ދުނިޔޭގެ މައި ވޮލީބޯޅަ ޖަމިއްޔާ، އެފްއައިވީބީގެ ކޯޗިންގެ މަތީ ފާހެއް ކަމަށްވާ ލެވަލް ތިނެއް ފުރިހަމަކޮށް، ގައުމީ ތިން ވޮލީބޯޅަ ކޯޗުން ކަމަށްވާ މުހައްމަދު ސާޖިދު (ކާއްޓޭ)، އަހުމަދު އަދީލް (ބޭބެ) އަދި ސޮފްވާން އަހުމަދު (ސޮއްޕެ) ސެޓްފިކެޓް ހާސިލްކޮށްފި އެވެ.
ތައިލެންޑްގައި ކުރިއަށްދިޔަ މި ކޯހަށް، މި ތިން ކޯޗުން އެންޑޯޒްކުރީ ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިންނެވެ. ވީއޭއެމް އިން ބުނީ، ތިން ކޯޗުން މި ހާސިލްކުރީ ވަރަށް ހާއްސަ ކަމެއް ކަމަށާއި އެ ކޯޗުންގެ ތަޖުރިބާއާ އެކު، ރާއްޖޭގެ ވޮލީބޯޅައިގެ ޑިވެލޮޕްމަންޓަށް ގިނަގުނަ ގޮތްގޮތުން ފައިދާތަކެއް ކުރާނެ ކަމުގެ ޔަގީންކަން އެބައޮތް ކަމަށެވެ.
ވޮލީބޯޅައިގެ ކޯޗުންގެ ތެރެއިން، އެފްއައިވީބީ ލެވަލް އެކެއް އަދި ދޭއްގެ އިތުރުން ތިނެއް ފުރިހަމަކޮށްފައިވާ ކޯޗުން ރާއްޖޭގެ ވޮލީގައި އަންނަނީ ޑިވެލޮމްޕަންޓުގައި އަމިއްލަ ހައިސިއްޔަތުން ވެސް މުހިންމު މަސައްކަތަކެއް ކުރަމުންނެވެ.
ލެވަލް ތިނެއްގައި، ކޯޗުން ތިއަރީ ޓެސްޓްގެ ކަންކަން ފުރިހަމަކުރުމަށް ފަހު، އެސައިމަންޓެއް ހަދައި، އަމިއްލަ އަށް ޕްރެޒެންޓޭޝަނެއް ވެސް ދޭން ޖެހޭނެ އެވެ. އަދި މި ކަންކަން އެންމެ ފުރިހަމަ އަށް އެފްއައިވީބީން މި ކޯހަށް ކަނޑައަޅާ އިންސްޓްރަކްޓަރު އިވެލުއޭޓް ކުރާނެ އެވެ.
މި ފަހަރު ކޯޗިން ލެވަލް ތިނެއް ފުރިހަަމަކުރަމުން އަންނަ ކާއްޓޭ އަކީ ވީއޭއެމްގެ ސީނިއާ ނައިބު ރައީސް އެވެ. ކާއްޓޭ ވަނީ މީގެ ކުރިން، ގައުމީ ސީނިއާ ފިރިހެން ވޮލީބޯޅަ ޓީމުގެ ހެޑް ކޯޗުކަން އެކި ފަހަރު މަތިން ކޮށްފަ އެވެ. މީގެ އިތުރުން، ވީއޭއެމްގެ ޓެކްނިކަލް އެކިއެކި މަަސައްކަތްތަކެއް ކުރުމުގެ ޒިންމާ ވެސް އަދާކޮށްފައިވާ ކާއްޓޭ އަކީ އަމިއްލަ ހައިސިއްޔަތުން ވޮލީބޯޅަ ޑިވެލޮޕްމަންޓަށް ރަށްރަށުގައި ކޭމްޕް ހިންގައި، ގިނަ ކުޅުންތެރިންތަކެއް ގައުމީ ލެވަލަށް ވެސް ނެރެފައިވާ ފަރާތެކެވެ.
އަންހެން ވޮލީ ޓީމުތަކުގެ ކޯޗިން އިން ފެންނަ، ބޭބެ އަކީ ގައުމީ އަންހެން ވޮލީ ޓީމުގެ އެސިސްޓަންޓް ކޯޗަށް އެންމެ ފަހުން މަސައްކަތް ކުރެއްވި ފަރާތެކެވެ. އަދި މީގެ ކުރިން، ގައުމީ އަންހެން ވޮލީބޯޅަ ޓީމުގެ ކޯޗުކަން ވެސްކޮށް، ރާއްޖެ އަށް މެޑަލް ހޯދައިދޭން ވެސް އެހީތެރިވެފައިވާ ބޭބެ ވަނީ މީގެ ކުރިން ވޮލީ އެސޯސިއޭޝަންގެ ޖެނެރަލް ސެކްރެޓަރީގެ މަގާމު ވެސް އަދާކޮށްފަ އެވެ.
މި ކޯހުގައި ބައިވެރިވެ ނިންމާލުމަށް ފަހު، ބޭބެ، ސޯޝަލް މީޑިއާގައި ކޮށްފައިވާ ޕޯސްޓުގައި ބުނެފައިވަނީ މި ފަހަރު އިންސްޓްރަކްޓަރެއްގެ ގޮތުގައި މަސައްކަތްކުރި، ދުނިޔޭގެ ލެވަލްގައި ވެސް ފާހަގަކުރެވޭ އެމެރިކާގެ ޖޯން ކެސަލްގެ ފަރާތުން އުނގެނުމަށް ލިބުނު މި ފުރުސަތުގެ ސަބަބުން، ބޭބެ، ވޮލީ ކޯޗިން ކެރިއަރަށް ވެސް ރަނގަޅު ބަދަލުތަކެއް އަންނާނެ ކަމަށެވެ.
ގައުމީ އަންހެން ވޮލީބޯޅަ ޓީމުގެ ހެޑް ކޯޗަކަށް މި ވަގުތު ހުރި ސޮފްވާން މި ފަހުން ފާހަގަކުރެވުނީ، ޒުވާން އަންހެން ކުޅުންތެރިން ގޮވައިގެން ކާމިޔާބު މަސައްކަތްތަކެއްކޮށްފައިވާ ކޯޗެއްގެ ގޮތުގަ އެވެ. މި ވަގުތު ގައުމީ އަންހެން ޓީމުގެ ހެޑް ކޯޗަކަށް ހުރުމުގެ ކުރިން، ސޮފްވާން ވަނީ ގައުމީ އަންހެން ޓީމުގެ އެސިސްޓަންޓް ކޯޗެއްގެ ގޮތުގައި ވެސް މަސައްކަތްކޮށްފަ އެވެ.
