ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތުގައި މިރޭ ކުޅުނު މެޗުން ޅ. ނައިފަރުން 1-0 އިން ކ. މާފުށި އަތުން މޮޅުވެއްޖެ އެވެ.
މި ގްރޫޕްގައި ދެން ހިމެނެނީ، ރ. އަލިފުށްޓާއި ބ. ކެންދޫ އެވެ. އެ ދެ ޓީމު ބައްދަލުކުރާ މެޗު އޮންނާނީ ހޯމަ ދުވަހުގެ ރެ އެވެ.
ގަލޮޅު ދަނޑުގައި މިރޭ ކުޅުނު މެޗަށް ނުކުތްއިރު، ނައިފަރުގެ ކެޕްޓަނަކީ، ކުރިން ކްލަބް އީގަލްސް އާއި ކްލަބް ވެލެންސިއާ، ވިކްޓަރީ ސްޕޯޓްސް ކްލަބްގެ އިތުރުން ޒުވާން ގައުމީ ޓީމުތަކަށް ކުޅެފައިވާ ހުސެއިން ފައިސަލް (ފައިޓޯ) އެވެ.
އަނެއްކޮޅުން، މާފުށީގައި ހިމެނެނީ، މީގެ ކުރިން ދިވެހި ޕްރިމިއާ ލީގުގައި ދަ ގްރާންޑޭ ސްޕޯޓްސް ކްލަބްގައި ހިމެނިގެން ފުރަަތަމަ ޑިވިޝަނުގައި ކުޅެފައިވާ ކުޅުންތެރިންނެވެ.
ދެ ޓީމަށް ވެސް ލަނޑު ޖަހަން ފުރުސަތު ލިބިގެންދިޔަ މި މެޗުގައި، ފެނިގެންދިޔަ ހަމައެކަނި ލަނޑު ޖެހީ މެޗުގެ 58 ވަނަ މިނިޓްގަ އެވެ. މި ލަނޑު ޖެހީ ނައިފަރު ޓީމުގެ އިމްރާން މުހައްމަދު އެވެ. އޭރިއާތެރެއަށް އައި ބޯޅައެއް ހަމަޖެހިލައިފައި އިމްރާން ވަނީ ގޯލުގެ ތިރީ ކަނަށް ބޯޅަ ފޮނުވާލައިފަ އެވެ.
އަހުމަދު ޝަރީފް (ޑުންގާ)ގެ ކޯޗުކަމުގައި ކުޅޭ މާފުށިން ކުރިއަށްޖެހިގެން ކުޅެ ނަތީޖާ ހަމަހަމަކުރެވޭތޯ އެޓޭކަށް ކުޅުންތެރިން ގިނަ ކުރި ނަމަވެސް، ނައިފަރުގެ ޑިފެންސްލައިން ފޫއަޅުވައިލައި ގޯލެއް ޖެހޭގޮތެއްނުވެ، ފުރަތަމަ މެޗުން ބަލިވީ އެވެ.
