ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް މިދިޔަ ތިން އަހަރު ދުވަހުގެ ތެރޭގައި ހަ ބިލިއަން ރުފިޔާ މައާފުކޮށްދީފައިވާ ކަމަށް މި އަންނަ އަހަރުގެ ބަޖެޓު ޕޮޒިޝަން ރިޕޯޓުގައި ބުނެފި އެވެ.
އެ ރިޕޯޓުގައި ބުނެފައި ވަނީ ތަފާތު އެކި ސަބަބުތަކާ ހުރެ ދައުލަތަށް ދައްކަންޖެހޭ ޓެކުހާއި ޓެކްސް ނޫން އާމްދަނީއާ ގުޅިގެން ދޭ ލުއިތަކުގެ ސަބަބުން ދައުލަތުގެ އާމްދަނީއަށް އަސަރު ކުރާ ކަމަށެވެ.
އެގޮތުން 2020 ވަނަ އަހަރުން 2023 ވަނަ އަހަރުގެ ނިޔަލަށް ފަތުރުވެރިކަމުގައި ހަރަކާތްތެރިވާ ފަރާތްތަކަށް 390.9 މިލިއަން ޑޮލަރު (6،027.7 މިލިއަން) ރުފިޔާ މައާފު ކޮށްދީފައިވާ ކަމަށް އެ ރިޕޯޓުގައި ބުނެފައިވެ އެވެ.
އޭގެ އިތުރުން 2023 ވަނަ އަހަރު އާމްދަނީން ނަގާ ޓެކުހުން 216.7 މިލިއަން ރުފިޔާ އަދި އިމްޕޯޓު ޑިއުޓީގެ ކޮންސެޝަންތަކުން 1653.9 މިލިއަން ރުފިޔާ ދައުލަތަށް ގެއްލިފައިވާ ކަމަށް އެ ރިޕޯޓުގައި އަންދާޒާ ކޮށްފައިވެ އެވެ. ނަމަވެސް އެ ލުއި ދިނުމުގެ މަގުސަދު ހާސިލު ކުރެވޭ މިންވަރު ދެނެގަނެވިފައި ނެތްކަން އެ ރިޕޯޓުގައި ފާހަގަކޮށްފައިވެ އެވެ.
މިއަހަރުގެ އޯގަސްޓު މަހުގެ ނިޔަލަށް އިމްޕޯޓު ޑިއުޓީން ދައުލަތަށް ލިބެންޖެހޭ 1،147.7 މިލިއަން ރުފިޔާ ދޫކޮށްލާފައިވާ ކަމަށް ވެސް އެ ރިޕޯޓުގައި ބުނެފައިވެ އެވެ. ނަތީޖާއެއްގެ ގޮތުން މިއަހަރަށް ފާސްކުރި ބަޖެޓުގައި އަންދާޒާ ކޮށްފައިވާ ވަރަށް އިމްޕޯޓު ޑިއުޓީ ލިބޭނެ ކަމަށް މިހާރު ނުބެލެވޭ ކަމަށް އެ ރިޕޯޓުގައި ބުނެފައިވެ އެެވެ.
ރިޕޯޓުގައި ބުނެފައި ވަނީ ދައުލަތުން ދޭ ލުއިތަކުގެ ސަބަބުން އާމްދަނީއަށް ކުރާ އަސަރު ކުޑަ ކުރުމުގެ ގޮތުން ނަން ޑިސްކްރިމޭޓަރީ އަދި ދެފުށްފެންނަ ނިޒާމަކުން ލުއި ދިނުމާއި މައާފު ކުރުމުގައި އަމަލު ކުރާނެ އުސޫލުތައް ގާއިމު ކުރުމުގެ މަސައްކަތް ކުރަމުންދާ ކަމަށެވެ.
ތަފާތު އެކި ސަބަބުތަކާ ހުރެ ދައުލަތަށް ދައްކަންޖެހޭ ޓެކުހާއި ޓެކްސް ނޫން އާމްދަނީއާ ގުޅިގެން މިހާރު ލުއި ދެނީ، އާމްދަނީން ޓެކްސް ނެގުމުގެ ގާނޫނުގެ 1-12 އާއި އެކްސްޕޯޓު އިމްޕޯޓު ގާނޫނާއި ދައުލަތުގެ މާލިއްޔަތުގެ ގާނޫނުގެ ނުވަ ވަނަ މާއްދާގެ ދަށުން ރައީސުލްޖުމްހޫރިއްޔާއަށް ލިބިދޭ އިހުތިޔާރުގެ ދަށުންނެވެ.
