މީޑިއާތަކުގެ ފުރިހަމަ ކޮންޓްރޯލް ސަރުކާރަށް ނެގޭ ގޮތަށް މިއަދު ރައްޔިތުންގެ މަޖިލީހަށް ހުށަހެޅި ބިލުގައި ކަންބޮޑުވާ ކަންކަން އެބަހުރި ކަމަށާއި އެ ބިލަށް އިސްލާހުތަކެއް ހުށަހަޅުއްވާނެ ކަމަށް މޯލްޑިވްސް މީޑިއާ ކައުންސިލުން މިއަދު ބުނެފި އެވެ.
ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރު ހުށަހެޅުއްވި "މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން" ބިލުގައި ކަންބޮޑުވާ ކަންކަން ހުރި ކަމަށް އެމްއެމްސީއިން ބުނި ނަމަވެސް އޭގެ ތަފުސީލެއް ނުދެ އެވެ.
އެކަމަކު، އެ ބިލާ ގުޅޭ ގޮތުން އެ ކައުންސިލުން ބަޔާނެއް ނެރުމަށް މިއަދު ބޭއްވި ޖަލްސާއެއްގައި ފާސްކޮށްފައިވާނެ ކަމަށް އެމްއެމްސީއިން ބުންޏެވެ. އަދި ބިލާ ގުޅިގެން ކުރަންޖެހޭ އެހެނިހެން ކަންކަން ކުރަން ވެސް މިއަދު ބޭއްވި ޖަލްސާގައި ފާސް ކުރި ކަމަށް އެ ކައުންސިލުން ބުންޏެވެ.
އެ ބިލުގައި އޮތީ މީޑިއާ ކައުންސިލާއި ބްރޯޑްކާސްޓިން ކޮމިޝަން އުވައިލުމަށްފަހު މީޑިއާ ރެގިއުލޭޓު ކުރާ އެއް ކޮމިޝަން ހެދުމަށެވެ. އެ ކޮމިޝަނުގައި ހަތް މެންބަރުން ތިބޭއިރު އޭގެ ތެރެއިން ހަތަރު މެންބަރުންނަކީ މަޖިލީހުން ފާސްކޮށްގެން ރައީސް އައްޔަން ކުރާ މެންބަރުންނެވެ. އަނެއް ތިން މެންބަރުންނަކީ މީޑިއާތަކުން އިންތިހާބު ކުރާ މެންބަރުންނެވެ.
ނޫސްތަކަށް މިނިވަންކަމާއެކު ހަރަކާތްތެރިނުވެވޭ ގޮތަށް މީޑިއާއިން އަމަލު ކުރަންޖެހޭ ސުލޫކީ މިންގަނޑުތަކާއި ހަމަތަކެއް ވެސް އެ ގާނޫނުގައި އޮތީ ބަޔާންކޮށްފަަ އެވެ. އަދި ނޫހާއި ނޫސްވެރިން ބޮޑެތި އަދަދުތަކުން ޖޫރިމަނާ ކުރުމުގެ ބާރާއި މައްސަލައެއް ބަލައި ނިމެންދެން ވަގުތީ ގޮތުން ނޫސް ބަންދު ކުރުމުގެ ބާރު ވެސް އޮތީ ކޮމިޝަނަށް ލިބޭ ގޮތަށެވެ.
އެ ކޮމިޝަނުގެ ރައީސް އާއި ނައިބު ރައީސް އައްޔަން ކުރުމުގެ ބާރު ވެސް ރައީސުލްޖުމްހޫރިއްޔާ ދިނުމަށް ބިލުގައި ހިމަނާފައިވެ އެވެ.
އަލަށް އުފައްދާ މީޑިއާ ކޮމިޝަނުން ހަދާ ނޫސްވެރިކަމުގެ ސުލޫކީ މިންގަނޑާ ތަކުރާރުކޮށް ހިލާފު ވެއްޖެ ނަމަ 5،000ރ. އާއި 50،000ރ. އާ ދެމެދުގެ އަދަދަކުން ނޫހާއި މަޖައްސާ ޖޫރިމަނާ ކުރެވޭނެ ކަމަށް ވެސް ބިލުގައި ބަޔާން ކޮށްފައިވެ އެވެ. އަދި ވަކިވަކި ނޫސްވެރިން 5،000ރ. އާއި 10،000ރ. އާ ދެމެދުން ޖޫރިމަނާ ކުރުމުގެ ބާރު ވެސް އެ ކޮމިޝަނަށް ދޭން ބިލުގައި ހިމަނާފައިވެ އެވެ.
ބްރޯޑްކާސްޓަރެއް ނަމަ ޖޫރިމަނާ ކުރެވޭނެ އެންމެ މަތީ މިންވަރަކީ ވޭތުވެދިޔަ އަހަރުގެ އާމްދަނީގެ 10 ޕަސެންޓެވެ. އެއީ މިސާލަކަށް، އެއް މިލިއަން ރުފިޔާގެ އާމްދަނީއެއް ނަމަ 100،000ރ. އެވެ
ބިލު އޮތް ގޮތުން، މީޑިއާ ކައުންސިލް އާއި ބްރޯޑްކާސްޓިން ކޮމިޝަންގައި ނުނިމި ހުރި މައްސަލަތައް ވެސް އާ ކޮމިޝަނަށް ބެލޭނެ އެވެ.
