މި ސަރުކާރުގެ ބައެއް ވެރިންނާއި ކުންފުނިތަކުގެ ވެރިންނަށް ހިޔާނާތާއި ނުހައްގު މުއްސަނދިކަމުގެ ތުހުމަތުކުރެވޭއިރު، އެފަދަ ކުށްތައް ހުއްޓުވަން މަޖިލީހުގެ ކޮމިޓީތަކުން މަސައްކަތް ކުރަންޖެހޭ ކަމަށް އޭދަފުށީ ދާއިރާގެ މެންބަރު އަހުމަދު ސަލީމް ވިދާޅުވެއްޖެ އެވެ.
ނުހައްގު މުއްސަނދިކަމުގެ ކުށް ބަޔާންކުރާ ގާނޫނުލް އުގޫބާތުގެ 515 ވަނަ މާއްދާ ބަދަލުކުރަން ހުށަހަޅާފައިވާ ބިލުގެ ބަހުސްގައި އިއްޔެ ސަލީމް ވިދާޅުވީ ދައުލަތުގައި ހިނގާ ގޯސްކަންތައް ބަލައި ހުއްޓުވުމަށް މަޖިލީހުގެ ކަމާ ގުޅޭ ކޮމިޓީތައް އެކުލަވާލެވިފައިވާ ކަމަށެވެ.
މަޖިލީހުގެ ކޮމިޓީތައް ހަދާފައި ހުރީ ނަމެއްގައި ނޫން ކަމަށާއި އެ ކޮމިޓީތަކަށް މައްސަލަތައް ގެނެސް ކުރެވެން ހުރި ހުރިހާ މަސައްކަތެއް ކުރުމަކީ މެންބަރުންގެ މައްޗަށް ލާޒިމު ކަމެއްގެ ގޮތުގައި ސަލީމް ފާހަގަ ކުރެއްވި އެވެ.
"މި މަޖިލީހުގައި އެއްވެސް ހާލަތެއްގައި ކޮމިޓީތަކެއް ހަދާފައި ހުރިއްޔަކީއެއް ހަމަ ކޮމިޓީއެއްގެ ނަމަކުނޫން. އެ ކޮމިޓީތައް ހަދާފައި ހުރީ ހަމަ ސަރުކާރު ޖަވާބުދާރީކުރުވުމާއި އަދި ނޭއްގާނީ އަމަލުތައް ހިންގާ މީހުންގެ ކަންތައްތައް ބެލުމާއި އަދި ނާޖާއިޒު ގޮތުގައި ކަންކަންކުރާ މީހުންގެ ކަންތައްތައް ބެލުމާއި އަދި މި ނޫނަސް އަނެއްހެން ދަންނަވާނަމަ ހުރިހާ ކަމެއް ބެލޭނެ ވަރަށް އެބަ އޮތް މި މަޖިލީހުގައި ކޮމިޓީތައް ހެދިފައި،" އޭނާ ވިދާޅުވި އެވެ.
އެފަދަ ކަންކަން ބެލޭނެ ގޮތަށް މަޖިލީހުގެ ކޮމިޓީތައް ހަރަކާތްތެރިކުރުވަން، މަޖިލީހުގައި އެންމެ ގިނަ ދުވަސްވީ އެއް މެންބަރު، ސަލީމް، މަޖިލީހުގެ ރައީސް އަބުދުއްރަހީމް އަބްދުﷲ އަށް ވެސް ގޮވައިލެއްވި އެވެ.
"ހަމައެކަނި ރައީސުލްޖުމްހޫރިއްޔާގެ އިސްތަށިފުޅުގައި އަޅުގަނޑުމެން އަޅުވައިގެން މިކަން ތިބެގެނެއް މި ކަމެއް ނުކުރެވޭނެ. ހަމަ އެމަނިކުފާނާ އެއްވަރަށް މި އިއްޒަތްތެރި މަޖިލީހުގައި ވެސް އަޅުގަނޑުމެން މި މަސައްކަތްކުރަން ޖެހޭނެ. އަދި ހާއްސަކޮށް އަޅުގަނޑުމެން ކަމާ ގުޅުންހުރި ކޮމިޓީތަކުން މި މައްސަލަތައް ވަރަށް ބާރަށް ބެލިއްޔާ ނޫނިއްޔަކާއެއް އަޅުގަނޑުމެންނަކަށް މި ކަމުން ސަލާމަތެއްނުވެވޭނެ،" ސަލީމް ވިދާޅުވި އެވެ.
މިހާރު ބިލް އޮތް ގޮތުން ދައުލަތުގެ މަގާމެއްގައި ހުރި މީހަކު ނުހައްގު މުއްސަނދި ކަމެއްގެ ތުހުމަތު ކުރެވި މައްސަލަ ބަލާނަމަ، އެކަމެއް ސާފުކޮށް ދިނުމުގެ ޒިންމާ އޮތީ ތުހުމަތުވާ ފަރާތަށެވެ.
ސަލީމް ވިދާޅުވީ ރާއްޖޭގައި ކަންކަން ނުވެ އޮތީ ގާނޫނުތައް ނެތިގެން ނޫން ކަމަށެވެ.
