ތަހުގީގީ ނޫސްވެރިޔާ ޑެފްނީ ކަރޫއާނާ ގަލީޒިއާ މަރާލި މައްސަލައިގައި ދައުވާ އުފުލާފައިވާ މޯލްޓާގެ ވިޔަފާވެރިޔާ، ޔޯގެން ފެނެކްގެ މައްޗަށް ކުށް ސާބިތުނުވާ ކަމަށް ކޯޓުން ނިންމައިފި އެވެ.
އުމުރުން 44 އަހަރުގެ ފެނެކްގެ މައްޗަށް ދައުލަތުން އުފުލާފައިވަނީ ނޫސްވެރިޔާ މަރާލުމުގައި ބައިވެރިވުމުގެ ދައުވާއާއި، މީހަކު މަރާލުމަށް ރޭވުމުގެ ކުށުގެ ދައުވާ އެވެ. ނަމަވެސް، ޝަރީއަތުގައި އޭނާ ވަނީ މި ހުރިހާ ދައުވާތަކަކަށް އިންކާރުކޮށްފަ އެވެ.
ސަރުކާރަށް ވަރަށް ބޮޑަށް ފާޑުކިޔައި، މޯލްޓާ އާއި ގައުމުން ބޭރުގައި ހިންގާ ކޮރަޕްޝަންގެ ބޮޑެތި ވިއުގަތައް ފަޅާއަރުވަމުންދިޔަ ކަރޫއާނާ ގަލީޒިއާ މަރާލި މައްސަލައިގައި، 2022 ވަނަ އަހަރު ދެބެއިން ކަމަށްވާ ޖޯޖް އަދި އަލްފްރެޑް ޑެގިއޯޖިއޯގެ މައްޗަށް ކުށް ސާބިތުވެ 40 އަހަރުގެ ޖަލު ހުކުމެއް ވަނީ އިއްވާފަ އެވެ.
ކަރޫއާނާ ގަލީޒިއާ މަރާލާފައިވަނީ 2017 ވަނަ އަހަރުގެ އޮކްޓޫބަރު މަހުގެ ތެރޭގައި، އޭނާ ދަތުރުކުރި ކާރުގައި ބޮމެއް ގޮއްވާލައިގެންނެވެ. އެ ދުވަސްވަރު ގިނަ ބަޔަކު ތުހުމަތުކުރި ގޮތުގައި، މި މަރުގެ ފަހަތުގައި ސަރުކާރާއި ދައުލަތުގެ އިސް ފަރާތްތަކެއްގެ އަތެއްވެ އެވެ.
ރޮއިޓާސް ނިއުސް އެޖެންސީން ރިޕޯޓްކޮށްފައިވާ ގޮތުގައި، މި މައްސަލަ ބެލި ޖޫރީން އަށް ގަޑިއިރަށްވުރެ ގިނަ އިރު މަޝްވަރާކުރުމަށްފަހު، ފެނެކްގެ މައްޗަށް އުފުލި ދެ ދައުވާ ވެސް ސާބިތުނުވާ ކަމަށް ނިންމީ ޖޫރީގެ އަށް މެންބަރުންގެ އަގުލަބިއްޔަތުންނެވެ.
މޯލްޓާގެ ވެރިރަށް ވެލެޓާގައި ހުންނަ ކޯޓު ރޫމް ފުރިފައި އޮތްއިރު، ހުކުމް އިއްވުމާއެކު ފެނެކްގެ އާއިލާގެ މެންބަރުން އުފަލުން ހަޅޭއްލަވަން ފެށި ކަމަށާއި، ނަމަވެސް ކަރޫއާނާ ގަލީޒިއާގެ އާއިލާގެ މެންބަރުން ތިބީ ހިތާމަފާޅުކުރަން ކަމަށް ރޮއިޓާސްއިން ބުނެފައިވެ އެވެ.
"ޑެފްނީގެ އަނިޔާވެރި މަރަށް ނުވަ އަހަރު ވެގެންދިޔައިރުވެސް، އޭނާ މަރާލުމަށް މަގުފަހިވި މުއައްސަސާތަކުގެ ނުކުޅެދުންތެރިކަމަށް އެއްވެސް ހައްލެއް ލިބި، އިސްލާހެއް ނުކުރެވޭ،" މޯލްޓާގެ މީޑިއާތަކުން ރިޕޯޓްކޮށްފައިވާ ކަރޫއާނާ ގަލީޒިއާގެ އާއިލާގެ ބަޔާނުގައިވެ އެވެ.
އެ އާއިލާއިން އިތުރަށް ބުނެފައިވަނީ، ދާއިމީ އިންސާފަކީ އެހެން އެއްވެސް މީހަކަށް މިފަދަ ނުރައްކަލަކާ ކުރިމަތިލާން ނުޖެހުން ކަމަށާއި، ޑެފްނީގެ ފުރާނަ ސަލާމަތްކުރުމުގައި ގައުމު ނުކުޅެދިފައިވާތީ، އެހެން މީހުންގެ ފުރާނަ ސަލާމަތްކޮށްދިނުމަކީ ދައުލަތުގެ މައްޗަށް އޮތް ވާޖިބެއް ކަމަށެވެ.
ޑެފްނީ ކަރޫއާނާ ގަލީޒިއާ ބައިނަލްއަގުވާމީ ސަމާލުކަމަށް އައީ އޭނާގެ "ރަނިން ކޮމެންޓްރީ" ބްލޮގް މެދުވެރިކޮށް ކޮރަޕްޝަނާއި، މަނީ ލޯންޑަރިން އަދި ރޭވުންތެރިކަމާއެކު ހިންގާ ކުށްތަކާ ގުޅޭގޮތުން ކުރި ތަހުގީގީ ރިޕޯޓުތަކުގެ ސަބަބުންނެވެ.
އޭނާއަކީ 2016 ވަނަ އަހަރު ޕެނަމާގެ ލޯ ފާމަކުން ލީކުވި ސިއްރު ލިޔެކިޔުންތަކުގެ މައްޗަށް ބިނާކޮށް ހިންގި "ޕެނަމާ ޕޭޕާސް" ތަހުގީގުގައި އިސް ދައުރެއް އަދާކުރި ނޫސްވެރިއެކެވެ. އެ ތަހުގީގުން ވަނީ މޯލްޓާ ސަރުކާރުގެ އިސް އޮފިޝަލުންތަކެއްގެ ކޮރަޕްޝަންގެ މައްސަލަތަކާއި، ގަވާއިދާ ހިލާފަށް ފައިސާ ރައްކާކުރަން ހަދާފައިވާ އޮފްޝޯ ނެޓްވޯކްތައް ފަޅާއަރުވާލާފަ އެވެ.
އުމުރުން 53 އަހަރުގައި ކަރޫއާނާ ގަލީޒިއާ މަރާލުމާ ގުޅިގެން، އެ ދުވަސްވަރު މޯލްޓާގެ މަގުތަކުގައި އާންމުން ނުކުމެ ބޮޑެތި މުޒާހަރާތަކެއްކޮށް، ނުރުހުން ފާޅުކޮށްފައިވެ އެވެ.
