ފީފާ ރެޖިސްޓާޑް ދެ އެކުވެރިކަމުގެ މެޗުގައި ރާއްޖެއާ ދެކޮޅަށް ކުޅެން ބަންގްލަދޭޝް އިން ތައްޔާރުވާއިރު، ރާއްޖެ އަކީ ހުނަރުވެރި ކުޅުންތެރިންތަކެއް ހިމެނޭ "ގޮތްނޭނގޭ ޓީމެއް" ކަމަށާއި އެހެންވެ، އެެއްވެސް ނަޒަރަކުން ފަސޭހަކޮށް ވިސްނައިގެން މެޗަށް ތައްޔާރުނުވާ ކަމަށް ބަންގްލަދޭޝް ޓީމުގެ ކޯޗު ހަވިއޭ ކަބްރޭރާ ބުނެފި އެވެ.
ބަންގްލަދޭޝް އާއި ރާއްޖޭން ވާދަކުރާ ފީފާ ލެވަލް ވަން އެކުވެރިކަމުގެ ދެ މެޗުގެ ތެރެއިން ފުރަތަމަ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި މިއަދު ކަބްރޭރާ ބުނީ، 2022 ވަނަ އަހަރު މާޗް މަހު ބަންގްލަދޭޝާ ހަވާލުވެ، މިހާތަނަށް އޭނާ އެ ޓީމުގައި ކުރި މަސައްކަތް ފެންނަން އޮތް އެއް ކަމަކީ، ރާއްޖެއާ ދެކޮޅަށް ކުޅުނު މެޗުތަކުން ނެރުނު ނަތީޖާތައް ކަމަށެވެ.
މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން ބަންގްލަދޭޝްގެ ކޯޗު ކަބްރޭރާ (މ) އާއި ޑިފެންޑަރު، ޓޯޕޫ (ކ).
އެ ގޮތުން، ކަބްރޭރާ ހަވާލުވި ފަހުން، ރާއްޖޭން ބަންގްލަދޭޝާ ކުޅުނު ހަތަރު މެޗުގެ ތެރެއިން ދެ މެޗުން ބަންގްލަދޭޝް ވަނީ މޮޅުވެފަ އެވެ. އެއީ، މިދިޔަ އަހަރުގެ ސާފް ޗެމްޕިއަންޝިޕް އާއި ވޯލްޑް ކަޕް/އޭޝިއަން ކަޕް ޖޮއިންޓް ކޮލިފައިން ބަންގްލަދޭޝް ދަނޑުގައި ކުޅުނު މެޗުންނެވެ.
"ރާއްޖޭގައި 2022 ވަނަ އަހަރު މާޗް މަހު ކުޅުނު މެޗާއި މިދިޔަ އަހަރުގެ މެޗުތަކަށް ބަލާއިރު، އަހަރެމެންގެ ކުޅުން ރަނގަޅުވި މިންވަރު ފެންނާނެ. އުންމީދަކީ، މާދަމާގެ މެޗުގައި އިތުރު ލެވަލަކަށް ޓީމު ގެންދިއުން،" ކަބްރޭރާ ބުންޏެވެ.
