މާފަންނު ޝަހީދުއަލީ ހިނގުމުގައި ހުންނަ ކެފޭއެއްގައި މާރާމާރީއެއް ހިންގައި މީހަކު ޒަހަމުކޮށްލައިފި އެވެ.
މީޑިއާތަކަށް ފުލުހުން ފޮނުވި މެސެޖެއްގައި ބުނީ ޒަހަމުކޮށްލާފައި ވަނީ 44 އަހަރުގެ ދިވެހި ފިރިހެނެއް ކަމަށެވެ. އޭނާއަށް އައިޖީއެމް ހޮސްޕިޓަލުގައި ފަރުވާ ދެމުންދާ ކަމަށް ވެސް ފުލުހުން ބުންޏެވެ.
އެ މައްސަލަ އާ ގުޅިގެން އަދި މީހަކު ހައްޔަރު ކޮށްފައި ނުވާ ކަމަށާއި އެމައްސަލަ އިތުރަށް ތަހުގީގު ކުރަމުންދާ ކަމަށް ވެސް ފުލުހުން ބުންޏެވެ.
ސޯޝަލް މީޑިއާގައި ދައުރުވަމުންދާ ވީޑިއޯއަކުން، މި ހަމަލާގައި ޒަހަމްވީ މީހާ ސްޓްރެޗަރަކަށް ލައިގެން ގެންދާ މަންޒަރު ފެނެ އެވެ. އެކަމަކު އޭނާއަށް ލިބުނީ ކޮން ކަހަލަ އަނިޔާތަކެއް ކަމެއް އެ ވީޑިއޯ ބަލައިގެން ސާފެއް ނޫނެވެ.
މާފަންނު ކެފޭއެއްގައި މީހަކަށް ހަމަލާދީ ޒަހަމު ކޮށްލާފައި މިވަނީ ސިލްސިލާ ހަމަލާ ބަދަލު ކުރުންތަކެއް މާލޭގައި ހިންގަމުން ދާތާ ދުވަސްކޮޅެއް ފަހުންނެވެ.
ނަމަވެސް އެކަމާ ގުޅޭގޮތުން ރަސްމީ އިދާރާއަކުން މިރޭގެ ކުރިން އެއްވެސް މައުލޫމާތެއް ހާމައެއް ނުކުރެ އެވެ. އަދި މިއީ އެ މާރާމާރީތަކާ ގުޅިގެން ހިނގި ހާދިސާއެއް ކަމެއް ވެސް މިހާތަނަށް ސާފެއް ނޫނެވެ.
