ރާއްޖޭގެ މިނިވަން މީޑިއާ ނިމުމަކަށް އައިސްފައިވާ ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒް އިސްމާއިލް ރޭ ވިދާޅުވެއްޖެ އެވެ.
އެމްޑީޕީގެ ހަރުގެ ޖަލްސާގައި ވާހަކަ ދައްކަވަމުން ފައްޔާޒް ވިދާޅުވީ މިނިވަންކަމާ އެކު އެއްޗެއް ބުނެލަން ކެރޭ ދެތިން މީޑިއާ ވެސް ނެތް ކަމަށާއި ކުރިއަށް އޮތް ތަނުގައި ފައިސާގެ ގޮތުންނާއި ބިރުވެރިކަން ފަތުރައިގެން މީޑިއާތައް އަޅުވެތި ކުރާތަން ފެންނަމުންދާ ކަމަށެވެ.
"މީޑިއާތައް ބަލަހައްޓަން އޮތް ކައުންސިލްގެ ހުރި ރައީސްގެ ވަޒީފާ ގެއްލިގެން މިދިޔައީ. ލަދުހަޔާތް ކުޑަކަން ބައްލަވާ މީޑިއާ ކައުންސިލްގެ ރައީސް، މީޑިއާ ފްރީޑަމްއޭ ކިޔާއިރު މީޑިއާ ކައުންސިލްގެ ރައީސްގެ ވަޒީފާ އެ ވަކިކުރީ. ދެން ކޮން ކަމެއްތޯ އެބޭފުޅުން ނުކުރައްވާނީ،" ފައްޔާޒް ވިދާޅުވި އެވެ.
އެމްއެމްސީގެ ރައީސް އަދި ޕީއެސްއެމްގެ ނިއުސް އޮޕަަރޭޝަންސް މެނޭޖަރުގެ މަގާމުގައި ހުންނެވި އަހުމަދު މުސްތަފާ އިއްޔެ ޕީއެސްއެމްގެ ވަޒީފާއިން ވަކި ކުރީ، ނޫސްވެރިކަމުގެ އެވޯޑް ދިނުމުގެ ހަފުލާގައި "އަދަދު" އަށް ތަހުގީގީ ދާއިރާއިން އެވޯޑު ލިބުނު ޑޮކިއުމެންޓްރީގެ ތަންކޮޅެއް އެ ޓީވީން ލައިވް ކުރެވުމުންނެވެ.
ފައްޔާޒް ވިދާޅުވީ ރައްޔިތުން ވޭތުވެދިޔަ އަހަރުތަކުގައި ހޯދާފައިވާ މިނިވަންކަމާއި ބާރުވެރިކަން މަޑުމަޑުން ނިގުޅައިގަންނަމުންދާ ކަމަށާއި ޕީޕީއެމްގެ ފިކުރު ވެރިކަމަށް އަންނަ ކޮންމެ ފަހަރަކު ރައްޔިތުންނަށް އޮޅުވާލައި ޑިމޮކްރަސީގެ ނަމުގައި ދޮގާއި މަކަރާއި އަނިޔާވެރިކަަން އިސްކުރާ ކަމަށެވެ.
ރައީސް މުއިއްޒު ވެވަޑައިގެންނެވި ވައުދުތަކާ މުޅިން ހިލާފަށް އަމަލު ކުރައްވަމުން ގެންދަވާކަން ފާހަގަ ކުރައްވާ ފައްޔާޒް ވިދާޅުވީ މި ފަސް އަހަރު ކުރީ ސަރުކާރު ބޮލުގައި ކަންކަން އެޅުވުމުގައި ހޭދަ ކޮށްފާނެ ކަމަށް ބެލެވޭ ކަމަށެވެ.
އެމްޑީޕީގެ ސަރުކާރު ނިމުނުއިރު ތިބީ 1،000 ސިޔާސީ މުވައްޒަފުން ކަމަށާއި ނަމަވެސް މި ސަރުކާރުގެ ފުރަތަމަ 11 މަސް ނިމުނުއިރު ސިޔާސީ މުވައްޒަފުންގެ އަދަދު ދެގުނަވެ މިހާރު 2،300 މުވައްޒަފުން އެބަ ތިބި ކަމަށް ވެސް ފައްޔާޒް ވިދާޅުވި އެވެ.
"ވެރިކަމާ ބަޔަކު ހަވާލުވަނީ ރައްޔިތުންގެ އުންމީދުތަކެއް އޮވެގެން އެ އުންމީދުތަކުގެ ކުލަ ޖައްސާނެ ކަމުގެ ވައުދުވެގެން މި އަންނަނީ. ކީއްވެތޯ އޭރު ވައުދު ނުވީ ނޫނެކޭ ނުވާނެއޭ ރައްޔިތުންގެ އުންމީދުތައް މާ ބޮޑޭ، ތިކަމެއް ނުވާނެއޭ. އެހެން ކިޔާފަކާއެއް ނޫން ވެރިކަމާ ހަވާލުވީ. ވެރިކަމާ ހަވާލުވީ އަޅުގަނޑުމެން ކުރި ކަންކަމަށްވުރެ މާ ރަނގަޅަށް ކަންކަން ކުރާނެ ކަމަށް ހުރިހާ ވާހަކައެއް ދައްކާފައި،" ފައްޔާޒް ވިދާޅުވި އެވެ.
ފައްޔާޒް ވިދާޅުވީ މިހާރު ފެންނަމުންދާ މަންޒަރުތަކުން ރާއްޖެއަށް ލިބިފައި ހުރި ކުރިއެރުންތަކުން ފަހަތަށް ގޮސް ގައުމު އަނބުރާ 19 ވަނަ ގަރުނަށް އެނބުރި ދިޔުމުގެ ބިރު އެބަ އޮތް ކަމަށެވެ.
މިގޮތުން، ސަރުކާރުން ގޯހުން ގޯހަށް ކުރަމުންދާ ކަންކަމާ ދެކޮޅަށް އަޑު އުފުލައި އެކަންކަން ހުއްޓުވަން ޖެހޭ ކަމަށާއި އެކަން ނުކޮށްފިނަމަ ގައުމުގައި ދެން މިނިވަންކަމާ އެކު ނޫޅެވޭނެ ކަމަށް ފައްޔާޒް ވިދާޅުވި އެވެ.
