ސިޓީ ސްޕޯޓްސް ކްލަބުން ހުށަހެޅި މައްސަަލަ އަށް ޖަވާބެއް ނުދީ ކަމުގެ އަސްލު އޮޅޭގޮތަށް، ކްލަބްގެ މަސްލަހަތާއި ކުޅުންތެރިންނާ މެދު ނުވިސްނައި، ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އަމަލުކުރަމުން އަންނަ ގޮތާ މެދު ސިޓީން ހިތްހަމަނުޖެހުން ފާޅުކޮށްފި އެވެ.
މިހާރު ކުރިއަށްދާ ވޮލީބޯލް އެސޯސިއޭޝަން ކަޕްގެ ތިން ވަނަ ސެމީ ފައިނަލް މެޗުގެ ކުރިން، ސިޓީން ވަނީ ދިވެހި ސިފައިންގެ ކްލަބުން ގަވާއިދާ ހިލާފަށް ކުޅުންތެރިން ކުޅުވާ މައްސަލަ ހުށަހަޅައިފަ އެވެ. އެ މައްސަލައާ ގުޅޭގޮތުން ސިޓީ ސްޕޯޓްސް ކްލަބުން އެސޯސިއޭޝަނަށް ފޮނުވި ސިޓީ އަށް ޖަވާބެއް ނުދެ އެވެ. ސިޓީން މައްސަލަ ހުށަހެޅީ ކޮލިފިކޭޝަން ބުރުގައި އެހެން ޓީމަކަށް ކުޅުނު ދެ ކުޅުންތެރިއަކު، މި ފަހަރުގެ އެސޯސިއޭޝަން ކަޕްގެ ފަައިނަލް ބުރުގައި ސިފައިންގެ ޓީމަށް ކުޅެފައިވާތީ އެވެ.
ސިޓީގެ މި މައްސަލައާ ގުޅޭގޮތުން، އެސޯސިއޭޝަންގެ ބަހެއް ހޯދަން، ތަކުރާރުކޮށް، "އަދަދު ސްޕޯޓްސް" އިން ކުރި މަސައްކަތް ކާމިޔާބެއްނުވި އެވެ.
އެެ ގޮތުން، ވޮލީ އެސޯސިއޭޝަންގެ ޖެނެރަލް ސެކްރެޓަރީގެ މަގާމާއި ޕީއެސްއެމްގެ މެނޭޖިން ޑިރެކްޓަރުގެ މަގާމު އެކުއެކީގައި ފުރަމުން އަންނަ، މުހައްމަދު ސައީދުގެ ބަހެއް ހޯދަން ކުރި މަސައްކަތުގައި ވެސް އަލިމަގެއް ނުފެނުނުއިރު،، "ޕީއެސްއެމް ސްޕޯޓްސް" އަށް ވިއޭއެމްގެ އޮފިޝަލަކު ވަނީ މި ކަމާ ގުޅޭގޮތުން ވާހަކަ ދައްކައިފަ އެވެ.
އެ ގޮތުން ވީއޭއެމްގެ އޮފިޝަލް ބުނެފައިވަނީ، ސޯޝަލް މީޑިއާގައި ސިފައިންގެ ކްލަބްގެ އެ މައްސަލައިގެ ވާހަކަ ފެތުރުމުން އެސޯސިއޭޝަނުން އިސްނަގައިގެން އެ މައްސަލަ ބެލި ކަމަށެވެ. އަދި ސިޓީން މައްސަލަ ހުށަހެޅި ކުޅުންތެރިން މި މުބާރާތުގައި ސިފައިންގެ ޓީމުން ސިޓީއާ ދެކޮޅަށް ކުޅުނު، ސެމީ ފައިނަލް މެޗުގައި ކުޅެފައިނުވާތީ، އެ ދެ ޓީމުގެ މެޗަށް މީގެ ސަބަބުން އަސަރެއް ނުކުރާ ކަމަށް ވެސް އެ އޮފިޝަލް ބުނެފައިވެ އެވެ.
ދެން، އޮފިޝަލް ބުނީ، ސިޓީގެ މައްސަލަަ އަށް އެސޯސިއޭޝަނުން ޖަވާބުދާރީ ނުވަނީ އިޖުރާއަތް ފުރިހަމަކޮށްފައިނުވާތީ ކަމަށެވެ. އެ ގޮތުން، މައްސަލަ ހުށަހަޅާއިރު، ދައްކަންޖެހޭ 500 ރުފިޔާ ނުދައްކާތީ ސިޓީ އަށް ޖަވާބުދާރީ ނުވި ނަމަވެސް، ސިފައިންގެ ޓީމަށް ގަވާއިދާ ހިލާފަށް ކުޅުނު ކުޅުންތެރިން ޓީމުން އުނިކޮށް، 3000 ރުފިޔާ އިން ޖޫރިމަނާކޮށް، މައްސަލަ އިތުރަށް ބެލުމަށް ވެސް ނިންމާފައިވާ ކަމަށް ޕީއެސްއެމް ސްޕޯޓްސްގައި ވޮލީގެ އެ އޮފިޝަލާ ހަވާލާދީ ވަނީ ރިޕޯޓްކޮށްފަ އެވެ.
ސިޓީން ކަންބޮޑުވުން ފާޅުކޮށްފައިވަނީ އިޖުރާއަތް ފުރިހަމަނުވާ ކަމަށް ވެސް އެސޯސިއޭޝަނުން ބުނެނުދީ އެ ކްލަބްގެ ހައްގެއް ނިގުޅައިގަނެފައިވާތީ އެވެ. އަދި ގަވާއިދާ ހިލާފަށް ކަންކަން ކޮށްފައި އޮތް ޓީމަކަށް ފައިނަލުގައި ކުޅެން ފުރުސަތު ލިބޭ ގޮތަށް އެސޯސިއޭޝަނުން ފިޔަވަޅު އެޅުމަކީ، އެއްގޮތަކަށް ވެސް ގަބޫލުނުކުރެވޭ ކަމެއް ކަމަށް ސިޓީން ވަނީ ބުނެފަ އެވެ.
އެސޯސިއޭޝަން ކަޕްގައި ކްލަބް އެޗްޑީސީ އާއި ސިފައިން ކުޅޭ މެޗު ފަށާނީ މިރޭ 20:30 ގަ އެވެ.
