ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމީޓީ) ގެ ވިސްނުން ހުރީ އިޒްރޭލުގެ ހުރިހާ ރައްޔިތުންގެ ޕާސްޕޯޓު މަނާ ކުރުމުގެ ބަދަލުގައި، އިޒްރޭލު ސަރުކާރު އަދި އަސްކަރިއްޔާގައި ތިބި ޕާސްޕޯޓު ހޯލްޑަރުން ރާއްޖެ އައުން މަނާ ކުރުމަށް ކަން ހާމަކޮށްފި އެވެ.
މިއަދު ހެނދުނު ކުރިއަށްދިޔަ ކޮމިޓީ ބައްދަލުވުމުގައި ރާއްޖެއަށް އިޒްރޭލު ޕާސްޕޯޓުގައި އެތެރެވީ ކިތައް މީހުންނާއި ޑުއަލް ޕާސްޕޯޓު އޮންނަ މީހުންގެ ތެރެއިން އިޒްރޭލު ޕާސްޕޯޓު އޮންނަ މީހުންނާއި އަދި ބޭނުންވާ އެހެން ހުރިހާ ތަފާސްހިސާބެއް ހޯދުމަށް ދިއްގަރު ދާއިރާގެ މެންބަރު އަހްމަދު ނާޒިމް ވަނީ ހުށަހަޅުއްވާފަ އެވެ.
"ފްލޯގައި މީގެކުރިން ދެކެވުނު ވާހަކަތަކަށް ބަލާއިރު އަދި މި ކޮމިޓީގައި ބައެއް ބޭފުޅުން ދައްކަވާފައި ހުރި ވާހަކަތަކަށް ބަލާއިރު އަޅުގަނޑުމެންނަކަށް ބުރައެއް ނުވެވޭ ބްލޭންކެޓް ބޭންއެއް އިޒްރޭލު ޕާސްޕޯޓުގައި ވިތީ އިމްޕޯސް ކުރާކަށް. ސަބަބަކީ އެއީ އިޒްރޭލު ޕާސްޕޯޓު އޮންނަ އަރަބިން ވެސް މުސްލިމުން ވެސް އުޅޭތީ. ހަމައެއާ އެއްކޮށް ވާހަކަ ދެކެވިފައި އޮތީ މިގޮތަށް އދ. އިން ވެސް ސެންކްޝަންސް އިމްޕޯސް ކުރާއިރު މި ކުރަނީ މިލިޓަރީ އެންޓިޓީސްގައި އުޅޭ ފަރާތްތަކަށާއި, ހަމައެއާ އެއްކޮށް އިންސާނީ ހައްގުތައް ވަޔަލޭޓް ކުރުމުގެ ކަންތައްތަކުގައި އުޅޭ މީހުން," ނާޒިމް ވިދާޅުވި އެވެ.
ވާހަކަ ކުރިއަށްގެންދަވަމުން ނާޒިމް ވަނީ އިޒްރޭލު ޕާސްޕޯޓު އޮންނަ މީހުންގެ ތެރެއިން އެ ގައުމުގެ ސަރުކާރަށް ނިސްބަތްވާ ނޫނީ އަސްކަރިއްޔާއަށް ނިސްބަތްވާ މީހުންނަށް ރާއްޖެ އެތެރެ ނުވެވޭ ގޮތް ހެދުމަކީ ވެސް ނިންމިދާނެ ނިންމުމެއް ކަމަށް ވިދާޅުވެފަ އެވެ.
އެ މައްސަލާގައި އެންމެ ފުރަތަމަ ބޭނުންވާ އިދާރާތަކުން ލިޔުމުން ޖަވާބު ހޯދުމަށް އެއް ހަފްތާގެ މުއްދަތެއް ދިނުމަށް ވަނީ ނިންމާފަ އެވެ. ލިޔުމުން ޖަވާބު ހޯދުމަށް ފަހު ކޮމިޓީއަށް ހާޒިރުކޮށްގެން މައުލޫމާތު ހޯދަން ބޭނުންވާ އިދާރާތަކުން އެ މައުލޫމާތުތައް ހޯދަން ވަނީ ނިންމާފަ އެވެ.
241 ކޮމިޓީން ބައްދަލުކުރަން ބޭނުންވާ އިދާރާތަކުގެ ލިސްޓު
- ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ).
- އަދާލަތު ޕާޓީޖުމްހޫރީ ޕާޓީޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް).
- މޯލްޑިވްސް ޑިވެލޮޕްމަންޓު އެލަޔަންސް (އެމްޑީއޭ).
- މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ).
- ޕީޕަލްސް ނޭޝަނަލް ކޮންގްރެސް (ޕީއެންސީ).
- މޯލްޑިވްސް ނޭޝަނަލް ޕާޓީ (އެމްއެންޕީ).
- ދަ ޑިމޮކްރެޓްސް.
- ޕީޕަލްސް ނޭޝަނަލް ފްރޮންޓް (ޕީއެންއެފް).
- އެޓާނީ ޖެނެރަލް އޮފީސް، އިކޮނޮމިކް މިނިސްޓްރީ، ޓޫރިޒަމް މިނިސްޓްރީ، ފޮރިން މިނިސްޓްރީ، މޯލްޑިވްސް އިމިގްރޭޝަން. މަޓީ އަދި މަދަނީ ޖަމިއްޔާތައް.
އެ އިދާރާތަކަށް މިއަދު ސިޓީ ފޮނުވައި ލިޔުމުން ޖަވާބު ހޯދުމަށް ކޮމިޓީން ވަނީ ފާސްކޮށްފަ އެވެ.
ފަލަސްތީނުގައި އިޒްރޭލުން ހިންގަމުންދާ ގަތުލްއާންމާ ގުޅިގެން އިޒްރޭލުގެ ރައްޔިތުން ރާއްޖެއަށް އެތެރެވުން މަނާ ކުރުމުގެ ގޮތުން އެ ގައުމުގެ ރައްޔިތުންގެ ޕާސްޕޯޓު މަނާ ކުރުމަށް އިމިގްރޭޝަން ގާނޫނު އިސްލާހު ކުރުމަށް ބިލު ހުށަހެޅީ ގަލޮޅު ދެނުނު ދާއިރާގެ މެންބަރު މީކާއިލް އަހުމަދު ނަސީމު އެވެ.
އެ މައްސަލަ އިބްތިދާއީ ބަހުސްއަށް ފަހު ބަލައިގަތުމަށް ނިންމައި ކޮމިޓީއަށް ފޮނުވާފައި ވަނީ ޖޫން 10، ގައެވެ. އެއަށްފަހު އެ މައްސަލަ ކޮމިޓީގައި ތާށިވެފައި އޮތުމަށްފަހު މަސައްކަތް ކުރިއަށް ގެންގޮސްފައި ވަނީ މިއަދު އެވެ.
ބިލުގެ މައްސަލަ ކުރިއަށް ނުގޮސް ކޮމިޓީގައި ތާށިވެފައި އޮތުމުން ސަރުކާރުގެ އިތުރުން މަޖިލީހުގެ މެޖޯރިޓީ އޮންނަ ސަރުކާރުގެ ޕީއެންސީއަށް ވެސް އަންނަނީ ބޮޑެތި ފާޑު ކިޔުންތައް އަމާޒުވަމުންނެވެ. އެގޮތުން އިއްޔެ އެ މައްސަލަ އަވަސް ކުރުމަށް ހުށަހެޅި ގަގާރު ވެސް މަޖިލީހުން ވަނީ ބޭރުކޮށްފަ އެވެ.
