ބެސްޓް ބައި މޯލްޑިވްސް ޕްރައިވެޓް ލިމިޓެޑް (ބީބީއެމް) ގެ ފަރާތުން ކޮންމެ އަހަރަކު ކުރިއަށްގެންދާ ހޭންޑް ވޮޝިން ކެމްޕޭނުގެ ދަށުން މި އަހަރުގެ ދެވަނަ ހަރަކާތް އަހުމަދިއްޔާ އިންޓަނޭޝަނަލް ސްކޫލުގައި ފަށައިފި އެވެ.
އެ ސްކޫލުގެ ގްރޭޑް އެކެއް، ދޭއް، ތިނެއް އަދި ހަތަރެއްގެ ދަރިވަރުން ހިމެނޭގޮތަށް ސްކޫލް ހޯލުގައި ކުރިއަށް ގެންދާ ހަރަކާތުގައި ފެނާއި ސައިބޯނި ބޭނުންކޮށްގެން އަތް ސާފުކުރުމުގެ ހަތް މަރުހަލާ ދަސްކޮށްދިނުމާއި އެގޮތަށް އަތްދޮވުމުގެ ސެޝަންތަކެއް ކުރިއަށް ގެންދިޔުމަށް ވަނީ ހަމަޖެހިފަ އެވެ.
އެ ހަރަކާތް ކުރިއަށްދާނީ މޯލްޑިވްސް އެމްއާރުސީގެ ވޮލަންޓިއަރުންގެ އެހީތެރިކަމާއެކުއެވެ.
ހަރަކާތުގައި ދަރިވަރުންގެ ބައިވެރިވުން އިތުރަށް ޝައުގުވެރިކުރުވުމަށް ތަފާތު ތިން ކުޅިވަރަކާއި އަދި ދުވަހާއި ގުޅޭ ގޮތުން ދަރިވަރުންގެ މައުލޫމާތު ދިނުމަށް ކުރެހުމުގެ ސެޝަންތަކެއްވެސް ކުރިއަށްދާނެވެ.
އަދި ހަރަކާތުގައި ބައިވެރިވާ ދަރިވަރުންނަށް ލައިފްބޯއީގެ ހަދިޔާ އެއް ދިނުމަށް ވަނީ ހަމަޖެހިފަ އެވެ.
ގްލޯބަލް ހޭންޑް ވޮޝިން ޑޭގައި ކުރިއަށް ގެންދިޔަ ހަރަކާތުގެ ތެރެއިން
ކޮންމެ އަހަރެއްގެ އޮކްޓޯބަރު 15، އަކީ ގްލޯބަލް ހޭންޑް ވޮޝިން ޑޭ ގެގޮތުގައި ދުނިޔޭގައި ފާހަގަ ކުރަމުން އަންނަ ދުވަހެވެ. ބީބީއެމްގެ ފަރާތުން މި އަހަރުގެ ހަރަކާތްތަށް ފަށާފައި ވަނީ އޮކްޓޯބަރު މަހުގެ ތެރޭގައި ކަމަށްވާއިރު، އިތުރު ސްކޫލުތަކުގައި މި މަހުގެ ނިޔަލަށް ހަރަކާތްތައް ކުރިއަށް ގެންދާނެ އެވެ.
"މި ހަރަކާތް ސްކޫލުތަކުގައި ކުރިއަށްގެންދިއުމުގެ ފުރުސަތުހުޅުވާލާ އަޅުގަނޑުމެންވާނީ ސްކޫލުތަކަށް ދައުވަތުއަރުވާފައި. އަދި މިކަމަކީ މިފަދަ މުހިންމު މަގްސަދެއް އަދި މުނާސަބަތަކާއި ގުޅޭ ކަމަކަށްވާއިރު މިއަށްވުރެން ވެސް ފުޅާކޮށް މިކަމުގައި ގިނަ ސްކޫލުތަކާއި ދަރިވަރުންގެ ބައިވެރިވުން ހިމެނޭނެގޮތަކަށް ކުރިއަށް އޮތް އަހަރު މިކަން ކުރުމަށް އަޅުގަނޑުމެން އެދެން،" ބެސްޓްބައި އިން ބުންޏެވެ.
ގްލޯބަލް ހޭންޑް ވޮޝިން ޑޭއާ ގުޅިގެން ލައިފްބޯއީގެ ފަރާތުން ދުނިޔޭގެ އެކި ސަރަހައްދުތަކުގައި ކުރިއަށް ގެންދާ އެ ހަރަކާތުގެ މަގްސަދަކީ ފެނާއި ސައިބޯނި ބޭނުންކޮށްގެން އަތްދޮވުމުގެ މުހިންމުކަން މުޖުތަމައުގެ ކުޑަކުދިންނަށް އުނގަންނައިދިނުމެވެ.
މިގޮތުން ރާއްޖޭގައި މިހަރަކާތް ކުރިއަށް ގެންދަނީ ސްކޫލުތަކުގެ ދަރިވަރުންނަށް އަމާޒުކޮށްގެންނެވެ.
އެ ހަރަކާތާއި ގުޅޭ އިތުރު މައުލޫމާތު ސާފުކުރައްވަން ބޭނުންވާނަމަ 7771741 ނަންބަރަށް ގުޅުމަށް ވަނީ އެދިފަ އެވެ.
