކުޅުންތެރިން ކިޔަންޏާ، ބާސެލޯނާގައި ވެސް އެބަތިބި ކުޅުންތެރިން، ދެން، އަހަންނަށް ނޭނގެ މި ވޯޓު ދަނީ ކިހިނެއް ކަމެއް،"
ކުރިން ބާސެލޯނާ އާއި ބޮރޫޝިއާ ޑޯޓްމަންޑަށް ކުޅުނު ޑެމްބެލޭ މިދިޔަ ސީޒަނުގައި 53 މެޗު ކުޅުނުއިރު، 35 ގޯލު ޖަހައި، 16 ގޯލު ޖަހަން ފުރުސަތު ތަަނަވަސްކޮށްދިނެވެ.
ފުޓްބޯޅައިގެ އެންމެ ދުވަސްވީ އަދި ޝަރަފްވެރި އެއް އެވޯޑް ކަމަށްވާ ބެލޮންޑިއޯ އަކީ 1956 ވަނަ އަހަރުން ފެށިގެން ދެމުން އަންނަ އެވޯޑެކެވެ. މި އެވޯޑް 1995 ވަނަ އަހަރާ ހަމަޔަށް ދިނީ ހަމައެކަނި ޔޫރަޕް ކުޅުންތެރިންނަށެވެ. އެކަމަކު، އޭގެ ފަހުން ވަނީ ޔޫރަޕުގެ ކްލަބަކަށް ކުޅޭ ދުނިޔޭގެ ކޮންމެ ކުޅުންތެރިޔަކަށް ވެސް ލިބޭ ގޮތަށް ބަދަލުކޮށްފަ އެވެ. އަދި ފަހުން، 2007 ގައި ވަނީ ދުނިޔޭގެ ކޮންމެ ގައުމެއްގައި ކުޅޭ ޕްރޮފެޝަނަލް ކުޅުންތެރިންނަށް ވެސް ހުޅުވާލައިފަ އެވެ. ބެލޮންޑިއޯ އެވޯޑް 2010-2015 އަށް ދިނީ ފީފާ އެވޯޑާ އެއްކޮށްލައިގެން ފީފާ ބެލޮންޑިއޯގެ ގޮތުގަ އެވެ.
ކޮވިޑް-19 ގެ ސަބަބުން 2020 ވަަނަ އަހަރު ބެލޮންޑިއޯ ހަފްލާ ނުބާއްވަ އެވެ. ފްރާންސް ފުޓްބޯލް އިން ދޭ ބެލޮންޑިއޯ އެވޯޑަށް ވޯޓު ދިނުމުގެ ފުރުސަތު ދެނީ، ދުނިޔޭގެ ރޭންކިން ގަދަ 100 ގައުމުން އެކްރެޑިޓްކުރާ 100 ނޫސްވެރިންނާއި ފުޓްބޯޅަ ކޯޗުންނަށެވެ. މިދިޔަ އަހަރު ބެލޮންޑިއޯ އެވޯޑް ހޯދީ މެންޗެސްޓާ ސިޓީގެ ރޮޑްރީ އެވެ. މި ފަހަރުގެ ބެލޮންޑިއޯ ހަފްލާ އޮތީ އަންނަ މަހުގެ 22 ވަނަ ދުވަހު އެވެ.
