އަމިއްލަ ބޭނުމަށް ދުންފަތުގެ ބާވަތްތައް ގެނެވޭ މިންވަރު އިތުރުކުރެވޭ ގޮތަށް ސަރުކާރުން އުސޫލަށް ބަދަލު ގެނެސްފި އެވެ.
ދަތުރުވެރިން ގެންނަ ތަކެއްޗާއި، އަމިއްލަ ފަރާތްތަކުގެ ކުދިކުދި ބޭނުންތަކަށް ގެންނަ ތަކެއްޗާއި، ވިޔަފާރި ސާމްޕަލުގެ ގޮތުގައި ގެންނަ ތަކެތިން ޑިއުޓީ މައާފުކުރުމުގެ އުސޫލަށް ގެނައި އުސޫލަށް ގެނައި އިސްލާހުގެ ދަށުން އަމިއްލަ ބޭނުމަށް ފަތުރުވެރިންނެކޭ އެއް މިންވަރަށް ދިވެހިންނަށް ވެސް މިހާރު ދުންފަތުގެ ބާވަތްތައް އެތެރެކުރެވޭނެ އެވެ.
މި އުސޫލަށް ގެނައި ބަދަލުގެ ތެރޭގައި 18 އަހަރު ފުރިފައިވާ މީހުންގެ ބަދަލުގައި ދެން ދުންފަތުގެ ބާވަތްތައް އެތެރެކުރެވޭނީ 21 އަހަރުގެ މީހުންނަށެވެ. ކުރިން އެ އުސޫލު ފަތުރުވެރިންނަށް އެކަނި ހަނިކޮށްފައި އޮތަސް، މިހާރު ދުންފަތުގެ ބާވަތްތައް ފަތުރުވެރިންގެ އިތުރުން ދިވެހިންނަށްވެސް އެތެރެކުރެވޭނެ އެވެ.
މިގޮތުން އަމިއްލަ ބޭނުމަށް 200 ސިނގިރޭޓު (ހީޓަޑް ޓޮބޭކޯ އާއި ބިޑި ހިމެނޭހެން) ނުވަތަ 20 ސުއްޓާ ނުވަތަ 100 ގްރާމުގެ ދުންފަތް ޑިއުޓީ ނުދައްކައި ރާއްޖެ އެތެރެކުރެވޭނެ އެވެ.
ނަމަވެސް އުސޫލުގެ ދަށުން އަމިއްލަ ބޭނުމަށް ޑިއުޓީ އިނާޔަތްދިނުން އިސްތިސްނާވާ ތަކެތީގެ ތެރޭގައި ދުންފަތް ނުވަތަ ނިކޮޓިން އެކުލެވޭ ބާވަތްތަކާއި އެ ތަކެތި ބުއިމަށް ބޭނުންކުރާ އާލާތްތަކާއި، އީ-ސިނގިރޭޓާއި، ޝީޝާ އާއި، ފްލޭވާޑް ސިނގިރޭޓު ނުވަތަ އީ-ލިކުއިޑް ފަދަ ތަކެތި ނުހިމެނެ އެވެ.
ސަރުކާރުން ވަނީ 2024 ވަނަ އަހަރު ސިނގިރޭޓު މިހާރު ވިއްކާ އަގަށްވުރެ 50 ޕަސެންޓު ބޮޑުކުރުމަށްފަހު، މިދިޔަ ޖުލައި މަހު 50 ޕަސަންޓު އަނެއްކާ އަގުހެޔޮވާނެ ގޮތަށް އިމްޕޯޓް އެކްސްޕޯޓް ގާނޫނު އިސްލާހުކޮށްފަ އެވެ.
ރާއްޖޭގެ ފިހާރަތަކުން ސިނގިރޭޓު ފޮށްޓެއް މިހާރު ލިބެން ހުރީ 250ރ. އާއި 240ރ. އާ ދެމެދުގެ އަގެއްގަ އެވެ. މީގެ ކުރިން 995ރ. އަށް ވިއްކަމުން އައި ސިނގިރޭޓު ކާޓަނެއްގެ އަގު 2،200ރ. އަށް ވުރެ މައްޗަށް އުފުލެނެވެ. އެއީ ރާއްޖެއަށް ސިނގިރޭޓު އެތެރެކުރަން ފެށިފަހުން އެންމެ ޑިއުޓީ ބޮޑުކުރި ފަހަރެވެ.
އެހެން ނަމަވެސް، އޭގެ 19 މަސްދުވަސް ފަހުން ފާސްކުރި ބިލާއެކު ސިނގިރޭޓު ފޮށްޓެއްގެ އަގު ވަނީ ދެގުނަ އަގުހެޔޮވެފަ އެވެ.
ސަރުކާރުން ސިނގިރޭޓުގެ ޓެކްސް ބޮޑު ކުރުމުން ވަގު ދުންފަތުގެ ބޮޑު ކަޅު ބާޒާރެއް އުފެދި، ފޭކު ސިނގިރޭޓު މުޅި ރާއްޖެއަށް އާންމުވި އެވެ. ކުރިން ސިނގިރޭޓު ވިއްކި އަގަށް ވުރެ މާ އަގުހެޔޮކޮށް ފޭކު ސިނގިރޭޓު މިހާރު ވެސް ލިބެ އެވެ.
