މެޑްރިޑް (ނޮވެމްބަރު 10) - ރެއާލް މެޑްރިޑަށް ދިމާވެފައިވާ ޑިފެންޑަރުންގެ އަނިޔާގެ މައްސަލަތަކަށް މި ވަގުުތު ހޯދޭނެ އެންމެ ރަނގަޅު ހައްލަކީ ރެއާލްގެ ކުރީގެ ކެޕްޓަން، ސާޖިއޯ ރާމޯސް ކަމަށް އެ ޓީމަށް ކުރިން ކުޅުނު މިޑްފީލްޑަަރު، ގުޓީ ބުނެފި އެވެ.
މި ވަގުުތު އެއްވެސް ކްލަބެއްގެ ކޮންޓްރެކްޓްގައި ނެތް، ސްޕެއިނުގެ ލެޖެންޑަރީ، ޑިފެންޑަރު، ރާމޯސް، 38، އަށް ހަތަރު ގައުމެއްގެ ލީގުތަކަށް ނިސްބަތްވާ ކްލަބްތަކުން ހުށަހެޅުން ލިބިފައިވީ ނަމަވެސް އޭނާ ހުރީ ގޮތެއް ނުނިންމަ އެވެ.
ރެއާލްގެ ގިނަ ޑިފެންޑަރުތަކަކަށް އަނިޔާވެފައިވާއިރު، މި ވަގުުތު ފިޓްކޮށް، ޑިފެންޑަރުންގެ ގޮތުގައި ސެންޓްރަލް މަގާމުގައި ސީނިއާ ކުޅުންތެރިންގެ ގޮތުގައި ބޭނުންކުރެވެން ހުރީ ދެ ޑިފެންޑަރުންނެވެ. އެއީ، ރޭގެ މެޗުގައި، އޮސަސޫނާއާ ދެކޮޅަށް ކުޅެނިކޮށް، ރެއާލްގެ ބްރެޒިލް ޑިފެންޑަރު، އެޑާ މިލިޓާއޯ ކަކުލަށް އަނިޔާވެ، ސީޒަން ނިމިފައިވާތީ އެވެ.
"މިލިޓާއޯގެ އިންޖަރީއާ ހެދި ރެއާްލް އެ ދިޔައީ އުނދަގޫ ހާލަތަކަށް. މިދިޔަ އަހަރުގެ އަނިޔާއިން ރިކަވާވެ، ކުރީގެ ފޯމަށް އެޅެމުން ދަނިކޮށް، އަނެއްކާ ވެސް ސީރިއަސް އިންޖަރީއެއް މިލިޓާއޯ އަށް މި އައީ. ދެން، މި ހާލަތު އިތުރަށް ޗެލެންޖިން މި ވީ، ކާވަހާލް އެ ހުރީ އަނިޔާގައި، އަލަބާ އަކީ އެ އަންނައިރު ވެސް އަނިޔާގެ ގޯސް ރެކޯޑެއް އޮތީ،" ރެއާލްގެ ޑިފެންސްގެ ހާލަތު ކިޔައިދެމުން، ގުޓީ ބުންޏެވެ.
"ޔަގީނުން ވެސް ޓްރާންސްފާ މާކެޓަށް ޑިފެންޑަރެއް ހޯދަން ރެއާލުން ދާން ޖެހޭނެ. އެކަމަކު، ހައްލު ހޯދަން ޖެހޭނީ ޔަގީންކަމާ އެކު، އަހަންނަށް ފެންނަ އެންމެ ރަނގަޅު އެއް ހައްލަކީ ރާމޯސް. އެއީ އެއްވެސް ހަރަދެއް (ޓްރާންސްފާ ފީއެއް) ނުދައްކައި ކުރެވިދާނެ ކަމެއް،"
ރާމޯސް ސީނިއާ ކުލަބު ކެރިއަރު ފެށީ ސެވިއްޔާ އިންނެވެ. އެ ކުލަބުގެ ސީނިއާ ޓީމަށް ދެ އަހަރު ކުޅުމަށް ފަހު ސްޕެއިންގެ ރެއާލް މެޑްރިޑަށް އޭނާ ބަދަލުވީ 2005 ވަނަ އަހަރު އެވެ. ރެއާލްގައި 16 އަހަރު ކުޅުމަށް ފަހު އޭނާ އެކުލަބު ދޫށްލީ 2021 ގަ އެވެ. އެ ފަހަރު، ހިލޭ ޓްރާންސްފާއެއްގައި ބަދަލުވީ، ފްރާންސްގެ ޕީއެސްޖީ އަށެވެ. ޕީއެސްޖީ ދޫކޮށްލަން ރާމޯސް ނިންމީ އެ ކްލަބްގެ ދެ އަހަރުގެ ކޮންޓްރެކްޓް ފުރިހަމަ ކުރުމަށް ފަހު އެވެ. މިދިޔަ ސީޒަނަށް ފަހު، ސެވިއްޔާ އިން ވެސް ކޮންޓްރެކްޓް ފުރިހަމަކޮށް ވަކިވީ އެެވެ.
