ގެދޮރުވެރިޔާ ސްކީމުގެ ދަށުން ފުރަތަމަ 4000 ފުލެޓު ލިބޭ މީހުންގެ ލިސްޓު މިއަދު ވެސް އާންމު ނުކުރާނެކަން ހައުސިން މިނިސްޓަރު ޑރ. އަލީ ހައިދަރު ހާމަކުރައްވައިފި އެވެ.
ހިޔާވަހި ފައިނޭންސިން ސްކީމްގައި ބައިވެރިވުމަށް ދިމަވާ ދަތިތަކާ ގުޅޭ ގޮތުން ބޭއްވި ނޫސްވެރިންގެ ބައްދަލުވުމުގައި މިއަދު ފުލެޓު ލިސްޓު އިއުލާނު ކުރާނެތޯ "އަދަދު" އިން ސުވާލު ކުރުމުން ހައިދަރު ވިދާޅުވީ، މިނިސްޓަރީން ނިންމާފައި އޮތީ މި ހަފުތާ ނިމުމުގެ ކުރިން ލިސްޓު އިއުލާނު ކުރަން ކަމަށެވެ.
"މި ހަފުތާގެ ނިޔަލަށް އަޅުގަނޑުމެން އިއުލާނު ކުރަން ނިންމާފައި އޮތީ އިނގޭތޯ؟" ހައިދަރު ވިދާޅުވި އެވެ.
އެއީ ކޮން ދުވަހެއް ތޯ ސުވާކު ކުރުމުން، ޖަވާބެއް ދިނުމުގެ ބަދަލުގައި ހައިދަރު ސުވާލު ކުރެއްވީ ހަފުތާ ފެށެނީ ކޮން ދުވަހަކުތޯ އެވެ. އެއަށްފަހު ވިދާޅުވީ ހަފުތާ ފެށޭ ދުވަހުގެ އެއް ދުވަސް ކުރިން ފުލެޓު ލިސްޓު އިއުލާނު ކުރައްވާނެ ކަމަށެވެ.
"ހަފުތާ ނިމޭ ދުވަސް،.. ހަފުތާ ފެށެނީ ކޮން ދުވަހަކުތޯ؟ އާދެ އެހެންވީމާ އަދިވެސް ހަމަ ތަކުރާރުކޮށް އަޅުގަނޑު ދަންނަވާނަން ހަފުތާ ފެށޭ ދުވަހުގެ ކުރީ ދުވަހު އިނގޭތޯ؟" ހައިދަރު ވިދާޅުވި އެވެ.
ރީއިވެލުއޭޓު ކުރުމަށް ފަހު ފުލެޓު ލިސްޓު އިއުލާނު ކުރާނެ ކަމަށް ހައުސިިިން މިނިސްޓަރީން މީގެ ކުރިން ބުނީ އޮކްޓޫބަރު މަހުގެ ފަހު ހަފުތާގަ އެވެ. ނަމަވެސް އިތުރު ވަގުތު ބޭނުންވާ ކަމަށް ބުނެ މި ހަފުތާއަށް ފަސް ކުރީ އެވެ.
ހައުސިން މިނިސްޓަރީން އޮކްޓޫބަރު 28 ގައި ނެރުނު ބަޔާނުގައި ބުނެފައި އޮތީ މި ހަފުތާ ނިމުމުގެ ކުރިން ފުލެޓު ލިސްޓު އިއުލާނު ކުރާނެ ކަމަށެވެ. އެހެންކަމުން ގިނަ ބަޔަކު އުއްމީދު ކޮށްގެން ތިބީ މިއަދު ފުލެޓު ލިސްޓު އިއުލާނު ކުރާނެ ކަމަށެވެ.
ނަމަވެސް ހައިދަރު މިއަދު ވިދާޅުވި ގޮތުން، ފުލެޓު ލިސްޓު އާންމު ކުރާނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވެރިކަމަށް އެއް އަހަރު ފުރޭ، ނޮވެމްބަރު 17 ގެ އެއް ދުވަސް ކުރިންނެވެ. އެއީ އަންނަ ހޮނިހިރު ދުވަހެވެ.
