ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތުގައި ހއ. ދިއްދޫގެ މައްޗަށް 7-3 އިން ކުރިހޯދައި ޏ. ފުވައްމުލަކު ސިޓީން މުބާރާތުގެ ދެ ވަނަ ބުރުގެ ފުރުސަތު ބޮޑުކޮށްފި އެވެ.
ފަސް ޓީމު ވާދަކުރާ ގްރޫޕް އޭ އިން ދެ ޓީމެއް ކަޓާއިރު، ފުވައްމުލަކުން މި ވަނީ ފުރަތަމަ ދެ މެޗުން މޮޅުވެފަ އެވެ. އެ ގޮތުން، އެ ޓީމުން ފުރަތަމަ މެޗުން ވަނީ ދ. ކުޑަހުވަދޫ ބަލިކޮށްފަ އެވެ. މި ގްރޫޕްގައި ދެން ކުޅުނު މެޗުން ދ. މީދޫން ވަނީ ގދ. ފަރެސްމާތޮޑާ ބަލިކޮށްފަ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގެ ފުރަތަމަ ހާފު ނިމުނުއިރު، ފުވައްމުލަކުން އޮތީ 3-2 އިން ކުރީގަ އެވެ.
ފުވައްމުލަކު ޓީމަށް މި މެޗުގައި، ތަފާތު ދެއްކި އެއް ކުޅުންތެރިއަކީ، ނިއު ރޭޑިއަންޓް ސްޕޯޓްސް ކްލަބަށް ކުރިން ދެ ވަނަ ޑިވިޝަނުގައި ކުޅުނު ގާނާގެ ފޯވާޑް، ކޯފީ އޮވޫސޫ އެވެ. އޭނާ ވަނީ މި މެޗުގައި ހެޓްރިކެއް ހަދައިފަ އެވެ. ފުވައްމުލަކު ޓީމުގެ އަނެއް ހަތަރު ލަނޑު ޖެހީ، ކުރިން އީގަލްސް އާއި ޔުނައިޓެޑް ވިކްޓަރީ (ޔޫވީ) އަށް ކުޅުނު އަލީ ޝަމާލް އަބްދުﷲ (ޝަންމު) ދެ ގޯލާއި މުހައްމަދު އިޔާޝް އަހުމަދު އަދި ހުސެން ޝަރީފް މުހައްމަދު އެވެ.
ދިއްދޫ ޓީމަށް މި މެޗުގައި ލަނޑުތައް ޖަހައިިދިނީ، ހުސެއިން ޝިފާހު ދެ ގޯލާއި އާދަމް އާޒިމް އެވެ. ޝިފާހު ޖެހި އެއް ގޯލު ކާމިޔާބުކުރީ ޕެނަލްޓީ އަކުންނެވެ.
މުބާރާތުގައި މިރޭ ކުޅޭ މެޗުގައި، ގްރޫޕް ޑީގައި ރ. އަލިފުށިން ކުޅޭނީ ބ. ކެންދޫއާ އެވެ.
