އަންނަ ބުރާސްފަތި ދުވަހު ފަށަން ނިންމާފައިވާ ދިވެހި ޔޫތު ލީގުގެ ސަބަބުން ރާއްޖޭގެ ފުޓްބޯޅަ އަށް ފައިދާކުރާނެ ކަމަށް އެ ލީގުގެ ޓެކްނިކަލް ޑިރެކްޓަރެއްގެ ގޮތުގައި މަސައްކަތް ކުރަން ނިންމާފައިވާ، މަޝްހޫރު ކޯޗު އިހުސާން އަބްދުލް ގަނީ (ސާންތީ) ބުނެފި އެެވެ.
ފުޓްބޯޅަ ކޯޗެއްގެ ގޮތުގައި ވެސް ޔޫތު ޑިވެލޮޕްމަންޓަށް ގިނަގުނަ ހިދުމަތްތަކެއް ކޮށްދީފައިވާ ސާންތީ ވަނީ، އެފްއޭއެމްގެ ޓެކްނިކަލް ޑިރެކްޓަރެއްގެ ގޮތުގައި މަސައްކަތްކުރިއިރު، ޔޫތު ލީގެއް ބާއްވައި، ފުޓްބޯޅައިގެ ގްރާސްރޫޓު ރަނގަޅުކުރަން މުހިންމު މަސައްކަތްތަކެއް ކޮށްފަ އެވެ.
ދިވެހި ޔޫތު ލީގުގެ ވެބްސައިޓަށް ދިން އިންޓަވިއުއެއްގައި، އެ ލީގުގެ ޓެކްނިކަލް ޑިރެކްޓަރުގެ މަގާމާ ހަވާލުވުމާ ބެހޭގޮތުން ސާންތީ ބުނެފައިވަނީ، މި ލީގު ބާއްވަން ގަސްދުކުރާ ހައިބަތާއި މި ލީގު ބޭއްވުމުގެ މަގްސަދުގެ ސަބަބުން މި ކަމުގައި ބައިވެރިވުމުގެ ޝައުގުވެރިކަން އުފެދުނީ ކަމަށެެވެ.
"އުންމީދަކީ ރާއްޖޭގެ ފުޓްބޯޅައިގެ ޔޫތު ޑިވެލޮޕްމަންޓަށް ބަލާއިރު ބޮޑު ފިޔަވަޅެއް ކުރިއަށް އެޅޭނެ މުބާރާތަކަށް ދިވެހި ޔޫތު ލީގު ވެގެންދިއުން،" ސާންތީ ބުންޏެވެ.
ޔޫތު ލީގު ކުރިއަށްދާނީ އަށް ކްލަބެއްގެ މެދުގައި، ތިން އުމުރުފުރާ ކެޓަގަރީ އަކުންނެވެ. އެއީ، 12 އަހަރުން ދަށާއި 14 އަހަރުން ދަށް އަދި 16 އަހަރުން ދަށަށެވެ. ބައިވެރިވެފައިވާ ކްލަބްތަކަކީ، މާޒިޔާ ސްޕޯޓްސް އެންޑް ރެކްރިއޭޝަން، ސުޕަ ޔުނައިޓެޑް ސްޕޯޓްސް (ސަސް)، ޔުނައިޓެޑް ވިކްޓަރީ، ކްލަބް އީގަލްސް، ޓީސީ ސްޕޯޓްސް ކްލަބް، ކްލަބް ވެލެންސިއާ، ވިކްޓަރީ ސްޕޯޓްސް ކްލަބް އަދި ހުއްރިއްޔާ ސްޕޯޓްސް ކްލަބް (ހުރާ) އެވެ.
ޔޫތު ލީގުގެ ތެރެއިން، ސާންތީ ކުރަން ނިންމާފައިވާ މަސައްކަތްތަކުގެ ތެރެއިން އެއް ކަމަކީ، ހުނަރުވެރި ކުޅުންތެރިން ފާހަގަކޮށް، އެ ކުޅުންތެރިންނަށް ރާއްޖޭގެ ފުޓްބޯޅަ ސިސްޓަމްގެ ތެރެއިން ކުރިއަށްދާން މަގުކޮށައިދީ ގައުމީ އަދި ބައިނަލްއަގުވާމީ ލެވަލްގައި ކެރިއަރެއް ބިނާކުރަން އެހީތެރިވެދިނުމެވެ.
އެ ގޮތުން، ދިވެހި ޔޫތު ލީގުގެ އެންމެ ބޮޑު އެއް މަގުސަދަކީ ކުޅުންތެރިންނަށް ދެމެހެއްޓެނިވި ގޮތެއްގައި މެޗުތަކެއް ކުޅެވޭނެ ގޮތެއް ހޯދައިދިނުން ކަމަށްވާއިރު، ސާންތި ދެކޭގޮތުގައި މިއީ ކުޅުންތެރިން ޑިވެލޮޕްކުރުމުގައި އެންމެ ބޮޑު އިސްކަމެއް ދީގެން ކުރަން ޖެހޭ ކަންތައް ކަމަށެވެ.
ކުޅުންތެރިއެއްގެ ކުރިއެރުން ބަރާބަރަށް ވަޒަންކުރެވޭނެ ގޮތަކީ، ގަވާއިދުން މެޗު ކުޅުން ކަމަށާއި އޭރުން ކުޅުންތެރިޔާ ފިޒިކަލީ، މެންޓަލީ، ޓެކްނިކަލީ އަދި ޓެކްޓިކަލީ ޑިވެލޮޕްވާގޮތް ދެނެގަނެވޭނެ ކަމަށް ވެސް ސާންތީ ފާހަގަކުރި އެވެ.
އެންމެ ބޮޑު އުންމީދަކީ، މި މުބާރާތް ފޯރިގަދަ މާހައުލެއްގައި ކުރިއަށް ގޮސް، މިއީ ކޮންމެ އަހަރަކު ވެސް ކުޅުންތެރިންނަށް ކުޅެވޭ މުބާރާތަކަށް ވުން ކަމަށް ވެސް ސާންތީ ބުނެފައިވެ އެވެ. އަދި ކުޅުންތެރިންނަށް އާއިލާ އާއި މި ކަމުގައި ޝާމިލުވެ އުޅޭ އެންމެން ދޭ ސަޕޯޓް ފާހަގަކޮށް، ސާންތީ ބުނީ، ކުޅުންތެރިންނަށް ހިތްހަމަޖެހިގެން ކުޅެ، ފުޓްބޯޅައިން ކުރިއަށްދެވޭނެ ގޮތަށް، ފެއާޕްލޭގެ އުސޫލުތަކާ އެއްގޮތަށް މި މުބާރާތުގެ ކަންކަން ދިއުމަށް ހާއްސަ އަހައްމިއްޔަތުކަމެއް ދިނުން މުހިންމު ކަމަށެވެ.