މިދިޔަ ޖުލައި 29، ގައި ރައްޔިތުންގެ މަޖިލީހުގެ ޕެޓިޝަން ކޮމެޓީއަށް މިނިސްޓަރު ހައިދަރު ހާޒިރުކޮށް ސުވާލު ކުރުމުން އޭނާ ވިދާޅުވީ މަސައްކަތް ކުރަމުން ދަނީ ގެދޮރުވެރިޔާ ސްކީމުގެ ދަށުން ދޫކުރުމަށް އަޅާ އިމާރާތްތަކުގެ މަސައްކަތްތައް ނިމުމުގެ ކުރިން ފުލެޓު ލިބޭ މީހުންގެ ފައިނަލް ލިސްޓެއް އެކުލަވައިލެވޭތޯ ކަމަށެވެ.
ގެދޮރުވެރިޔާ ސްކީމުގެ ދަށުން ދޫކުރަން އިންޑިއާގެ އެހީތެރިކަމާއެކު ހުޅުމާލޭގައި އިމާރާތް ކުރި 700 ހައުސިން ޔުނިޓުގެ މަސައްކަތްތައް ނިންމައި މިދިޔަ މަހުގެ ހަތް ވަނަ ދުވަހު އެ ގައުމުގެ ސަރުކާރުން ވަނީ ރާއްޖޭގެ ސަރުކާރާ އެ ތަންތަން ހަވާލުކޮށްފަ އެވެ.
މިދިޔަ ސަރުކާރުގެ ގެދޮރުވެރިޔާ ސްކީމަށް ފޯމު ހުށަހެޅި މީހުންގެ ތެރެއިން 15،046 މީހުން ޝަރުތު ހަމަވާ ކަމަށް އޭރުގެ ސަރުކާރުން ކަނޑައެޅި އެވެ. އެމްޑީޕީ ސަރުކާރުން ނިންމީ އެ ހުރިހާ އެންމެންނަށް ވެސް ފުލެޓު ދިނުމަށެވެ.
އޭގެ ތެރެއިން އެންމެ ފުރަތަމަ ފުލެޓު ލިބޭ 4000 މީހުންގެ ލިސްޓު އިއުލާނު ކުރިފަހުން އޭސީސީއަށް ހުށަހަޅުނު މައްސަލައަކާ ގުޅިގެން ފުލެޓުތަކުގެ މަސައްކަތް ވަގުތީ ގޮތުން ހުއްޓައިލަން އެ ކޮމިޝަނުން އެންގި އެވެ.
އޭގެ ފަހުން އޭސީސީން ހިންގި ތަހުގީގަށް ފަހު މިދިޔަ ސަރުކާރުން އިއުލާނުކުރި ލިސްޓުގެ ބޮޑު ޕަސެންޓެއްގެ ޝަރުތު ހަމަނުވާ ކަމަށް ފެބްރުއަރީ 5، ގައި އެ ކޮމިޝަނުން އިއުލާނުކުރި އެވެ.
އޭސީސީން އެ ދުވަހު ބޭއްވި ނޫސްވެރިންގެ ބައްދަލުވުމެއްގައި ބުނީ ފްލެޓުތަކުގެ ދާއިމީ ލިސްޓުގައި ޝަރުތު ފުރިހަމަވެ، އެއްވެސް މައްސަލައެއް ފާހަގަކުރެވިފައި ނުވާ ފޯމުތަކުގެ ނިސްބަތަކީ 20.7 ޕަސެންޓު ކަމަށެވެ. އަދި ޝަރުތު ފުރިހަމަވީީ ނަމަވެސް 19.7 ޕަސެންޓު ފޯމުގެ މައްސަލަ ހުރި ކަމަށް އޭސީސީން ބުންޏެވެ.
ޝަރުތު ފުރިހަމަވީ ނަމަވެސް މައްސަލަ ހުރި ފޯމުތަކުގެ ތެރޭގައި ގިނައީ ދީފައިވާ މައުލޫމާތުގައި ފުށުއެރުން ހުރި ފޯމުތައް ކަމަށާއި އެއީ ޖުމުލަ ފޯމުތަކުގެ 70 ޕަސެންޓު ކަމަށް އޭސީސީން އެ ދުވަހު ބުންޏެވެ.
