ދުންފަތް ކޮންޓްރޯލް ކުރުމުގެ ގާނޫނު އިސްލާހު ކޮށްގެން ކުރިއަށް އޮތް ފަސް އަހަރު ތެރޭގައި ނަތީޖާއެއް ފެންނާނެ ކަމަށް ވިސްނައިގެން ނުވާނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ޑެޕިއުޓީ ޑިރެކްޓަރު ހަސަން މުހައްމަދު މިއަދު ވިދާޅުވެއްޖެ އެވެ.
ދުންފަތް ކޮންޓްރޯލްކުރުމާ ބެހޭ ގާނޫނަށް އިސްލާހު ގެނައުމާ ގުޅޭ ގޮތުން މަޖިލީހުގެ އިޖުތިމާއީ ކޮމިޓީގައި ކުރިއަށްދިޔަ ބައްދަލުވުމުގައި ވާހަކަދައްކަވަމުން ހަސަން މުހައްމަދު ވިދާޅުވީ ސިޔާސީ ގޮތުން ބެޖެއް ޖެހުމުގެ ގޮތުން ހެޔޮ ބަދަލެއް ފަސް އަހަރު ތެރޭ ނުގެނެވޭނެ ކަމަށެވެ. ނަމަވެސް މީހުންގެ ދިރިއުޅުމާ ގުޅިފައި ހުންނަ ކަންތައްތަކުގެ ނަތީޖާ އެ މުއްދަތުގައި ވެސް ފެންނާނެ ކަމަށް އޭނާ ވިދާޅުވި އެވެ.
"މިކަހަލަ ކަމެއްގެ ނަތީޖާއެއް ނުލިބޭނެ މި ދައުރަކު ހަމަ ގައިމު ވެސް. ގަބޫލުފުޅު ނުކުރައްވާތި ސިޔާސީ ގޮތުން ބެޖެއް ޖެހޭނެ ކަހަލަ ބަދަލެއް ފަސް އަހަރު، ހަތަރު އަހަރު ތެރޭގައި އަތުވެދާނެ ކަމަށް. އާންމު ސިއްހަތުގެ އަދި މީހުންގެ އެޑިކްޝަނާ ބިހޭވިއާއާ ގުޅިފައި ހުންނަ ކަންތައްތަކުގެ ނަތީޖާ ފެންނާނެ،" އޭނާ ވިދާޅުވި އެވެ.
ދުންފަތް ކޮންޓްރޯލް ކުރުމުގެ ގާނޫނު އިސްލާހު ކުރަން ޖެހެނީ އަންނަން އޮތް ޖީލަށްކަން ފާހަގަކުރައްވައި ހަސަން މުހައްމަދު ވިދާޅުވީ ގާނޫނު ފަރުމާ ކުރާއިރު ވަރަށް ބޮޑަށް ތަފުސީލު ކޮށްފިނަމަ، ގަވާއިދު ހަދާ މަރުހަލާގައި ގާނޫނުގައި ވަކިގޮތަކަށް އޮތުމުން އުނދަގޫތަކެއް ދިމާވެދާނެ ކަމަށެވެ.
އެގޮތުން ހަސަން މުހައްމަދު ވިދާޅުވީ ނޮވެމްބަރު 15، ގެ ކުރިން ގާނޫނު ފާސް ކުރަން ބޭނުންވާނަމަ، ހުރިހާ ތަފުސީލެއް ގާނޫނުގެ ތެރެއަށް ނުގެނެސް ގަވާއިދުގެ ތެރެއިން ވަކި ކަންކަމެއް ކުރަން ލާޒިމު ކުރެވިދާނެ ކަމަށެވެ.
މި މަހުގެ މެދު ތެރޭގައި ރާއްޖޭގައި ސިއްހީ ހިދުމަތް ދޭ ހުރިހާ ތަނަކުން ދުންފަތުގެ އިސްތިއުމާލު ކުރުން ހުއްޓާލަން އެހީތެރިވެދިނުމުގެ ހިދުމަތް ދިނުމަށް މަސައްކަތް ކުރަމުންދާ ކަމަށް ވެސް ހަސަން މުހައްމަދު ވިދާޅުވި އެވެ.
ސަރުކާރުން ވަނީ ދުންފަތާއި ސިނގިރޭޓުން ނަގާ ޓެކްސް ނޮވެމްބަރު 1، އިން ފެށިގެން ބޮޑުކޮށްފަ އެވެ. އެގޮތުން، އިމްޕޯޓު ޑިއުޓީގެ ގޮތުގައި ސިނގިރޭޓަކުން ނަގާ އަދަދު 8ރ. އަށް މަތިކޮށް ދުންފަތުގެ އެހެން ބާވަތްތަކުން ނަގާ ޑިއުޓީ 50 ޕަސެންޓަށް ވަނީ ބޮޑުކޮށްފަ އެވެ.
އޭގެ އިތުރުން ނޮވެމްބަރު 15، އިން ފެށިގެން ވޭޕް އެތެރެ ކުރުން މަނާކޮށް، ޑިސެމްބަރު 15، އިން ފެށިގެން ވޭޕް ބޭނުން ކުރުން ވެސް ރާއްޖޭގައި މަނާ ކުރުމަށް ސަރުކާރުން ވަނީ ނިންމައިފަ އެވެ.