"ދެން، ވިސްނަންޖެހޭ ކަމެއް، ރާއްޖެ އަކީ (ފުޓްބޯޅައިގައި) ވަރަށް ހުނަރުވެރި ގައުމެއް. އެ މީހުން އަތުގައި އެ ހުރި ފޯވާޑް ކުޅުންތެރިންނަށް ބަލާއިރު. އެ މީހުންގެ ނަސީބު ދެރަކަން އެއީ އެއް އަހަރު ވަންދެން ރަސްމީ މެޗެއް ނުކުޅެ ތިބެން ޖެހުމަކީ، ދެން، ގައުމީ ޓީމަށް ވެސް އެންމެ ފަހުން މެޗެއް ލިބުނީ މިދިޔަ އަހަރު އަހަރެމެންނާ އެކު. އަބަދުވެސް ރާއްޖެއާ ދެކޮޅަށް ކުޅެން އުނދަގޫ، އެއީ ގޮތްނޭނގޭ ޓީމެއް، ކުރީގައި ތިބި ކުޅުންތެރިން ކޮންމެ ތަފާތެއް ވެސް ދައްކަފާނެ، އެކަމަކު، އަހަރެން މި ހުރީ ދެ މެޗުން މޮޅުވާން އަމާޒު ހިފައިގެން،"
ރާއްޖެއާ ދެކޮޅަށް ކުޅޭނީ އެޓޭކިން ވިސްނުމުގައިތޯ ސުވާލުކުރުމުން، ކަބްރޭރާ ބުނީ، ރާއްޖެ އަތުން ބޯޅަ ހޯދައި، އެ ހިފަހައްޓައިގެން ޕޮޒެޝަން ގޭމެއް ކުޅުމަކީ އުނދަގޫވާނެ ކަމެއް ކަމަށެވެ. ސަބަބަކީ ރާއްޖޭގައި ތިބީ ވަރަށް ޓެކްނިކަލީ މޮޅު ކުޅުންތެރިން ކަަމަށެވެ. އެހެން ނަމަވެސް ބަންގްލަދޭޝްގެ ރޭވުމަކަށްވާނީ، ވީހާވެސް އަވަހަށް ބޯޅަ ހޯދައި މެޗުގެ ކޮންޓްރޯލް ނަަގައިގެން އެ ޓީމުން ކުޅުން ކަމަށް ކަބްރޭރާ ވަނީ ބުނެފަ އެވެ.
މި ދެ މެޗުން ރާއްޖެ އަތުން މޮޅުވާން ބޭނުންވާ އަނެއް ސަބަބަކީ އަންނަ އަހަރުގެ މާޗް މަހު ފަށާ އޭޝިއަން ކަޕް ކޮލިފައިންގައި ރަނގަޅު ހިސާބަކަށް ވާސިލްވެ، އެ ގައުމުގެ ފުޓްބޯޅަ ކުރިއަށް ގެންދިއުމަށް ކަމަށް ވެސް ކަބްރޭރާ ވަނީ ބުނެފަ އެވެ.
އެކަަމަކު، މި ދެ މެޗުން ބޭނުންވާ ހުރިހާ ކަންކަން ނުކުރެވުނު ކަމުގައި ވިޔަސް، ހުރިހާ ކަމެއް ނިމުނީ ނޫން ކަމަށާއި، އެއީ، އޭޝިއަން ކަޕް ކޮލިފައިން އޮތީ އަންނަ މާޗް މަހު ކަމަށްވާއިރު، ކަންކަން ރަނގަޅުކުރަން އަދިވެސް ފުރުސަތު އެބައޮތް ކަމަށް ކަބްރޭރާ ބުނެފައިވެ އެވެ.
ރާއްޖެއާ ދެކޮޅަށް މި ދެ މެޗުގައި ނެރޭ ނަތީޖާތަކުގެ ސަބަބުން ބަންގްލަދޭޝް ފުޓްބޯޅަ ފެޑެރޭޝަނުން ކަބްރޭރާ މަގާމުން ވަކިކޮށްފާނެ ކަމުގެ އަޑުތަކެއް ވެސް ފެތުރިފައިވާއިރު، އެކަމާ ބެހޭގޮތުން ސުވާލުކުރުމުން ކަބްރޭރާ ބުނީ، މިއީ، ކުރިއަށް އޮތް ދެ މެޗުގައި ޓީމުގެ ލެވަލް މައްޗަށް ގެންދަން ކުރެވޭ މަސައްކަތާ މެދު އޭނާ ވިސްނާ ވަގުތެއް ކަމަށެވެ.
ބަންގްލަދޭޝާއި ރާއްޖެ ކުޅޭ މެޗު ފަށާނީ މާދަމާ ހަވީރު 17:00 ގަ އެވެ.
