މީޑިއާގެ ކޮންޓްރޯލް ސަރުކާރަށް ލިބޭ ގޮތަށް ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރު ހުށަހެޅުއްވި ބިލު އޭނާ އަނބުރާ ގެންގޮސްފި އެވެ.
މި ބިލު މަޖިލީހަށް ހުށަހެޅީ ނޮވެމްބަރު 12، ގަ އެވެ. މަޖިލީހަށް ބިލު ބަލައިގަތުމަށް މިހާތަނަށް ވޯޓެއް ނަގާފައެއް ނުވެ އެވެ. ނޫސްތަކާއި ޓީވީ ޗެނަލްތައް އަދި ވަކިވަކި ނޫސްވެރިން ޖޫރިމަނާ ކުރެވޭ ގޮތަށް އޮތް މި ބިލާ ގުޅިގެން ނޫސްވެރިންނާއި، ދިވެހި އަދި ބައިނަލްއަގުވާމީ ޖަމާއަތްތަކުން ވެސް ވަނީ ކަންބޮޑުވުން ފާޅުކޮށްފަ އެވެ.
މިކަމާ ގުޅިގެން "އަދަދު" އާ ވާހަކަ ދައްކަވަމުން ހަންނާނު ވިދާޅުވީ ބިލު މިހާރު އަނބުރާ ގެނެސްފައިވާ ކަމަށެވެ.
"ވާގޮތަކީ 75 މެންބަރުންގެ ތާއީދު ލިބޭނެ ކަމަށް އަޅުގަނޑަށް ނުފެންނާތީ [ބިލު އަނބުރާ ގެންދިޔައީ]. އެއްވެސް ވަރަކަށް ބަޔަކާ މަޝްވަރާ ކޮށްފައެއް ނޫން ބިލު ހުށަހެޅީ. ނަމަވެސް ރައީސް ޑރ. މުހައްމަދު މުއިއްޒު ވެސް ބިލަށް ތާއީދު ނުކުރައްވާ ކަމަށް ވަނީ ވިދާޅުވެފަ،" ހަންނާނު ވިދާޅުވި އެވެ.
މި ބިލަކީ އަމިއްލަ މެންބަރު ލައްވާ ސަރުކާރުން ހުށަހެޅި ބިލެއް ކަމަށާއި ބޭނުމަކީ މީޑިއާތައް ކޮންޓްރޯލް ކުރުން ކަމަށް ތަކުރާރުކޮށް ނޫސްވެރިންނާއި ސިޔާސީ ފަރާތްތަކުން ވެސް ދިޔައީ ބުނަމުންނެވެ.
ބިލާ ގުޅިގެން އަމާޒުވި ފާޑުކިޔުންތަކަށް ސަރުކާރަށް އަހަރެއް ފުރިގެން ބޭއްވި ޖަލްސާގައި ރައީސް މުއިއްޒު ވަނީ ރައްދު ދެއްވައިފަ އެވެ. އެމަނިކުފާނު ވިދާޅުވީ މީޑިއާތައް ކޮންޓްރޯލް ކުރުމަކީ އެމަނިކުފާނުގެ ސިޔާސަތެއް ނޫން ކަމަށެވެ.
މީޑިއާ ކޮންޓްރޯލް ކުރުމުގެ ބަދަލުގައި މަސައްކަތް ކުރައްވާނީ މީޑިއާތައް ބާރުވެރި ކުރުވަން ކަމަށް ވެސް ރައީސް މުއިއްޒު ވިދާޅުވި އެވެ.
"މިހާރު ހުށަހަޅާފައި އޮތް މީޑިއާ ބިލަކީ އަޅުގަނޑު ގަބޫލުކުރާ ސިޔާސަތުތަކެއް ހުރި ބިލެއް ނޫން. އަޅުގަނޑެއް ނޫޅެން މީޑިއާތައް ކޮންޓްރޯލް ކުރާ ހިތަކުންނެއް. އަޅުގަނޑަކީ މީޑިއާތައް ކޮންޓްރޯލް ކުރަން އުޅޭ މީހެއް ނޫން. އަޅުގަނޑު ބޭނުންވަނީ މިހާރަށް ވުރެ ވެސް ބޮޑަށް މީޑިއާތަކަށް މިނިވަންކަން ދޭން," އާދިއްތަ ދުވަހުގެ ރޭ ބޭއްވި ޖަލްސާގައި ރައީސް ވިދާޅުވި އެވެ.
