ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތުގައި މިއަދު ހަވީރު ގދ. ފަރެސްމާތޮޑާ 3-0 އިން ބަލިކޮށް، ދ. ކުޑަހުވަދޫން މި ފަަހަރުގެ މުބާރާތުގައި ފުރަތަމަ މޮޅު ހޯދައިފި އެވެ.
ގްރޫޕް އޭގެ ފުރަތަމަ މެޗުން ކުޑަހުވަދޫ ވަނީ ފުވައްމުލަށް ސިޓީ އަތުން 3-1 އިން ބަލިވެފަ އެވެ. ފަރެސްމާތޮޑާ ފުރަތަމަ މެޗުގައި ދ. މީދޫ އަތުން ބަލިވީ 4-1 އިންނެވެ. މި ގްރޫޕްގައި އިއްޔެ ހަވީރު ކުޅުނު މެޗުން، ފުވައްމުލަކުން ވަނީ 7-3 އިން ހއ. ދިއްދޫ ބަލިކޮށްފަ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗަށް ކުޑަހުވަދޫގެ އަހުމަދު ރިލްވާން (ބެން) އާއި ޑިފެންޑަރު، މުހައްމަދު ސައިފް ހުރީ ފުރަތަމަ މެޗުގައި ދެއްކި ރަތް ކާޑާ އެކު ސަސްޕެންޝަންގަ އެވެ.
ފުރަތަމަ ހާފުގައި ކުޑަހުވަދޫ އިން އެޓޭކް ކުރި ނަމަވެސް، ފަރެސްމާތޮޑާ ގޯލަށް ބޯޅައެއް ވައްދާނުލެވުނެވެ. އަނެއްކޮޅުން ފަރެސްމާތޮޑާ އިން ވެސް ވަނީ ކުރިއަށް ޖެހި ކުޅެން މަސައްކަތްކޮށްފަ އެވެ.
މެޗުގައި ކުޑަހުވަދޫން ޖެހި ތިން ގޯލު ވެސް ކާމިޔާބުކުރީ ދެ ވަނަ ހާފުގަ އެވެ. އެ ގޮތުން، އެ ޓީމުގެ ފުރަތަމަ ލަނޑު ޖެހީ، ދެ ވަނަ ހާފުގެ ފުރަތަަމަ މިނިޓްގައި، ކުޑަހުވަދޫގެ މުހައްމަދު ޒިހާން ހުސެއިން ފޮނުވާލި ބޯޅައެއް ދިފާއުކުރަން އުޅުމުގެ ތެރޭގައި ފަރެސްމާތޮޑާ ކުޅުންތެރިން އަތުން ބައިކޮޅަށެވެ.
އޭގެ 10 ވަރަކަށް، މިނިޓް ފަހުން ޒިހާން ވަނީ އޭރިއާބޭރުން ފޮނުވާލި ބޯޅައަކުން ކުޑަހުވަދޫގެ ލީޑުފުޅާކޮށްދީފަ އެެވެ. މެޗުގެ 55 ވަނަ މިނިޓްގައި ޒިހާން ޖެހި ބޯޅަ ގޯލަށް ވަނީ ފަރެސްމާތޮޑާ ގޯލްކީޕަރު، އިބްރާހިމް ޝަމްހާން އަތުގައި ޖެހިފަ އެވެ.
ކުޑަހުވަދޫގެ ތިން ވަނަ ލަނޑު ވެސް ޖެހި ޒިހާން އެވެ. މެޗުގެ 63 ވަަަނަ މިނިޓްގައި ޒިހާން އޭރިއާބޭރުން ޖެހި ބޯޅަ ގޯލަށް ވަނީ ވެސް ކީޕަރު ޝަމްހާން އަތުގައި ޖެހިފަ އެވެ.
މިއީ، 2017 ވަަނަ އަހަރުގެ މިނިވަން ޗެމްޕިއަންޝިޕް ކާމިޔާބުކޮށް، އެ ފަހަރު ދިވެހި ޕްރިމިއާ ލީގުގައި ވެސް ކުޅުނު ކުޑަހުވަދޫން ހަތް ވަރަކަށް އަހަރު ތެރޭ ގަލޮޅު ދަނޑުގައި މޮޅުވި ފުރަތަމަ މެޗެވެ.
